Ioane 20 - Kuruei Voa Nawawrea 1920

¹ Ebedoma anu pinai lare, muru pani merea pani paku ai, Maria Magadala lauoi ai anenave, kikau rawre lauoi mere lai‐awkavakeiaka u inamu‐oinave.

² U area‐enanave, Simona Petero ai, Iesu unu naumuki aivara ai ane, u anenave, erau voa kuruenave ane, Amua lauoi mere oro iou‐miane euna, mako enei a‐ipali’inakea oro i‐iane euna.

³ Petero, aivara e ane, elenave, lauoi ai anenave ane.

⁴ Orere area‐enanave, aivara e Petero paku ai lauoi ai pinai pai’inave.

⁵ U vaparia‐kinumakei’?-?inave, lauoi laru ai inamu‐ekimakei’inave, kapua keimakei’inave u inamu‐oinave; u a‐ikirinavea.

⁶ Simona Petero e’e’okamakei’inave, u awku lauoi ai pai’inave, lauoi ikirinave ane, kapua keimakei’inave u inamu‐oinave.

⁷ Kapua Una uku piriakei’inave, kapua e kiripai a?-?kei’inavea, kurua kapua vovoakei’inave mako e kei’inave.

⁸ Aivara e awku, u pinai lauoi ai paiaka, u ikirinave, inamu‐oinave, pirimaroakoanave ane.

⁹ Uku orere iaa revareva voa ipaliakape, imua mere U la‐okavai limakina.

¹⁰ Orere moawku elenave, omo marea ai vairunave ane.

¹¹ Maria lauoi iki ai oinave, u vikirimakei’inave ane: u vikirimakei’inave u vaparia‐kinunave, lauoi laru ai inamu‐ekinave ane.

¹² Aivara avaea rere kapua urupu luki‐emiakei’inave u inamu‐einave, orere papa’amakei’inave, monou uku unu mako ai, monou are enu mako ai, iou ai Iesu unu kape keiaka.

¹³ Orere erau voa kurunave, A’e e, ni oiama?-?vikirimakei’i? U erau voa kuruenave, Uku na Amua oro iou‐miane euna, mako oro i‐iane euna nai a‐ipali’inakea.

¹⁴ U orau kuruaka’ane, u urukinave, Iesu inamu‐oinave ane i‐oimakei’inave, u Iesu a‐ipali’inavea.

¹⁵ Iesu erau voa kurunave, A’e e, ni oiama‐vikirimakei’i? Ni koama‐voromakei’i? U laikoramakei’inave U aura oiviria a’a, u erau voa kurunave, Amua e, ni iou‐miane euane, mako ikine ni i’iane euna, nai iou?-?awmiakana.

¹⁶ Iesu erau voa kurunave, Maria e. U urukinave, erau voa kurunave ane, Raboni e. Kurua nawi inu miki Amua.

¹⁷ Iesu erau voa kurunave, Ni pa akiki’iai; uku Na Mai ai Nai inavape: ei iva voa Na aroa a’a ai ni mi?-?enara: Na Mai ai, nomo Mai ai ane, Na Eloi ai, nomo Eloi ai ane, Nai inamakina.

¹⁸ Maria Magadala anenave, aivara ekinave ane, u Amua inamu‐oiaka, U ei voa kuruaka ane.

¹⁹ Kurua lare enu eua pani, ebedoma anu pinai lare, marea ai aivara i‐pokoinave kikau ekuakei’inave uku oro Isaraela a’a eiai kore kei’inave. Iesu i‐anenave, oro awkono avao ai U oinave, erau voa kuruenave ane, Noro airu mi’ine.

²⁰ U orau kuruaka’ane, Una eve, akane ane, U ipekinave. Uku aivara omo Amua inamu‐oinave oro kopaili’inave.

²¹ Iesu erau voa moawku kuruenave, Noro airu mi’ine: orau Na Mai ikaiviriane euna, orau Nai nakaivirina.

²² U orau kuruaka’ane, oro upa mere U ivakumu erekanave, erau voa kuruenave ane, Avaea Iaa noro mi’ine.

²³ Noro a’a anu namea paue‐emiane, oro paue‐emiakeina; a’a anu namea noro epiriane, oro epiriakeina.

²⁴ Toma, aivara a’a 12 unu a’a, nawi Didimo oroiakei’inave, Iesu anenave ane u oro kiripai a‐pokoinavea.

²⁵ Aivara e oro erau voa kurunave, Enei Amua inamu‐oiane euna. U erau voa kuruenave, Una eve kavai ai ikoko onu kore nai inamu‐oiape liane, na eve uru ikoko onu kore nai ruape liane, na eve awku Una akane enu kore ruape liane, nai pirimaroakoapea.

²⁶ Lare 8 periakei’inave, Una aivara marea laru ai moawku pokoinave, Toma oro kiripai kei’inave: kikau awku ekuakei’inave: Iesu i‐anenave, oro awkono avao ai oinave, U erau voa kuruenave, Noro airu mi’ine.

²⁷ U Toma erau voa kurunave, Ni eve uru oiokane, Na eve nekene; ni eve oiokane Na akane laru ai rune ane: pirimaroakoa eria a’a ni pa pokoiai, ni pirimaroakone.

²⁸ Toma erau voa kurunave, Na Amua e, na Eloi e ane.

²⁹ Iesu erau voa kurunave, Uku ni inamu‐oiane euna, ni pirimaroakoane euna: a oro inamu‐i’iape, oro ipirimaroakoane euna, oro kopai‐ekavakeina.

³⁰ Iva veia mo aila Iesu li’inave Una aivara paku ai, ei buka laru ai omo uru kikiriakeiapea.

³¹ A ei voa kikiriakeina, uku noro Iesu pirimaroakoane‐iai U Keriso keina, Eloi inu Mere; noro pirimaroakoamakina i Una nawi mere noro opai rokoa miane‐iai.