2 Petero 1 - Kuruei Voa Nawawrea 1920

¹ Simona Petero, Iesu Keriso onu aivara a’a, Iva a’a ane, ei revareva kikirina oro eiai, oro ane pirimaroakoa miki oro ekuakeia’ane euna, pirimaroakoa ane i ene Eloi, ene Iawka Iesu Keriso ane, mere enei mi’ina.

² La’aruku, airu ane, nakuakeinameki i lai pamea iki Eloi eiai, Iesu ene Amua eiai ane,

³ Uku Una iaa iva akuane euna awku uriria uku rokoa eiai, iaa opara eiai ane, i ene lai pamea U eiai, U ane i Una evao’evao anana opara U laea‐alauane euna.

⁴ I ei awku mere Una ima maura‐voa re U akuane euna, uku Eloi inu lai noro aua‐miane‐iai, noro pani va’au unu pomoa mere area‐enava’ane euna, pomoa ane i i’ima rokona.

⁵ A uku ei awku eiai ane iviri nomo pirimaroakoa kiripai akone, opara ima awku ipawkine, opara ima kiripai lai pamea ane akone;

⁶ Lai pamea kiripai lai ipi’ipia akone; lai ipi’ipia kiripai lai kekepa akone; lai kekepa kiripai iaa opara akone;

⁷ Iaa opara kiripai aroa umu akone; aroa umu kiripai umu iki akone.

⁸ Ei awku noro laru ai rokoane, lalava’ane ane, oro painakana lai pamea iki miai ene Amua Iesu Keriso eiai, noro eria pokoia a’a peo, kono a’a peo.

⁹ Uku a’a ane u ei awku miape u inamu‐apua a’a, awku amai ai u inamu‐eiai liapea, u aikava’ane euna una eni namea mere u urupu?-?eakeia’ane euna.

¹⁰ Ei uku eiai, aroa a’a e, ivirili’ine noro ipaliane‐iai Eloi laea‐nalauane euane, ienaiane euane ane; panipani ai ei awku noro liane noro leuapea kapoi.

¹¹ Uku iva veruku nakuakeiakana ene Amua, Iawka ane, Iesu Keriso onu opai eiei ikiriai.

¹² Ei uku eiai uku painakavai ei awku laikora‐nakiai panipani ai nai naiviriakana, noro ipa‐elauna kapoi, noro iviri pirimaroakoa a’a rokona ane.

¹³ A nai laikorana opara anana painakavai na pokoia pani ei kape laru ai, uku ei awku noro aikanavaia;

¹⁴ Uku nai ipali’ina pani arekamu ai anemakina na kape nai au‐awkavai limakina, orau ene Amua Iesu Keriso ipaikiane euna.

¹⁵ Ou uku eiai panipani ai ei awku laikora‐nakiai painakavai nai ipia‐miakana.

¹⁶ Ene Amua Iesu Keriso onu iva, anea ane, enei ipanakiane, ewaea vinako voa enei a‐e’e’ekanavea, Una amua‐iva anu inamu‐ione a’a enei keiaka.

¹⁷ Avioia, evao’evao ane, Eloi Mai mere U mi’ina, evao’evao re mere ei voa erau voa kuruakei’inave, Na naumuki Mere eire, U eiai Nai kopaili’ina.

¹⁸ Ei voa enei virinave pani muku mere anenave, enei U kiripai kei’inave’ane iaa akapu upa mere.

¹⁹ Voa miki kapoi enei mi’ina laikorava a’a anu revareva ai; voa ane viriai noro imali’ina, pamea orau muru ai akurulimakina, anea’anea pani mereane, kaurei ane nomo umu laru ai la’ane.

²⁰ Pa aikavai, laikorava voa eria Iaa revareva ai laikorava a’a anu lai e mere anea’ane euna,

²¹ Uku laikorava voa eria a’a anu lai e mere anenave, a a’a ane i Eloi ekaiviriakei’inave oro kurunave orau i Avaea Iaa oro ipekiakei’inave.