1 Timoteo 5 - Kuruei Voa Nawawrea 1920

¹ Mai‐vaki ni pa voakiai, mekai orau ni nanuku‐aw?-?kane, roropaea awku ni ovaki airavaki orau ni nanuku‐ekane;

² Airamere a’ero mei orau ni nanuku‐ekane, a’ero kokoro aro a’ero orau voa urupu ni nanuku‐ekane.

³ A’ero kepea oro oea‐rokona kapoi ni avieine.

⁴ A’e kepea ukua mere e?-?miane naea, auvi ukua mere e‐miane naea, oro pinai ipali’inameki iaa opara omo marea a’a ipekiai, omo a’e mai ane omo umu ipekiai ane; uku ei opara ima keina Eloi inu paku ai.

⁵ A’e kepea ane u oea‐rokona kapoi, paioka a’a u miape, u epuri pokoina ane, u Eloi pirimaroakona, nawki‐awkana ane, kipere pani ai, lare pani ai ane;

⁶ A a’e kepea ane u avu’avu lupa umuli’ina una rokoa pani ai u imua keina.

⁷ Ei voa anu miki ipekine oro opara anana liane‐iai, makiri mi’inavaia ane.

⁸ A’a una a’a pai’ekavape liane, oro ane oro una marea a’a, pirimaroakoa anu ipawkia voa u lariliane euna, lai unuku a’a anu namea ei a’a anu namea ipi’ipiapea.

⁹ A’e kepea anu kinia aumeia 60 aneape liane, ekalesia a’a anu nawi buka laru ai una nawi pa kikiriai. U a’e miki kei’inave una vaki monou e eiai,

¹⁰ Uru ima u upurukiakeina una ima opara eiai, ukua mere u eiviriane euna, kikoro a’a u kamaia‐ekava’ane euna, iaa a’a anu are u ere kikiane euna, oea‐rokoa a’a u pai’ekava’ane euna, opara ima kavakava u liane euna.

¹¹ Kokoro a’ero kepea anu nawi ekalesia buka laru ai pa kikiriai; oro lariliane uku Keriso onu kau eiai vaki mo aminavai oro umuliakana,

¹² Oro mua‐ekavakeina uku omo pinai pirimaroakoa oro kaiane euna.

¹³ Oro eapa evere’ena, marea mere marea ai oro enana, oro eapa e peo, oro omoro nouia a’ero ane, are varivu a’ero ane, voa awku vupuliakeina oro kuruna.

¹⁴ Ou uku eiai nai umuli’ina kokoro a’ero vaki aminavai, ukua mere kiniai, marea oiviriai ane, oro mani‐vaki uku awkunavaia anara voa kuruai.

¹⁵ Uku oro varomo pawru enava’ane euna Satani e’e’okavai.

¹⁶ Ekalesia vaki naea, a’e naea, a’e kepea e‐miane, orere pai’ekanameki, ekalesia ei iaki mi’inavaia; oro a’e kepea miki pai‐ekava’ane‐iai.

¹⁷ Mai‐oro ima amua‐awkana, avioia, kavani ane, ekunameki, oro ane omoro iaki, ipawkia iaki ane, oro limakina.

¹⁸ Uku Iaa Revareva erau voa kuruna, Bove kawni are?-?oinimakina, una ane purika pa piriai. Ei voa ane, Opara anana iaki a’a kavani awkuai una iaki eiai.

¹⁹ Avia voa mai‐vaki eiai pa viriai anea’anea ione a’a rere naea, ione a’a rere kaiane naea, avia voa anu miki ipawkiane.

²⁰ Namea‐lia a’a voakine a’a uriria paku ai a’a e kore miane‐iai.

²¹ Eloi inu paku ai, Amua Iesu Keriso paku ai ane, aivara‐avaea iaa anu paku ai ane, nai nikina na awkia voa kamaia‐ekavai, opara e e pa miai a’a e e eiai.

²² A’a epua pa aviri‐aw?-?kavai, a’a e enu namea pa aua‐miai, lai urupu nivirine.

²³ Ere e pa navai, uku ni nemo, ni maia ane pani aila ni mi’ina, iri uru unu ere mau’u ni nane.

²⁴ A’a varomo onu namea a’a anu paku ai ipekiakeina voa vevea eiai, a’a e enu namea e’e’ekana.

²⁵ Orau awku uku opara anana eiai, varomo paku ai ipekiakeina, opara anana e vauakavakeiai liapea opai keiakana.