Heberu 12 - Kuruei Voa Nawawrea 1920

¹ Uku i ione kaupu ovaramai enei aviakiakeina, awku mu’u kavakava enei a’uniakeina enei au‐ekanamaki, namea ane ene are iakari‐eina. Enei kevere?-?kevere iviri a’epeaka’ana?-?maki eiei ane ene paku ai keina,

² Iesu inamu‐ekiawkama?-?kina, ene pirimaroakoa anu Orava Amua, U ane kavani U akuakana. Uku kopai eiai Una paku ai kei’inave iri keoa U lai kekepa rokoaka‐mi’inave, iri keoa anu makiri U lari‐awkanave, neko mere ai U pa’anave, iou ai U eai pa’ana, Eloi inu amua‐pakara eve miki mekai.

³ Ou uku eiai lai mu’u mere, umu‐eavu mere ane, area‐enavai noro umuliane, nomo kukunu Una kukunu kiripai noro ipine, U ane mani ovara mi’inave namea a’a mere.

⁴ Namea awkoni‐awkavai nomo rokoa e’ei ai noro aiape.

⁵ Iviri voa ane, ukua‐mere orau, kurunaina noro aika’ane euna, voa ane erau voa kuruna, Na mere e, keporo namau pa liai Amua anu ipawkia voa eiai, U anana?-?naiane euane oia‐eavu pa liai;

⁶ Uku oro ane Amua umu‐ekana U ipekina: Mere kavakava U umu‐aina U vaki?-?awmi’ina.

⁷ Kukunu noro rokoaka?-?emimakina oro uku nomo ipawkia eiai. Mere orau Eloi ipanakimakina; mere koana i una mekai u ipawkiakeiapea?

⁸ Ipawkia noro miape miane, ipawkia ane mere miki kavakava aua‐miane euna, noro rurupu‐ukua ipanakia?-?keina, mere miki peo.

⁹ Ei voa ane, ene pani va’au mekai ipakinave, enei avi’einave ane, ene avaea anu Mai enei kamaia‐awka?-?vapeana, rokoakana ane?

¹⁰ Voa miki aumeia ailapea oro ipakinave orau oro laikoranave; a uku ene ima eiai U ipakina uku Una iaa opara enei aua‐miane‐iai.

¹¹ Ipawkia opara ipawkia pani ai kukunu mikirina, kopai miape ane, a oro eiai ane oro ipekiakeia’ane euna ipawkia opara airu, opara anana ane, merina.

¹² Ou uku eiai eve puku, are epo paroro ane, venea‐eine.

¹³ Kapea anana karikine nomo are eiai, o’onu are unininavaia, oro aukarieka?-?vakeia’ane‐iai.

¹⁴ A’a uriria kiripai airu miai noro ipia‐mi’ine, iaa opara eiai ane, a’a iaa opara miape miane u Amua inamu‐oiapea.

¹⁵ Keverekevere oivirine a’a Eloi inu la’aruku mere leunavaia; neva mere veve la’anavaia iara uru meriai noro awkono avao ai kuku?-?puna‐eai, aroa a’a iki upu?-?eai;

¹⁶ Eiri lia a’a, iaa eria a’a Esau orau, noro mi’inavaia, u ane una airavaki kinia anu aru u awkunave pei monou eiai.

¹⁷ Uku noro ipali’ina, neko mere ai kopai miai u umuli’inave’ane, u inaka‐awkavakei’inave: uku pani eria u auinave una opara paueai, opara ane u liaka, i viki inu inamu‐ere kurua kopai u keverekevere voronave.

¹⁸ Uku noro aneape akapu iau paraparalimakina mako ai, ivawvoa’a mako ai ane, muru ai ane, kavaea ovara ai ane,

¹⁹ Pi’i inu laea rawre mako ai, voa araro onu rawre mako ai ane, uku rawre enu ovara eiai oro ane oro virinave rawre eiai oro nawki‐awkanave:

²⁰ Uku vupu voa awkuakeiaka oro rokoaka‐miai a?-?li’inavea, Lekuleku animala akapu nekeane u imuai rawre epakiakeiakana:

²¹ Uku akapu iara aipo orau kei’inave Mose erau voa kurunave, Nai koreli’ina, varuvaru li’ina ane.

²² Siona anu akapu ai noro anea’ane euna, Eloi rokoa anu pai’iri ai, aivara avaea aruru‐aruru ai,

²³ Airavaki inu purai ovara anu kaupukia mako ai, Ekalesia ai ane, oro ai ane omo nawi pani muku ai kikiriakeina, voa vevea Amua ai, U ane U a’a uriria anu Eloi rokona, opara anana a’a oro anana‐eiakeina omo avaea anu mako ai,

²⁴ Iesu ai ane, U ane nawawrea Kuruei‐voa anu Amua U rokona, orekava aro ai ane, aro ane voa ima‐ima miki kuruna Abela anu aro a‐kurunakea.

²⁵ Noro oivirine noro lari?-?li’inavaia Una voa viriai, U ane u kurunaimakina. Eni a’a kavani mere area‐enavakape enava’ane oro lariliaka’ane Una voa viriai u pani va’au ai kurunave, enei area‐enavapea enei ane enei keporo namau li’ina Una voa eiai, U ane pani muku mere U kuruna.

²⁶ Eni pani Una voa pani va’au oioili’inave: a eai Una maura‐voa enei mi’ina, Pani monou e pani va’au, pani muku ane, Nai moawku oioiliakana.

²⁷ Ei voa, Pani monou e, ipawkina oioi inu awku lai?-?ekavakeiakana, awku ane oro eiakeina, awku ane oro oioiliakeiai liapea, oro keiakana.

²⁸ Ei uku eiai uku enei mimakina amua eiei oioiliakeiai liapea, kopai enei umuli’inamaki, lai iaa, lai avioia ane, enei Eloi avioinamaki.

²⁹ Uku ene Eloi awku ruawkava iau rokona.