Ioane 12 - Kuruei Voa Nawawrea 1920

¹ Lare 6 periakei’inave Pasova purai pani paku ai Iesu Betania ai anenave, Lasaro i‐pokoinave, u ane Iesu imua mere la‐okavaka.

² Iesu avioiai oro purai i‐karikinave; Mareta pei kamaia li’inave: Lasaro a’a monou kei’inave Iesu kiripai pei navai pa’anave.

³ Moni kavani ovara muramura pauna monou Maria mi’inave, Iesu unu are upa mere u orekanave, Iesu unu are una kimari u lavere kikinave: muramura anu muri marea evopoakei’inave.

⁴ Una aivara monou, nawi Iuda Isakariota, Simona anu mere, u ane u neko mere ai Iesu anai‐avinave, u erau voa kurunave,

⁵ Uku oiana ei muramura 300 seleni eiai inaealia‐a‐kei’?-?inavea, kavani moni rurupu a’a ekuakei’inave ane?

⁶ U orau a‐kurunavea uku u rurupu a’a umu‐ekanave; a uku u avapu a’a kei’inave, uku mo ane moni maua u miaka u moni oiviriai.

⁷ Iesu erau voa kurunave, A’e keinamoki, Na i’ia lare eiai ei muramura u oiviriane euna.

⁸ Rurupu a’a noro kiripai noro mi’ina panipani ai; a noro i‐miape panipani ai.

⁹ Isaraela a’a aila ipali’inave Iesu i‐pokoinave: uku Iesu e eiai oro a‐anenavea, a uku Lasaro awku inamu‐oiai oro aneaka, u ane Iesu imua mere la‐okavaka.

¹⁰ Omoro amua a’a uku Lasaro avai oro voa ipinave.

¹¹ Uku u eiai Isaraela a’a aila ave’einave, Iesu pirimaroakoanave ane.

¹² Namai lare ai a’a aruru ovara purai eiai aneaka, oro viriaka’ane Iesu Ierusalema ai anemakei’inave,

¹³ Oro iri aw mi’inave, au‐awkuai oro elenave ane, oro erau voa araro laeali’inave, Eloi iawkane! Isaraela a’a anu Amua kopai‐awkavakeina, U ane U Amua anu nawi aneliviai anelia.

¹⁴ Iesu asini ukua auiaka’ane, una muri mere U pa’anave: voa orau kikiriakeina,

¹⁵ Kore pa liai, Siona anu paka e: akoi’i, ni Amua i?-?anemakina, asini ukua upa mere pa’amakina.

¹⁶ Ou pani ai ei awku unu miki Una aivara a‐ipali’inavea; neko mere ai Iesu evao’evao awkavakei’inave ane, oro laikora‐ekinave ei awku U eiai kikiriakei’inave, oro ei awku liaka ane U eiai.

¹⁷ A’a aruru U kiripai i‐pokoiaka U Lasaro imua mere la‐okavaka’ane, oro ioneli’inave uku awku oro inamu‐oiaka.

¹⁸ Ei uku eiai awku a’a aruru au‐awkunave, uku oro viriaka U ei iva veia liaka.

¹⁹ Uku ei voa Parisea a’a erau voa ekinave, Nomo voa eria keina! akoi’i, pani va’au e’e’okana!

²⁰ A’a avioiai anenave purai pani ai oro awkono avao ai Heleni a’a varomo i‐pokoinave:

²¹ Pilipo Betasaida a’a, Galilaia eiei inu pai’iri, u ai Heleni a’a anenave, erau voa kurunave ane, Amua e, Iesu inamu‐oiai enei umuli’ina.

²² Pilipo anenave Anederea awkinave ane; Anederea, Pilipo ane, Iesu awkinave.

²³ Iesu erau voa kuruenave, Pani ei‐anena A’a anu Mere avioiakeiai.

²⁴ Nai kurunaina kapoi, Kawni inu uru ka’e ai aravape liane, imuape liane ane, u kawni uru monou uakeina; a u imuane, uru aila u merina.

²⁵ A’a una rokoa umu‐awkana, una rokoa u paukiakana; a’a una rokoa vai’i‐awkana ei pani va’au ai, una rokoa u oiviriakana opai keiakana.

²⁶ A’a Na aivara evere’eai umuliane, u e’e’ikanamoki; iou ai Nai pokoina, Na aivara awku i‐pokoiakana: a’a Na aivara evere’eai umu?-?liane, Na Mai avioiakana.

²⁷ Eai Na imunu kukupuna evopoakeina; Nai oiamakurumau? Mai e, ei pani mere i’ikane: a uku ei awku eiai Nai ei pani ai anea’ane euna.

²⁸ Mai e, Ni nawi avioine. Ou pani ai kaia mere voa anenave, erau voa kurunave ane, Na nawi Nai avioiane euna, Nai moawku avioiakana ane.

²⁹ A’a aruru i‐oimakei’inave voa virinave, erau voa kurunave ane, Kaia kirili’?-?ina: a’a mo erau voa kurunave, Aivara avaea voa kurunave.

³⁰ Iesu erau voa kurunave, Ei voa a‐anenavea uku Nai eiai, a uku noro eiai.

³¹ Eai voa vevea anena ei pani va’au eiai: pani va’au unu marevaki eai laoiakeia?-?ma.

³² Pani va’au mere Nai la‐ikavakeia’ane, Nai ai a’a uriria Nai lakiakana.

³³ U orau kurunave Una imua anu aipo ipawkiai.

³⁴ A’a aruru erau voa kurunave, Vupu voa mere enei viriane euna, Keriso pokoiakana opai keiakana: Ni eka’amakuru’i, A’a anu Mere la‐okavakeiai limakina? A’a anu Mere koana?

³⁵ Iesu erau voa kuruenave, Pani mau’u pamea noro awkono avao ai keina. Pani noro pamea miane noro are rokone, muru noro ai anenavaia; uku kurua a’a muru ai are rokona u paua?-?paua keina una kapea eiai.

³⁶ Orau noro pamea mi’ina, noro pamea pirimaroakone, pamea anu mere noro evere’eane‐iai. Ei voa Iesu kurunave, U enanave, a’a aruru mere U vauakinaveane.

³⁷ Iva veia aila omo paku ai U liaka, a oro a‐pirimaroakoanavea:

³⁸ Uku Isaia laikorava a’a anu voa evere’eakeia’ane‐iai, u erau voa kurunave, Amua e, ene omoro voa koama‐pirimaroakoa’e? Koana eiai Amua anu eve ipawkiakeia’ane euna?

³⁹ Ei uku eiai oro pirimaroakoai a‐li’inavea, uku Isaia moawku erau voa kurunave,

⁴⁰ Omo inamu U apua‐eiane euna, omo lai awku u kane‐eiane euna, i omo inamu oro inamu‐oinavaia, omo lai ane oro ipali’inavaia, Oro lai urukinavaia, Nai aukari‐ekanavaia.

⁴¹ Ei voa Isaia kurunave, uku Una evao’evao u inamu‐oiaka’ane, U eiai u kurunave ane.

⁴² Amua a’a aila pirimaroakoanave: uku Parisea a’a eiai oro iki‐e’eakape, oro omoro marea mere laeiakei?-?navaia:

⁴³ Uku a’a anu avioia voa oro ie’enave, Eloi inu avioia eiai oro lai eria miaka.

⁴⁴ Iesu erau voa araro kurunave, A’a ipirimaroakona, u a‐ipirimaroakoana?-?kea uku Nai e eiai, u U‐pirimaroakona U ane U ikaivirinave.

⁴⁵ U ane u inamu‐i’ina, U awku U ikaivirinave u inamu‐oina.

⁴⁶ Pamea orau Nai anea’ane euna pani va’au ai, a’a kavakava ipirimaroakona, u muru ai pokoinavaia.

⁴⁷ A’a Na voa viriane, u pirimaroakoape liane, Nai voa veve’eapea: uku Nai aneakape pani va’au voa veve’eai, a uku pani va’au iawkavai.

⁴⁸ A’a lari‐ikana, Na voa awku inaka‐li’ina, u voa vevea amua mi’ina: kurua voa Nai kuruane euna, ika lare ai voa veve’eakana.

⁴⁹ Uku Nai verukua kuruape; a Mai ikaivirinave U ikinave uku voa Nai kuruai limakina.

⁵⁰ Nai ipali’ina Una awkia voa opai rokoa keina: ou uku eiai voa kavakava Nai kuruna, voa orau Mai ikinave, orau Nai kuruna.