1 Korinito 9 - Kuruei Voa Nawawrea 1920

¹ Nai ururuakeia a’a peana? Nai Iva a’a peana? Iesu Keriso ene Amua nai inamu‐oiapeana? Amua laru ai noro na iaki inu a’a peana?

² A’a e eiai nai Iva a’a keiape keia’ane, a noro eiai nai Iva a’a kapoi: noro ekalesia kaupu rokona aipo ipawkina nai Iva a’a keina.

³ Orau nai pai’ikana a’a voa veve’i’iane.

⁴ Opara anana peana enei pei ekalesia a’a mere miai?

⁵ Opara anana peana enei ekalesia aro a’e aki‐oravai, orau Iva a’a e li’ina, Amua anu ovaki oro orau, Kepa ane, liaka?

⁶ Enere Banaba ane, enere e ana iva miapeana eve‐lia iaki aukiai?

⁷ Aiai koana una pei inaeali’ina apakinavai u enava’ane? A’a koana aura kinina aurapei u a‐na’anakea ane? A’a koana mamoe kaupu pei ekuna mamoe enu ame u a‐na’anakea?

⁸ A’a anu aipo voa nai kurumakei’i? Vupu awku orau kuruapeana?

⁹ Mose enu Vupu laru ai ei voa kikiriakeina, Bove kawni inu uru are‐oinima?-?keia’ane una ane pa piriai. Uku bove e Eloi ama‐laikora’i?

¹⁰ Enei eiai awku U erau voa kurumakei’i? Lia, enei eiai kapoi ei voa kikiriakeina: uku a’a ane u ka’e korava’ane, u ka’e korana u araea’araea liane‐iai; u kawni uru awane u awana u araea’araea liane‐iai; kawni uru aua‐miai.

¹¹ Avaea uru noro laru ai enei voeane euane, opara namea ana noro mere pani va’au unu aru enei roikiai?

¹² Ipawkia a’a e nomo aru aua‐mia a’a keia’ane, opara anana peana enei awku aua‐miane? A enei orau liape, awku uriria enei lai kekepa mi’ina Keriso onu Iva voa iaki enei einavaia.

¹³ Noro ipapeana a’a oro ane oro omoro marea anu iaa iaki li’ina, omo pei omoro marea mere oro mi’ina? Oro ane oro iaa pakara ai kamaia iaa pakara epie pei oro aua‐mi’ina?

¹⁴ Orau Amua Iva voa omoro a’a ekinave omo pei Iva voa mere miai.

¹⁵ A nai orau liape, ei voa nai a‐kikirinakea uku nai orau liane‐iai. Imuai nai kopai liakana na meramera voa a’a kape‐li’inavaia.

¹⁶ Iva voa nai omoro kurumakeia’ane, nai uku eria mi’ina meramera voa kuruai: Iva voa omoro kuruai nai i’inuakeina; nai mua a’a keina Iva voa nai omoro kuruape liane.

¹⁷ Ei iaki nai verukua liane na kavani nai mi’ina: nai verukua omoro kuruape liane; oaio, oiviria iaki ikuakeia’ane euna.

¹⁸ Na kavani oiana? Na kavani eire, Iva voa omoro kuruai, kavani eria miai ane, uku a’a kurunavaia nai Iva voa omoro kuruna kavani eiai.

¹⁹ Nai a’a uriria anu iva mere ururuiakeina, a’a uriria anu aivara nai evere’eane euna, a’a aila pirimaroakoai nai pai‐ekava’ane‐iai.

²⁰ Isaraela a’a orau nai evere’eane euna Isaraela a’a eiai, Isaraela a’a nai pai?-?ekava’ane‐iai; Vupu kamaia a’a orau nai evere’eane euna Vupu unu kamaia a’a pirimaroakoai nai pai‐ekava’ane‐iai;

²¹ Vupu eria a’a orau nai evere’enave Vupu eria a’a nai pai‐ekava’ane‐iai, (a nai Vupu eria a’a keiapea Eloi eiai, uku Keriso onu Vupu kamaia a’a nai rokona,)

²² Eapa a’a orau nai evere’eane euna eapa a’a pai‐ekavai. Nai awku uriria evere’eane euna a’a uriria eiai, i awku uriria naea a’a varomo nai iekava’ane‐iai.

²³ Awku kavakava nai li’ina Iva voa eiai, uku na viria a’a kiripai nai Iva voa aua‐miane‐iai.

²⁴ Noro ipapeana a’a ane oro a’epeaka’ana oro uriria a’epeaka’ana, a a’a monou e kavani mi’ina? Orau a’epe?-?akane noro kavani miane‐iai.

²⁵ A’epeaka a’a kavakava una kape oivirina uku peipei eiai. Oro orau li’ina pomoa kavani miane‐iai; a enei a’epeaka’ana opai kavani eiai.

²⁶ Nai orau a’epeaka’ana nai lai iakari peo uku na kapea eiai. Orau awku nai apakina’ana, pani nai a‐vaki?-?nakea.

²⁷ Na kape nai vaki’?-?awmi’ina, kamaia‐awkana ane: nai a’a e omoro kurueane, nai keke’e a’a evere’enavaia.