1 Petero 3 - Kuruei Voa Nawawrea 1920

¹ Orau a’ero e, nomo vakiro noro kamaia‐ekane, oro varomo Iva voa pirimaroakoape pirimaroakoane, i Iva voa peo, a i omo a’ero onu lare kavakava opara oro awkoni‐ekavakeia’ane‐iai;

² Oro inamu‐ekimakeia’?-?ane oro inamu‐oina nomo opara avioia, mua eria, evopoakeina.

³ Nomo vaupalia opara uku kape e noro pa evere’eai, kimari inu koaka, eiri ane, moni aru ane, a’a kape e e luki‐emimakina.

⁴ A nane nawawrea laru ai, iva’iva, airu avaea anu opai vaupa noro miai limakina, vaupa ane u ima miki rokona Eloi inu paku ai.

⁵ Uku eni pani ai iaa a’ero awku ei opara miaka, oro ane oro Eloi pirimaroakoanave, orau oro vaupa‐eka?-?nave, omo vakiro ane oro kamaia‐ekanave.

⁶ Orau Sara Aberahamo kamaia‐awkanave, amua oroinave ane. Opara anana noro liane, kore eria miane ane, Sara anu ukua‐paka noro evere’eane euna.

⁷ Vakiro e, nomo a’ero kiripai rokone, pa aikavai ane omo kape venea nomo kape venea ipi’ipiapea. A uku noro oro kiripai rokoa anu la’aruku unu airavaki rokona, noro avi’eine, uku nomo nawki einavaia.

⁸ Ika voa eire, noro uriria lai monou mi’ine, umu‐naka?-?makina, aroa a’a orau umu‐nakana, lai umu mi’ine, lai vaparia li’ine ane,

⁹ Namea kavani pa awkuai namea opara eiai, anakaia voa pa kuruai anakaia voa eiai; kopai kavani awkune, uku i Eloi noro laea?-?nakauakeia’ane euna kopai omoro‐roikiai.

¹⁰ Uku u ane rokoa mere kopai miai u umuli’ina, Kopai lare awku inamu‐eiai, Una anai u pirinamoki u namea voa kurunavaia, Una ane‐epo ane orere arauau voa kurunavaia;

¹¹ Namea mere u urukina?-?moki, opara ima li’inamoki ane; airu eiai u voa veve’enamoki, voronamoki ane.

¹² Uku Amua anu inamu orere opara ananalia a’a inamu‐ekina, una keporo orere auakeina omo nawki viriai; A Amua anu paku maroa keina namealia a’a eiai.

¹³ Noro iviri keia’ane opara ima liai, lipi koama?-?nalimau?

¹⁴ Opara anana eiai noro kukunu rokoaka‐miane, noro kopai rokona. Uku omo iara voa eiai noro kore pa miai, kukupuna pa liai.

¹⁵ Nomo umu laru ai Keriso, Amua orau, avioine, panipani ai kavani voa mi’ine a’a kavakava eiai, u ane u voa vevenaina uku kurua araea’araea noro oivirina.

¹⁶ Voa e kevakeva lai kekepa, keverekevere ane, kurune, nomo nane mua mere eivirine, noro onai‐na?-?kiakeia’ane, oro ane nomo Ekalesia opara ima oro onai?-?ekina, oro makiri‐ekavakeia?-?ane‐iai.

¹⁷ Eloi evere’eane noro kukunu rokoaka‐miai uku opara ima noro limakina, kukunu awku ima keina, noro kukunu rokoaka‐miane opara lipi eiai, kurua kukunu makiri mi’ina.

¹⁸ Uku Keriso awku pani monou imunave namea eiai, U ane U namea eria miaka namea a’a eiai U imunave, U are‐akava’ane‐iai Eloi ai. U i a’a avakei’inave, i Avaea U rokoa‐eakei’inave,

¹⁹ U avaea elenave, avaea oro epiriakei’inave kipura marea ai, Una Iva voa U omoro kuruenave ane;

²⁰ Oro ane eni pani ai oro lariliaka pani ane Eloi keverekevere aioiaka‐pokoimakei’inave anea’anea Noa mapea la‐okavaka’ane, mapea ane laru ai a’a 8 i’ekava?-?kei’inave pani va’au i ere aru oavakei’inave’ane.

²¹ Eni ere aru unu aipo mikirimakina bapatiso ere eai inakana (kape erekia opara peo uku kape enu upu namokiai, a lai ima anu umu Eloi eiai,) i Iesu Keriso onu la’ava imua mere:

²² U ane pani muku ai U inava’ane euna, Eloi inu eve miki mekai U pa’ana ane; aivara‐avaea, pani muku unu iva ane, kamaia‐awkavai oro eiakeina.