Ioane 14 - Kuruei Voa Nawawrea 1920

¹ Lai kukupuna noro pa miai; noro Eloi pirimaroakona, noro ipirimaroakone ane.

² Na Mai inu marea laru ai keia lalava aila uakeina: ei voa miki keiape liane, Nai nakiane euna. Mako evere’eai noro eiai Nai enanavailia.

³ Nai enava’ane, mako evere’eane ane noro eiai, Nai moawku aneakana, arenakavakana noro Nai kiripai keia’ane‐iai; uku iou ai Nai i‐pokoiakana, noro awku i‐pokoiakana.

⁴ Na ena mako noro ipali’ina, kapea awku noro ipali’ina.

⁵ Toma erau voa veve’enave, Amua e, Ni aki eiei enei a‐ipali’inakea, kapea enei eka’ama‐ipali’i?

⁶ Iesu erau voa kurunave, Kapea, Voa miki ane, Rokoa ane, Nai keina: i Nai mere e a’a Mai ai anena.

⁷ Noro ipa‐ilauaka livilia, Mai awku noro ipa‐ulauaka: ei pani mere noro ipa‐ulauna, inamu‐oiane euna ane.

⁸ Pilipo erau voa kurunave, Amua e, Mai ipakine, enei lai aukiakeiakana.

⁹ Iesu erau voa veve’enave, Pilipo e, ni kiripai pani va’au Nai pokoiane euna ni ipa‐ilaupeana? u ane u inamu‐i’iane euna Mai awku u inamu‐oiane euna; uku oiana ni erau voa veve’i’ina, Mai ipakine.

¹⁰ Ni pirimaroakoa‐peana Mai laru ai Nai rokona Mai awku Nai laru ai rokona? voa Nai kurunina Nai verukua a‐kurunakea; a Mai Nai laru ai rokona, Una iaki U li’ina.

¹¹ Noro uriria ipirimaroakone Mai laru ai Nai rokona, Mai awku Nai laru ai rokona: a ei voa naea, ipirimaroakone uku iaki Nai li’ina.

¹² Nai kurunaina kapoi, A’a ane u ipirimaroakona iaki Nai li’ina u awku liakana; ei iaki inu iaki ovara?-?mai u liakana; uku Nai Mai ai enavakana.

¹³ Awku kavakava eiai noro nawki‐awkavakana uku Na nawi eiai, Nai liakana, uku Mai Mere laru ai avioia?-?keia’ane‐iai.

¹⁴ Awku eiai noro nawki‐awkava’ane uku Na nawi eiai, Nai liakana.

¹⁵ Noro umu‐ikava’ane, Na vupu noro kamaia‐ekavakana.

¹⁶ Nai Mai nawki‐awkavakana, Paioka mo U nakuakana, U noro kiripai pokoiane‐iai opai keiakana.

¹⁷ Voa miki inu Avaea; U ane pani va’au miai liapea, uku oro inamu‐oiape, a‐ipali’inakea ane: a noro ipali’inake: uku noro laru ai U pokoina, noro laru ai U keiakana ane.

¹⁸ Noro rurupu a’a Nai avenaiapea: noro ai Nai vairuakana.

¹⁹ Maura pani ai pani va’au inamu‐i’iapea, a noro inamu‐i’iakana: uku Nai rokona, noro awku rokoakana.

²⁰ Kurua lare ai noro ipaliakana Na Mai laru ai Nai rokona, noro awku Nai laru ai rokona, Nai awku noro laru ai rokona.

²¹ U ane u Na vupu mi’ina, kamaia‐ekana ane, u umu‐ikana: u ane u umu‐ikana, i Na Mai u umu‐awka?-?vakeiakana, Nai awku umu‐awkavakana, Na nane iki ipawkiakana ane.

²² Iuda, Isakariota peo, erau voa kurunave, Amua e, uku oiana Ni nane iki Ni ipakiakana, pani va’au Ni ipekiapea?

²³ Iesu erau voa kurunave, A’a umu‐ikava’ane Na voa u kamaia‐ekavakana: Na Mai umu‐awkavakana ane, u ai aneakana ane, u kiripai enei pokoiakana ane.

²⁴ A’a umu‐ikavapea, Na voa u kamaia‐a‐ekanakea: ipawkia voa noro virimakina Na voa peo, Mai inu voa eire, U ane U ikaivirinave.

²⁵ Ei voa uriria Nai kurunaiane euna Nai noro kiripai pokoiane.

²⁶ A Paioka, U ane U Avaea Iaa keina, U ane Na nawi eiai Mai okaiviriakana, awku uriria U ipanakiakana, voa uriria ane Nai kurunaiane euna nomo lai laru ai U rokoa‐eiakana.

²⁷ Noro ai airu Nai ave’ena, Na airu Nai nakuna: Nai airu a‐nakunakea orau pani va’au kepoia voa awkuna. Lai kukupuna pa miai, kore pa liai ane.

²⁸ Noro viriane euna Nai kurunainave, Nai enanavailia, noro ai Nai moawku aneakana. Noro umu‐ikava’ane, noro kopai liane euna uku Nai Mai ai enamakina; uku Mai Nai upa mere are’eakeina.

²⁹ Kurua pani paku ai Nai nakiane euna, uku ou pani anea’ane noro pirimaroakoane‐iai.

³⁰ Iru pani ai noro kiripai Nai voa mo’onu kuruapea: uku ei pani va’au unu marevaki aneliviai anelia. Nai laru ai u awku eria mi’ina.

³¹ A uku pani va’au ipaliane‐iai Nai Mai umu‐awkana; orau awku Mai ikinave, orau Nai li’ina ane. Lala’ane, enei enanamaki.