Ioane 6 - Kuruei Voa Nawawrea 1920

¹ Neko mere ai Iesu Galilaia Ururu ke’enave, Ururu unu nawi Tiberia anu Ere Aura oroiakei’inave.

² A’a aruru ovara e’e’okanave, uku iva veia U liaka maia a’a eiai oro inamu eiaka.

³ Iesu akapu inanave, Una aivara kiripai U i‐pa’anave ane.

⁴ Isaraela a’a anu Pasova purai pani arekamu ai kei’inave.

⁵ Iesu urukiaka’ane a’a aruru ovara inamu‐eiaka ane U ai anemakei’inave, U Pilipo erau voa kurunave, Enei pei inaea eka’amalimau ei a’a pei nava’ane‐iai?

⁶ Uku Pilipo onu lai ipia‐miai U erau voa veve’enave: U ipali’inave U liai awkamakei’inave.

⁷ Pilipo erau voa kurunave, Moni pauna 7 mau’u keina pu inaea liai, uku a’a kavakava pei nava’ane‐iai.

⁸ Una aivara monou, nawi Anederea, Simona Petero onu ovaki, erau voa kurunave,

⁹ Ukua monou eu ai pokoina, pu aw 5, nava rere ane, u mi’ina: a ei pei oiana a’a aila awkono avao ai?

¹⁰ Iesu erau voa kurunave, A’a papa’avai ekine. Pono mo’onu iou ai kei’inave. A’a papa’anave, oro a’a 5,000 akoakei’inave.

¹¹ Iesu pu aw mi’inave, U nawki‐awkavaka’ane, pu la’a U aivara ekunave, a’a papa’amakei’inave aivara pu la’a ekunave; orau awku oro nava ekunave orau oro umuli’inave.

¹² Oro lai aukiakei’inave ane, Una aivara Iesu erau voa kuruenave, Pei kakai roikine, pei paukiakeinavaia.

¹³ Oro pei kakai ie’enave, kekai 12 oro pei kakai evoponave ane, pu aw 5 inu kakai uakei’inave a’a pei navaka’ane.

¹⁴ A’a aruru inamu‐oiaka’ane iva veia Iesu liaka, oro erau voa kurunave, Ei a’a kurua laikorava a’a kapoi U pani va’au ai aneliviai anelia.

¹⁵ Iesu inamu‐oimakei’inave oro aneai awkamakei’inave, oro oiniaka‐arekava’?-?ane‐iai amua are’eai, U e akapu moawku inanave.

¹⁶ Lare eua pani ai Una aivara ve’enave ere aura ai,

¹⁷ Mapea lakenave, ere aura Kaperanauma i oro ke’enave. Pani muru kei’inave, Iesu oro ai aneakape.

¹⁸ Uku kavaea ovara evukinave ere aura menono evere’eakei’inave.

¹⁹ Oro maili 3 pala‐ena?-?vaka’ane, Iesu ere aura upa mere are rokoamakei’inave oro inamu‐oinave, mapea arekamu ai anemakei’inave ane: oro kore kei’inave.

²⁰ U erau voa kuruenave, Nai aku, kore pa liai.

²¹ Mapea ai umu‐aiai oro kopaili’inave: mapea omo aki eiei ai emoki pai’inave.

²² Namai lare ai, a’a aruru Ururu iou ane mekai oimakei’inave, oro inamu‐oiaka’ane boti monou e i‐keiaka, oro inamu‐oiaka ane Iesu Una aivara kiripai mapea a‐lakenavea, Una aivara e ke’enave:

²³ (A mapea varomo Tiberia mere manenave ou mako arekamu ai oro pei navaka, Amua nawki‐awkavaka’ane pei eiai: )

²⁴ A’a aruru inamu‐oinave Iesu, Una aivara ane, iou ai a‐pokoinavea, oro awku mapea lakenave, Iesu voromakei’inave Kaperanauma ai anenave.

²⁵ Oro auiaka’ane iou ane mekai, oro erau voa veve’enave, Rabi e, Ekarapani ai Ni eu ai manenave?

²⁶ Iesu erau voa kuruenave, Nai kurunaina kapoi, Noro ivoromakina uku iva veia peo noro inamu‐oinave, a uku pei noro na’anave, noro lai aukiakei’inave ane.

²⁷ Pei pomoa li’ina ou pei eiai iaki pa liai, a ou pei uakeina opai rokoa eiai, ou pei eiai iaki li’ine, ou pei A’a anu Mere nakuakana: Uku Eloi Mai U upa mere Una veia aiane euna.

²⁸ Oro erau voa veve’enave, Enei oiamalimau enei Eloi inu iaki liane‐iai?

²⁹ Iesu erau voa kuruenave, Eloi inu lai eire, noro pirimaroakoane‐iai U okaiviriane euna.

³⁰ Oro erau voa veve’enave, Oi iva veia ana Ni li’ina enei inamu‐oiane‐iai, enei Ni pirimaroakoane‐iai? Ni oiamali’i?

³¹ Ene mai‐oro mana na’anave kekepere ai, ei voa erau voa kikiriakeina, Pani muku mere U pei ekunave oro na’ane‐iai.

³² Iesu erau voa kuruenave, Nai kurunaina kapoi, Pei pani muku mere Mose a‐nakunavea, a Na Mai pei miki nakumakina pani muku mere.

³³ Uku Eloi inu pei U ane U pani muku mere kinuna, pani va’au rokoa awkuna ane.

³⁴ Oro erau voa kurunave, Amua e, ei pei akune panipani ai.

³⁵ Iesu erau voa kuruenave, Nai Rokoa anu pei keina; u ane u Nai ai anena u moawku navai‐navailiapea, u ane u ipirimaroakona kamuri lavere u moawku miapea.

³⁶ A orau Nai kurunaiane euna, Noro inamu‐i’iane euna, a noro a‐pirimaroakoanakea.

³⁷ A’a kavakava Mai ikuna Nai ai aneakana; u ane u Nai ai anena Nai laoiapea kapoi.

³⁸ Uku Nai pani muku ave’eane euna, pani va’au ai kinuane euna ane, uku Una lai kamaialiai, U ane U ikaivirinave, uku Na lai peo.

³⁹ Mai ane U ikaiviriane euna Una lai eire, oro uriria U ikuane euna Nai monou paukinavaia, uku ika lare ai Nai uriria la‐ekava’ane‐iai.

⁴⁰ Uku Na Mai inu lai eire, A’a kavakava Mere inamu‐ekiawkana, pirimaroakona ane, u opai rokoa miai liakana, ika lare ai Nai rokoa la‐okavakana ane.

⁴¹ Isaraela a’a voa momou kurumakei’inave uku U erau voa kurunave, Nai kurua pei keina pani muku mere kinunave.

⁴² Oro erau voa veve’einave, Ei a’a Iosepa anu mere peana? U Iesu peana, Una mekai, mei ane, enei ipali’ina? Una voa anu miki oiana U erau voa kurumakina, Nai pani muku mere kinuane euna?

⁴³ Iesu erau voa kuruenave, Voa momou noro pa nakinavai.

⁴⁴ A’a kapeo Nai aneai li’ina, Mai arekavape liane, Mai ane U ikaivirinave; ika lare ai Nai la‐okavakana.

⁴⁵ Laikorava a’a anu buka laru ai ei voa kikiriakeina, I Eloi oro uriria ipekiakeia?-?kana. Ou uku eiai a’a kavakava Mai inu voa virina, i U ipawkiakeina ane, u Nai ai anena.

⁴⁶ A’a kapeo Mai inamu‐oiane euna, U e U Eloi mere keina. U Eloi inamu‐oiane euna.

⁴⁷ Nai kurunaina kapoi, A’a ane u ipirimaroakona u opai rokoa mi’ina.

⁴⁸ Nai rokoa anu pei keina.

⁴⁹ Nomo mai‐oro mana na’anave kekepere ai, oro imuakeina.

⁵⁰ Kurua pei pani muku mere kinuna eu aku, a’a ei pei nava’ane, u imuapea.

⁵¹ Nai kurua rokoa pei pani muku mere kinunave; a’a ei pei nava’ane u rokoakana opai keiakana. Pei awku Nai awkuakana Na oia keina, Nai awkuakana pani va’au unu rokoa eiai.

⁵² Isaraela a’a iara voa e kevakeva ekinamakei’inave, erau voa veve’eimakei’inave, Ei a’a Una oia enei navai U eka’ama‐aku’i?

⁵³ Iesu erau voa kuruenave, Noro A’a anu Mere enu oia navape liane, Una aro ane navape liane, noro laru ai rokoa eria noro mi’ina.

⁵⁴ A’a Na oia, Na aro ane, na’ana, u opai rokoa mi’ina; ika lare ai Nai la‐okavakana ane.

⁵⁵ Uku Na oia pei miki keina, Na aro ane ere miki keina.

⁵⁶ A’a Na oia, Na aro ane, na’ana, u Nai kiripai paikiakeina, Nai awku u kiripai paikiakeina.

⁵⁷ Orau opai rokoa Mai ikaiviriane euna, uku Mai awku Nai rokona, orau u awku u na‐imi’ina uku Nai u rokoakana.

⁵⁸ Ei pei kurua pei pani muku mere kinunave: a’a ei pei na’ana u rokoakana opai keiakana: a nomo mai‐oro mana na’anave, oro imua keina ane.

⁵⁹ Ei voa uriria Iesu omoro marea laru ai kurunave, U ipawkimakei’inave ane Kaperanauma ai.

⁶⁰ Una aivara aila ei voa viriaka’ane, oro erau voa kurunave, Ei voa anu miki koama‐ipali’i?

⁶¹ Iesu ipalimakei’inave Una aivara voa momou ekina makei’inave uku ei voa eiai, U erau voa veve’einave, Ei voa nomo lai kukupuna amaeka’i?

⁶² Noro inamu‐oiane A’a anu Mere moawku inamakina iou ai U ipokoinave, noro oiama‐laikoramau?

⁶³ Avaea rokoa awkuna; oia eria awkuna: voa Nai kurunaina oro avaea keina, rokoa keina ane.

⁶⁴ Nomo a’a varomo a?-?pirimaroakoanakea. Oro ane oro a‐pirimaroakoanavea pinai pani mere Iesu ipa?-?elau’unave, u ane u anai‐aviakana.

⁶⁵ U erau voa kurunave, Ou uku eiai Nai erau voa kurunainave, A’a kapeo Nai ai aneai li’ina, Mai arekavape liane.

⁶⁶ Ou pani mere Una aivara ave’enave, U kiripai oro moawku a’enanavea.

⁶⁷ Iesu aivara 12 erau voa veve’einave, Noro awku ama‐enamau?

⁶⁸ Simona Petero erau voa veve’enave, Amua e, enei eka’ama‐enamau? Opai rokoa anu ipawkia voa Ni ipakina.

⁶⁹ Enei pirimaroakoanake, ipali’inake kapoi, Ni Keriso keina, Eloi rokoa anu Mere ane.

⁷⁰ Iesu erau voa veve’einave, Noro a’a 12 Nai ienaiane euna peana, a nomo a’a monou diabolo a’a keina?

⁷¹ Iuda Isakariota, Simona anu mere eiai, U kurunave: uku u ane a’a 12 inu a’a monou u Iesu anai‐aviai evere’eakei’inave.