Ioane 1 - Kuruei Voa Nawawrea 1920

¹ Pani va’au unu ea pani paku ai Voa uarokoanave, Voa Eloi kiripai uarokoanave, Voa Eloi uarokoanave.

² Pani va’au unu ea pani paku ai Eloi kiripai U uarokoanave.

³ Awku uriria i U eiakei’inave; uku U e awku uriria rokona, rokoa awku uku e eria mi’ina.

⁴ U laru ai Rokoa uakei’inave; kurua Rokoa a’a anu Pamea kei’inave.

⁵ Pamea muru ai akuruli’ina; muru kurua Pamea awkoni‐awkavape.

⁶ A’a Eloi mere okaiviriakei’inave nawi Ioane oroiakei’inave.

⁷ U ione a’a anenave, uku ioneliai Pamea eiai, uku a’a uriria i U mere pirimaroakoane‐iai.

⁸ Kurua Pamea u a‐kei’inavea, u okaiviriakei’inave ioneliai uku kurua Pamea eiai.

⁹ Pamea miki U ane U a’a kavakava pani va’au ai aneliviai anelia pamea‐aw?-?kana.

¹⁰ Pani va’au ai U uarokoanave, pani va’au i U eakei’inave, pani va’au a?-?ipa‐ulau’unavea.

¹¹ Una awku ai U anenave, Una a’a umu‐a‐ai’?-?inavea.

¹² A oro uriria umu‐aiane euna, oro ane oro Una nawi pirimaroakona, U evere’eiane euna Eloi inu ukua‐mere evere’eai:

¹³ I Eloi inu umu mere oro Una ukua‐mere kiniakei’inave, i omo kiri a’a mere peo, i omo umu mere peo, i omo mekai inu umu mere peo.

¹⁴ Voa a’a anenave, enei awkono avao ai pokoinave ane, (Una evao’evao enei inamu‐oinave, Mai inu naumuki Mere enu evao’evao), la’aruku, miki ane, U evopoakei’inave.

¹⁵ Uku U eiai Ioane ioneli’inave, erau voa araro kurunave ane, Ei a’a U aku uku U eiai nai erau voa kurunave, U nai neko ai aneliviai anelia U nai paku ai aiakeia’ane euna: uku na pani paku ai U uarokoanave.

¹⁶ Uku Una veruku mere enei uriria la’aruku, la’aruku, mo, miane euna.

¹⁷ Uku i Mose Vupu awkuakei’inave, la’aruku, miki ane, i Iesu Keriso mere anenave.

¹⁸ A’a anu inamu Eloi inamu‐oiape; naumuki Mere Mai inu ukari ai keina, U Eloi ipawkiane euna.

¹⁹ Isaraela a’a omoro a’a, Levi a’a ane, Ioane ai ekaivirinave Ierusalema mere, erau voa veve’eai, Ni koana? Ioane enu ione voa eire.

²⁰ U voa iki‐e’enave, voa vaua‐a‐awkanavea, u erau voa kurunave, Nai Keriso peo.

²¹ Oro erau voa veve’enave, Ni koana? Ni Elia ana? U kurunave, Ai, nai Elia peo. Ni kurua laikorava a’a ana? U kurunave, Ai, nai kurua laikorava a’a peo.

²² Oro erau voa veve’enave, Ni koana? Akine, enei kavani voa ekuane‐iai oro ane oro akaivirinave. Ni oiamakuru’i ni nane eiai?

²³ U erau voa kuruenave, Nai kurua a’a anu voa kekepere ai erau voa araro laealimakina, Iehova anu kapea anana‐ene kekepere ai, nai orau Isaia laikorava a’a anu voa evere’emakina.

²⁴ Oro ane oro ekaiviriakeiaka Parisea a’a kei’inave.

²⁵ Oro moawku erau voa veve’enave, Ni Keriso peane, Elia peane, kurua laikorava a’a peane, uku oiana ni bapatiso‐li’ina?

²⁶ Ioane erau voa kuruenave, Ere bapatiso nai li’ina: noro awkono avao ai Monou oina, noro a‐ipa‐ulaunakea;

²⁷ U ane U nai neko ai aneliviai anelia, nai ima peo Una rawre are naw uniai.

²⁸ Ei voa kuruakei’inave Betania ai, Ioridana iou anelai, iou ai Ioane bapatiso‐limakei’inave.

²⁹ Namai lare Ioane Iesu inamu‐oinave u ai anemakei’inave, u erau voa araro kurunave, Akoi’i, Eloi inu Mamoe‐ukua ioure, U ane U pani va’au unu namea iou‐miakana.

³⁰ U eiai nai erau voa kurunave, Nai neko ai Monou aneliviai anelia nai paku ai U aiakeia’ane euna: uku na pani paku ai U uarokoanave.

³¹ Nai ipa‐ulauakape: a uku U ipawkiakeia’ane‐iai Isaraela a’a anu paku ai ere bapatiso‐limakina nai anea’ane euna.

³² Ei ione voa awku Ioane erau voa kurunave, Avaea naku orau lilimakina pani muku mere nai inamu‐oiane euna, U upa mere kei’inave ane

³³ Nai ipa‐ulauakape: a U ikaivirinave ere bapatiso‐liai U erau voa kuruinave, U upa mere Avaea lilimakina, keimakina ane, ni inamu‐oiakana, U ane U Avaea Iaa bapatiso‐li’ina.

³⁴ Ei awku nai inamu‐oiane euna, nai ione a’a keina ane U Eloi inu Mere keina.

³⁵ Namai lare Ioane una aivara rere kiripai oimakei’inave;

³⁶ Iesu awpemakei’inave u inamu‐oiaka’ane, u erau voa kurunave, Akoi’i, Eloi inu Mamoe‐ukua ioure!

³⁷ Aivara rere una voa virinave, orere Iesu e’e’okanave ane.

³⁸ Iesu urukinave, U inamu‐eimakei’inave ane, e’e’okamakei’inave, U erau voa veve’einave, Norere oiamalaikora’i? Orere kurunave, Rabi e, (kurua nawi inu miki Amua) Ni eka’ama?-?pokoi’i?

³⁹ U erau voa kuruenave, Anene, norere inamu‐oiakana ane. Orere enanave, Una pokoia mako inamu‐oinave ane, U kiripai i?-?pokoinave kurua lare ai: lare upa mere pani ai orere U kiripai enanave.

⁴⁰ A’a rere Ioane enu voa viriaka, Iesu e’e’okavaka ane, a’a monou una nawi Anederea, u Simona Petero onu ovaki.

⁴¹ Una airavaki Simona u pinai auinave, erau voa kurunave ane, Enei Mesia auiane euna, kurua nawi inu miki Keriso.

⁴² Una airavaki Iesu ai u arekanave. Iesu inamu‐oiaka’ane, U erau voa kurunave, Ni Simona Iona anu mere: nawi Kepa niroiakeiakana, kurua nawi inu miki Petero, Rawre ane.

⁴³ Namai lare Betania ave’eai Iesu umuli’inave uku Galilaia eiei ai eleai, U Pilipo au‐awkunave, erau voa kurunave ane, E’e’ikane.

⁴⁴ Pilipo Betasaida a’a, Anederea, Petero ane, enu pai’iri ioure.

⁴⁵ Pilipo Natanaela au‐awkunave, erau voa kurunave ane, U eiai Vupu voa laru ai Mose kikirinave, laikorava a’a awku kikirinave, Iesu Nasareta a’a, Iosepa anu mere, enei auiane euna.

⁴⁶ Natanaela erau voa veve’enave, Ima awku Nasareta mere ama’ane’i? Pilipo erau voa kurunave, Anene, inamu‐oine ane.

⁴⁷ Natanaela U ai anemakei’inave Iesu inamu‐oinave, erau voa kurunave ane, Akoi’i, Isaraela a’a miki eire, u laru ai ewaea eria keina.

⁴⁸ Natanaela erau voa veve’enave, Eka’amali’i Ni ipa‐ilauna? Iesu erau voa kurunave, Pani paku ai Pilipo laea‐nilauaka’ane ni iri arau ai pokoiane, Nai inamu‐ni’inave.

⁴⁹ Natanaela kurunave, Rabi e, Ni Eloi inu Mere, Isaraela anu Amua.

⁵⁰ Iesu erau voa veve’enave, Uku Nai kuruninave, Nai inamu‐ni’inave iri arau ai ni amapirimaroakoa’i? awku mau’u eire, a awku ovara ni inamu‐oiakana.

⁵¹ U erau voa kurunave, Nai kurunina kapoi, Neko mere ai pani muku auakeiakana, Eloi inu aivara‐avaea inamakina, lilimakina ane, A’a anu Mere upa mere, ni inamu‐oiakana.