2 Petero 3 - Kuruei Voa Nawawrea 1920

¹ Ei revareva nai eai kikirinaimakina, naumuki e, na revareva rere vaki eire. Revareva orere laru ai nomo parea lai laru ai voa varomo evoiai nai ipia‐miane euna,

² Voa ane i iaa laikorava a’a kurueakei’inave eni pani ai, ene Amua, Iawka ane, enu vupu voa i Iva a’a nakuakei’inave.

³ A pinai ei voa pa aikavai, ika lare pani ai a’a aneakana, keke anara voa a’a, a’a ane i omo i’ima e oro amua‐ekavakeina,

⁴ Erau voa veve’emakeia?-?kana, Una vairua anu maura‐voa ekeiana? Ene a’e mai ane enu imua pani mere awku uriria uakeina orau oro uakei’inave pani va’au unu ea pani mere.

⁵ Oro auoina oro ipapea eni pani ai pani muku uakei’inave, pani va’au ane, i Eloi inu voa pani va’au ere mere inanave, ere ai va’au aparemakei’inave ane;

⁶ I ei ere eni pani va’au a’a avikiakei’inave, e‐avakei’inave ane.

⁷ A eai pani muku, pani va’au ane, i Eloi eiviriakeina iau eiai voa vevea lare ai, oava eiai awku namealia a’a eiai.

⁸ Naumuki e, ei voa monou noro pa aikavai. Amua anu lai laru ai lare monou, aumeia 1,000, mikirina, aumeia 1,000 ane lare monou mikirina.

⁹ A’a varomo onu lai uku voa, akere enu miki eiai, Amua akere apea Una maura‐voa evere’eiai. U lai kekepa keina enei eiai, uku U umuli’ina a’a kapeo oavakeiai, a a’a uriria lai urukiane‐iai.

¹⁰ Amua anu lare avapu a’a orau aneakana, lare ane kaia rawre ovara enakiakana, i vero‐ava iva rawpu e‐avakeiakana, pani va’au, a’a anu evepawki ane, i iau ru’ekavakeiakana.

¹¹ Uku ei awku uriria oava eiai evere’eiakeina, noro oiama‐mikirimau iaa voa uriria eiai, iaa opara ane.

¹² Iviri araea’araea‐lima?-?keiakana Eloi inu anea lare ai, i kurua lare kaia iau‐ru’?-?ekavakeiakana, e‐avakeiakana ane, rawpu ane evo?-?koakana uku iva anu iara eiai?

¹³ A uku Una maura‐voa eiai kaia nawawrea, pani va’au nawawrea ane, eiai enei aieiaka‐pokoina, orere ai opara anana keiakana.

¹⁴ Ou uku eiai, naumuki e, uku ei awku eiai noro aieiaka‐pokoina, oivirine noro airu auinaiakeia’ane‐iai Una paku ai, upu eria, ailiea eria noro keia’ane‐iai.

¹⁵ Panipani ai ene Amua anu lai kekepa, iawka orau, avioine, orau ene naumuki aroa a’a Paulo kikirinaiane euna i lai evera awkuakei’inave.

¹⁶ Una revareva uriria ai u orau kurunave, u ei awku eiai kurumakeia’ane. Una revareva ai voa varomo kikiriakeina omo miki ipaliai iaki kane keina, ei voa ane lai kukia a’a, pauapaua a’a ane, iakari‐eina, orau Iaa revareva voa e oro iakari‐eina omo oava eiai.

¹⁷ Noro naumuki e, uku ei awku noro ipanakiakeia’ane euna, noro panipani ai naiviriai limakina i namea a’a anu ewaea voa noro pawru naravakeinavaia, nomo iviri mere noro aranavaia.

¹⁸ Ene Amua, Iawka ane, Iesu Keriso onu la’aruku, lai pamea ai ane, panipani ai noro la’ane. Avioia uriria awkunamoki, eai, opai keiakana ane, Amene.