1 Korinito 7 - Kuruei Voa Nawawrea 1920

¹ Uku kurua voa eiai nomo revareva laru ai nai eai kikirimakina. Nai laikorana opara ima a’a lariliai a’e miai.

² A uku eve’eve opara uakeina, a’a kavakava una a’e mi’inamoki, a’e kavakava awku una vaki u mi’inamoki.

³ Vaki una a’e pai‐okanamoki: a’e awku una vaki pai‐okanamoki.

⁴ A’e una kape enu amua peo, una vaki una kape enu amua keina: vaki awku una kape enu amua peo, una a’e una kape enu amua keina.

⁵ Noro lari pa nakavai: norere orau liane pani mau’u uku Eloi nawki‐awkavai norere lai monou mi’inamoki; Satani ailinainavaia neko mere ai norere vaki, a’e ane, rokonamoki.

⁶ Ei voa kuruai nai evere’i’iakeina, nai ikiakeiapea.

⁷ Nai umuli’ina a’a uriria nai orau keia’ane‐iai. A a’a kavakava una la’aruku miki Eloi mere mi’ina. A’a monou una la’aruku u mi’ina, a’a e la’aruku e mi’ina.

⁸ Ou uku eiai nai erau voa kuruna uku vaki eria mia a’ero eiai, a’ero kepea eiai ane, Opara ima oro nai orau keia’ane.

⁹ Oro iviri keiape liane opara anana liai, oro vaki mi’inameki; uku vaki miai opara ima keina, i’ima‐liai ima keiapea.

¹⁰ Vaki‐a’e nai erau voa ekina, nai e apea, Amua ane, A’e una vaki pa ave’eai;

¹¹ Una vaki u ave’eane euane, vaki e u pa miai, ei voa naea, u, vaki ane, airu?-?einameki. Vaki awku una a’e pa laoiai.

¹² A uku a’a e nai erau voa kuruna, Amua apea: ekalesia a’a lai unuku a’e miane, a’e kopailiane una vaki kiripai pokoiai: vaki una a’e pa laoiai.

¹³ Ekalesia a’e ane u lai unuku vaki miane, vaki kopailiane una a’e kiripai pokoiai, a’e una vaki pa ave’eai.

¹⁴ Uku i a’e lai unuku vaki iaa‐eakeina, i vaki ane lai unuku a’e iaa‐eakeina: kurua voa miki keiape liane orere enu ukua rurupu keina, a oro Eloi inu a’a awkono avao ai mako mi’ina kapoi.

¹⁵ Lai unuku vaki naea, lai unuku a’e naea, ekalesia ave’eai umuliane, u ave’?-?enamoki. Aroa a’a naea, aro a’e naea, piriakeiapea. Airu pokoiai Eloi laea‐alauane euna.

¹⁶ Ni oiama‐ipali’i a’e e, ni vaki ni iawkavakana naea? Ni oiama‐ipali’i vaki e, ni a’e ni iawkavakana naea?

¹⁷ Orau a’a kavakava anu awku Amua evere’eane euna, orau awku u rokoamakei’inave Eloi laea‐ulauaka’ane, orau u rokonamoki. Ei opara liai nai ekalesia a’a uriria ekina.

¹⁸ A’a momoa eiakei’inave’ane u laea‐ulauakeiaka’ane, u keinamoki. A’a momoa a‐eiakei’inavea’?-?ane u laea‐ulauakeiaka’ane, u keinamoki.

¹⁹ Momoa‐eia opara eria keina, momoa‐eia eria opara awku eria keina. A Eloi inu Vupu kamaia‐ekavai awku kavakava keina.

²⁰ A’a kavakava keinamoki u keia’ane‐iai orau u keiaka u laea‐ulauakeiaka’ane.

²¹ Ni aivara a’a ana Eloi laea‐nilauaka’ane? Uku u ni aivara a’a kei’inave ni lai kukunu pa miai. Ururua anu kapea ni inamu‐oiane, ni ikirine.

²² Ekalesia a’a u aivara a’a kei’inave ane u laea‐ulauakeiaka’ane, u ururua a’a rokona Amua laru ai: orau ururua a’a u laea‐ulauakeia’ane, Keriso onu aivara a’a u evere’ena.

²³ I kavani ovara noro uriria inaea‐nalauakeia’ane euna; a’a anu aivara noro pa evere’eai.

²⁴ Ovaki airavaki e, aroa a’a kavakava i‐pokoinamoki Eloi kiripai orau u kei’inave u laea‐ulauakei’inave’ane.

²⁵ Uku paka‐a’e eiai nai voa eria mi’ina Amua mere: a na lai nai nakuna, a’a anu lai, una lai u ane u, i Amua anu umu mere, ima keina nomo pirimaroakoa eiai.

²⁶ Na lai eire, uku eai pani inu kukupuna eiai, opara ima a’a eiai u rokonamoki orau u eai rokona.

²⁷ Ni a’e piriakeina ana? A’e mere ururuakeiai pa ipia‐miai. Ni a’e miapeana? A’e miai ni pa ipia‐miai.

²⁸ Ni a’e miane euane, ni namealiape; paka‐a’e vaki miki miane, u namealiape. A oro kukupuna miakana. Kukupuna mere inakavai nai umuli’ina.

²⁹ A ei voa nai nakina, ovaki airavaki e, Pani uma‐eakeina: ou uku eiai oro a’e mi’ina oro rokonameki a’a orau a’e miape;

³⁰ Oro awku vikirina oro rokonameki orau oro vikiriape liane; oro awku kopaili’ina oro rokonameki orau oro kopailiape liane; oro awku inaeali’ina oro rokonameki orau oro aru miape liane;

³¹ Oro awku ei pani va’au evere’ena oro rokonameki orau oro pani va’au oavape liane: uku pani va’au unu eai opara perimakina.

³² Noro pani va’au kukupuna eria miai nai umuli’ina. A’a a’e eria mi’ina, Amua anu awku u eivirina, Amua kopai‐awkavai u umuli’ina ane.

³³ A vaki pani va’au unu awku eivirina, una a’e u kopai‐awkava’ane‐iai.

³⁴ Vaki‐mia a’e, vaki eria a’e ane, orere lai ipi’ipiapea. Vaki eria a’e Amua anu awku eivirina, uku kape, avaea ane, u iaa‐keia’ane‐iai; a vaki‐mia a’e pani va’au unu awku eivirina, una vaki u kopai‐awkava‐ane‐iai.

³⁵ Ei voa nai kuruna nomo paioka eiai; ekeni aiai noro eiai nai umu‐a‐li’inakea, a painakavai opara miki miai, noro lai iakari eria miane‐iai, noro Amua kamaia‐awkava’ane‐iai ane.

³⁶ Mekai laikora’ane pani miki anena una paka vaki miai, u evere’enamoki una paka vaki miai; u namea liapea.

³⁷ A mekai laikora’ane una paka u oiviriakana, u awkuapea vaki miai, u iva mi’ina, u opara anana li’ina ane.

³⁸ A’a una paka awkuna vaki miai u opara anana li’ina; u ane una paka awkuapea vaki miai, u awku opara anana li’ina.

³⁹ A’e una vaki piriakeina pani iki u rokona; una vaki imuane, a’e ururuakeina ekalesia a’a miai una vaki eiai.

⁴⁰ A na lai u a’e kepea keia’ane u kopai keina: nai laikorana Eloi inu Avaea nai mi’ina.