1 Petero 4 - Kuruei Voa Nawawrea 1920

¹ Uku Keriso Una kape ai kukunu rokoaka‐miane euna, noro awku orau liai noro iviri‐naiai limakina, uku u ane kape ai kukunu rokoaka‐miane euna, uku namea eiai u oailiane euna,

² Uku nomo rokoa pani i Eloi inu lai noro amua?-?nakavakeia’ane‐iai nomo kape ai, i a’a anu kape i’ima peo.

³ Uku pani noro awkuane euna va’au keina opara limakina, opara ane lai unuku a’a li’ina, eve’eve opara, i’ima opara ane, awpa‐ailo opara ane, imunu avioia opara ane, noro lioko‐lioko.

⁴ Uku noro oro kiripai eai ei namea opara a‐li’inakea oro varua’ana, voa lipi kuruna ane noro eiai.

⁵ Oro kavani voa awkuai limakina Una paku ai, U ane U aioiaka‐oina rokoa a’a, imua a’a ane, voa veve’eiai.

⁶ Ei uku eiai Iva voa omoro kuruakei’inave a’a varomo eiai oro ane oro imuakei’inave, uku oro voa veve’eiakeia’ane‐iai, orau a’a uriria kape ai voa veve’eiakeiakana, oro avaea ai iaa opara rokoane‐iai.

⁷ A awku uriria anu peria pani arekamu ai keina: ou uku eiai lai kekepa, lai ipi’ipia ane, emi’ine, noro nawki?-?awkava’ane‐iai.

⁸ Awku uriria paku ai noro umu‐nakane, uku umu namea aila paueina.

⁹ Painakane peipei eiai, manipu pa liai.

¹⁰ La’aruku ane a’a emiane euna a’a monou monou eiai una la’aruku u aua‐miai limakina, Eloi inu la’aruku aila anu kava a’a orau.

¹¹ A’a omoro kuruane, u omoro kuruai limakina a’a orau Eloi inu voa miki kuruna; a’a paiokava’ane, u paiokavai limakina a’a orau u iva mi’ina Eloi mere; uku awku kavakava Eloi avioiane‐iai i Iesu Keriso onu nawi mere, U ane avioia, amua‐awkava ane, U mi’ina opai keiakana eiai. Amene.

¹² Naumuki a’a e, pa varuavai uku noro awkono avao ai mani inu vero‐ava iau anai rokoamakina uku ipia‐namiai, pa laikoravai kairi opara noro ai anea’ane euna.

¹³ Kopaili’ine uku noro Keriso onu kukunu aua‐mi’ina, uku noro kopai‐mai kopailiane‐iai Una evao’evao onu ipawkia pani ai.

¹⁴ Noro lari‐nakavakeia’?-?ane uku Keriso onu nawi noro mi’ina, noro kopai mi’ina: uku evao’evao onu Avaea, Eloi inu Avaea, noro upa mere keimakina.

¹⁵ Avé a’a orau naea, avapu a’a orau naea, namea?-?lia a’a orau naea, are varivu a’a orau naea, nomo a’a kapeo kukunu rokoaka‐miai limakina.

¹⁶ A’a kukunu rokoaka‐miane uku u Ekalesia a’a rokona, u makiri pa miai, uku u evere’eakeina Keriso onu nawi miai u Eloi avioinamoki.

¹⁷ Uku pani anea’ane euna voa vevea pinai‐liai, Eloi inu marea ai pinai‐liai ane enei pinai voa veve’?-?aiakeia’ane, oro oiamalimau, oro ane Eloi inu Iva voa oro larili’ina?

¹⁸ Awku kane keia’ane opara anana a’a iawkavai, iaa eria a’a, namealia a’a ane, oro oiamalimau?

¹⁹ Ou uku eiai oro ane uku Eloi inu lai oro kukunu rokoaka‐mimakina, omo imunu oro Eloi awkunameki opara ima eiai, U ane U Ea‐Uku miki‐rokona.