Heberu 10 - Kuruei Voa Nawawrea 1920

¹ Kopai awku ane oro aneliviai anelia Vupu omo avaea e ipawkina, awku unu aipo miki Vupu ipawkiapea, i epie‐pei oro ekuoko aumeia, aumeia mo, ururua miki namea mere omoro a’a ekuai liapea oro ane oro arekamu ai anena.

² Epie‐pei awkuai opara oailiakeiapeana, uku avioia a’a anu lai namea anu paua mu’u miape, uku pani monou omo namea namokiakeiaka pani uriria eiai?

³ A Vupu unu epie‐pei awkuai opara namea laikora?-?ekiakeina aumeia kavakava anu pani ai.

⁴ Uku bovi‐vaki inu aro, nani inu aro ane, namea iou‐miai liapea.

⁵ Ou uku eiai, U ane U pani va’au ai anea’ane U erau voa kuruna, Epie‐pei, la’aruku ane, Ni umuliape, A kape Nai eiai Ni evere’eane euna.

⁶ Imunu evea epie‐pei, namea anu la’aruku ane, eiai Ni kopailiape.

⁷ Nai erau voa kurunave, Nai anea’ane euna, Ni lai kamaialiai Eloi e. (Buka laru ai ei voa kikiriakeina Nai eiai.)

⁸ Ei voa Nai kuruane euna, Epie‐pei, la’aruku ane, imunu evea epie‐pei ane, namea anu la’aruku ane, Ni umuliape, oro eiai Ni kopailiape, uku oro uriria ekuakeia’ane euna Vupu kamaialiai,

⁹ Ei voa awku U kurunave, Nai anea’ane euna, Ni lai kamaialiai. U pinai vaki pauena U ika vaki la‐okava’ane‐iai.

¹⁰ I kurua iaa lai namea mere enei ururuaiakeia’ane euna, i Iesu Keriso mere ane U ane pani monou ene epie‐pei U awkuakei’inave pani uriria eiai.

¹¹ Omoro a’a kavakava lare kavakava oimakina, epie‐pei ekumakina ane, kurua opara namea mere ururuaiai liapea,

¹² A ei Omoro a’a U epie‐pei monou awkuaka’ane opai keiakana eiai, Eloi inu eve miki mekai U pa’anave,

¹³ I‐aioiaka‐pokoimakina anea’anea Una mani, are pakara orau, awkoni ekava?-?keia’ane Una are arau ai.

¹⁴ Uku i epie‐pei monou U anana‐eiane euna opai keiakana eiai, oro ane oro U namea mere ururuemakina.

¹⁵ Uku Avaea Iaa awku Una ione voa akuna; uku U erau voa kuruaka’ane,

¹⁶ Kuruei‐voa eire oro kiripai Nai kuruakana, kurua lare periane, Amua kuruna: Na vupu omo‐umu upa mere Nai aiakana, Na vupu omo lai upa mere Nai kikiriakana ane.

¹⁷ Ei voa ane U kuruna, Omo namea, omo kaika opara ane, Nai laikora‐ikiapea.

¹⁸ Namea ane oro paue’emiakeina, uku eria uakeina epie‐pei awkuai namea eiai.

¹⁹ Ovaki airavaki e, uku enei iviri mi’ina Iaa ravi‐awru ikiriai i Iesu unu aro mere,

²⁰ I nawawrea kapea, opai rokoa kapea ane, U auane euna enei eiai Una kape enu nane koravakeiaka’ane,

²¹ Uku enei Omoro Amua‐mai mi’ina, U Eloi inu marea amua‐awkana ane,

²² Opara miki, iviri pirimaroakoa ane, arekamu ai enei anenamaki, lai namea mere ene umu ururueakeia’?-?ane euna, ere urupu ene kape ere kikiriakeia’ane euna ane.

²³ Pirimaroakoa enei iki e’ena enei iviri a’akinamaki, uku U miki‐rokona U ane maura‐voa U akunave.

²⁴ Enei laikora‐akinamaki enei pai’aka’ane‐iai aroa umu, opara anana ane, miai;

²⁵ Omoro marea ai kaupukiai enei lari pa liai, a’a varomo orau lioko lioko, iviri‐aimakina, orau limakina uku noro inamu‐oiai li’ina Keriso onu lare arekamu ai ei‐anemakina.

²⁶ Voa miki inu lai pamea iki enei miane namealiai enei ie’eane, epie‐pei mo eria uakeina namea eiai.

²⁷ Mua anu kore e uakeina voa vevea eiai, iara iau ane voa miki inu mani e‐avakana.

²⁸ I a’a rere naea, a’a rere kaiane naea, anu ione voa, a’a avakeina, a’a ane Mose enu Vupu u larili’ina: umu eria uakeina u eiai.

²⁹ Oi kavani‐mai ana, noro amalaikora’i, a’a miakana, u ane Eloi inu Mere u are oiniane euna, kurua Kuruei‐voa anu aro ane namea mere ururunave iaa aro orau u avioiape, Avaea ane u lari‐awkava’ane euna, kurua Avaea ane U mere la’aruku anena?

³⁰ U ane U erau voa kuruane euna enei ipa‐ulauna, Ipu‐mia Na awku keina: Nai kavani awkuakana; ei voa ane, Amua Una a’a aruru unu voa vevea amua keiakana.

³¹ Lipi‐lipi miki Eloi opai rokoa anu eve ai aravai.

³² Eni pani laikora‐nakine, noro pinai pamea‐nai?-?akei’inave’ane, apaki ovara, kukunu aila ane, noro mi’inave.

³³ Uku pinai i anara voa, i kukunu ane, noro la‐naka?-?vakeiai noro evere’einave oro inamu‐ekinakavai; uku mo ane uku noro paku ai anenave omo kukunu aua‐miai, oro ane oro orau mani‐ekavakei’inave.

³⁴ Uku noro umu ipawkinave kipura piria a’a eiai, nomo aruku ane noro mere iou‐miakei’inave’ane noro kopaili’inave, uku noro ipali’inave kapoi noro laru ai awku ima miki noro mi’ina, awku ane uakeiakana.

³⁵ Nomo iviri araea’araea noro mere pa kaiai, uku kurua araea’araea kavani ovara miakana.

³⁶ Uku lai kekepa noro oea‐rokona, uku Eloi inu lai noro kamaialiane euna, maura‐voa anu kopai noro miane‐iai.

³⁷ Uku pani mau’u e, U ane U aneliviai anelia, U aneakana, U eria pokoiapea,

³⁸ I pirimaroakoa Na opara anana a’a rokoakana: u kore‐kakau vairuane, Na imunu kopai eria miakana u eiai.

³⁹ A enei kore‐kakau vairua a’a peo, oro ane oro e‐avakeina, a enei pirimaroakoa kaupu unu a’a, oro ane omo imunu oro eivirina.