Ioane 5 - Kuruei Voa Nawawrea 1920

¹ Ei awku oailiakei’inave Isaraela a’a anu purai anenave; Iesu Ierusalema ai inanave.

² Ierusalema ai, mamoe kikau arekamu ai, ururu uakei’inave, Heberu voa anu nawi Betasaida oroiakei’inave; ururu komo mako 5 mi’ina.

³ Ei komo marea laru ai maia a’a aila kei’inave, inamu‐apua a’a, are eko’eko a’a ane, kape vaparia a’a ane, oro aioiaka‐pokoimakei’inave ere menono eiai.

⁴ Uku aivara‐avaea pani varomo ururu ai kinunave, ere menono‐awkanave ane: ere menono pani ai kurua a’a ururu ai pinai ve’enave, u aukarikavakei’inave.

⁵ A’a monou i‐pokoinave, aumeia 38 u maia miaka.

⁶ U i‐keimakei’inave Iesu inamu‐oinave, U ipali’inave ane u pani va’au maia keiaka, U erau voa veve’enave, Kape venea ni amalaikora’i?

⁷ Maia a’a erau voa kurunave, Amua e, ere menono?-?awkavakeia’ane, nai a’a kapeo mi’ina ivakaruai ururu laru ai: nai kinuma?-?keia’ane, a’a mo ve’ena na paku ai.

⁸ Iesu erau voa kurunave, La’ane, ni kile uakine, are rokone ane.

⁹ U emoki aukarikavakei’inave, una kile u uakinave, are rokoanave ane: kurua lare Sabati lare kei’inave.

¹⁰ A’a aukarikavakei’inave Isaraela a’a erau voa kurunave, Sabati lare eire: ni kile ni pa vakaruai.

¹¹ U erau voa kuruenave, U ane U aukari’ikanave, U erau voa kuruinave, Ni kile uakine, are rokone ane.

¹² Oro erau voa veve’enave, A’a koana U erau voa kuruninave, Ni kile uakine, are rokone ane?

¹³ A’a ane u aukarikavakeiaka u pauapaua kei’inave uku Iesu eiai: Iesu vauavaua eleaka uku a’a aruru i?-?pokoinave oro inamu‐a‐oinavea.

¹⁴ Neko mere ai ei a’a Iesu auinave omoro marea laru ai, U erau voa kurunave ane, Akoi’i, ni aukarikavakeina: moawku namea pa liai, ni maia lipi lipi mi’inavaia.

¹⁵ A’a elenave Isaraela a’a ekinave ane, U ane a’a aukarikavaka U Iesu kei’inave.

¹⁶ Ou uku eiai Isaraela a’a Iesu mani‐awkanave, uku ei awku U li’inave Sabati lare ai.

¹⁷ Iesu erau voa kuruenave, Na Mai, Nai awku, iaki lioko‐lioko.

¹⁸ Uku ei voa eiai Isaraela a’a iviri kei’inave Iesu avai: uku Sabati lare enu vupu U vepeaka, uku awku U kuruaka Eloi Una Mai kei’inave, U ipawkimakei’inave U, Eloi ane, ipi’ipia kei’inave.

¹⁹ Iesu erau voa kuruenave, Nai kurunaina kapoi, Mere verukua awku eria liai li’ina, U liai li’ina ou awku e U inamu‐oina Mai limakina: uku awku kavakava Mai li’ina, ei awku Mere awku li’ina.

²⁰ Uku Mai Mere umu‐awkana, awku uriria U limakina U Mere ipawkina: a ei awku anu awku re U ipawkiakana, noro varua’?-?ane‐iai.

²¹ Uku orau Mai imua a’a la‐ekana, rokoa‐eina ane; orau Mere awku rokoa‐eina oro ane U umu‐ekana.

²² Uku Mai a’a kapeo voa veve’ena, voa vevea iki U Mere awkuane euna:

²³ Uku a’a uriria Mere avioiane‐iai orau oro Mai avioina. A’a Mere avioiape liane, Mai awku U ane U Mere okaiviriane euna u a‐avioinakea.

²⁴ Nai kurunaina kapoi, A’a Na voa virina, pirimaroakona ane U ane U ikaivirinave, u opai rokoa mi’ina, u voa vevea miapea, imua mere rokoa ai u awpeane euna.

²⁵ Nai kurunaina kapoi, Pani aneliviai anelia, lia, eai ei‐anena, imua a’a Eloi inu Mere enu voa viriakana: viria a’a rokoakana ane.

²⁶ Uku orau Mai rokoa mi’ina U laru ai; orau U evere’eane euna Mere awku rokoa miai Una nane laru ai.

²⁷ Iva awku U Mere awkuane euna voa veve’eai, uku U A’a anu Mere keina.

²⁸ Ei voa eiai noro pa varuavai: uku pani aneliviai anelia oro uriria lauoi laru ai keina Una voa oro viriakana,

²⁹ Oro elemaneakana ane; oro ane oro opara anana liane euna oro la’avakana rokoa eiai; oro ane oro opara namea liane euna oro la’avakana voa vevea eiai.

³⁰ Nai verukua eria liai li’ina: orau Nai virina, orau Nai voa veve’ena: Na voa vevea anana keina; uku Na lai a’iravanakea, a U ikaivirinave, Una lai irana.

³¹ Nai ione‐liane uku Na nane eiai, Na ione voa miki keiapea.

³² A’a mo ione li’ina uku Nai eiai; Nai ipali’ina ione voa u ione li’ina uku Nai eiai ione voa miki keina.

³³ Noro Ioane ai okaivirinave, u ione a’a kei’inave voa miki eiai,

³⁴ A ione voa uku Nai eiai Nai mi’ina a’a mere aneape: ei voa Nai kuruna, noro inakavakeia’ane‐iai.

³⁵ Lamepa iau ruawka?-?makina, akuru awkamakina, orau Ioane pamea kei’inave: pani mau’u noro umuli’inave una pamea laru ai kopailiai.

³⁶ Ioane enu ione, ione ovara e ane, Nai mi’ina: uku iaki Mai ikuane euna Nai oailiane‐iai, iaki Nai li’ina ione li’ina uku Nai eiai, Mai ikaiviriane euna.

³⁷ Mai ane, U ikaivirinave, U ione liane euna uku Nai eiai. Una voa noro viriape, Una aipo noro inamu‐oiape.

³⁸ Una voa noro laru ai noro miape: uku U pirimaroakoai noro inaka‐li’ina, U ane Mai okaiviriane euna.

³⁹ Iaa revareva voa noro evorona, uku noro laikorana oro laru ai noro opai rokoa auiakana; ou iaa revareva ione li’ina uku Nai eiai.

⁴⁰ Nai ai aneai noro rokoa miane‐iai noro umu‐a‐li’inakea.

⁴¹ Avioia a’a mere Nai a‐mi’inakea.

⁴² Nai ipa‐nalauna, Nai ipali’ina nomo umu laru ai Eloi noro umu‐a‐awkanakea.

⁴³ Na Mai inu nawi Nai anena, noro umu‐a‐ai’inakea. A’a mo una nawi anea’ane, noro umu‐aiakana.

⁴⁴ Eka’amali’i noro pirimaroakoai, noro monou monou mere avioia mi’ina, ou avioia Eloi e mere noro voroape liane?

⁴⁵ Pa laikoravai Nai ailinaiakana Mai inu paku ai: monou uarokona ailinaina, Mose, u ane noro pirimaroakona.

⁴⁶ Noro Mose pirimaroakoaka livilia, noro ipirimaroakoane euna: uku u revareva kikirinave uku Nai eiai.

⁴⁷ Una revareva noro pirimaroakoape liane, Na voa noro eka’amapirimaroakoamau?