1 Korinito 6 - Kuruei Voa Nawawrea 1920

¹ Nomo a’a u ia’ia keia’ane nomo avai a’a anu namea eiai, iaa a’a anu voa vevea u inaka‐ama‐li’i, lai unuku voa vevea a’a anu paku ai amenai?

² Noro ipapeana iaa a’a pani va’au voa veve’eiakana? Noro pani va’au unu voa vevea a’a keia’ane, noro pauapaua ana namea mau’u voa veve’eai?

³ Noro ipapeana aivara avaea noro voa veve’eiakana? ei rokoa pani awku enei voa veve’eiakana kapoi.

⁴ Ei rokoa pani inu awku noro miane uku voa veve’eiai, a’a avioia eria mi’ina ekalesia laru ai noro ama‐are’ei’i voa vevenaiai?

⁵ Nai ei voa kuruna makiri‐nakavai. Ei voa miki ana, noro awkono avao ai lai evera a’a kapeo pokoina? A’a kapeo lai evera mi’ina una aroa a’a voa veve’eai?

⁶ Aroa a’a una aroa a’a voa veve’eai lai unuku a’a paku ai enana.

⁷ Oaio! Noro namea keina uku noro awkono avao ai noro voa vevenaina. Noro namea‐nakavakeia’ane, uku oiana noro lai kekepa keiapea? Noro ewaea‐nakava?-?keia’ane, uku oiana noro eiekavakeiapea?

⁸ Ai! noro namea‐li’ina, nomo aroa a’a noro ewaea‐ekana ane.

⁹ Noro ipapeana namea a’a Eloi inu eiei omoro roikiapea? Nomo lai ewaea pa ekavai: eiri eve’eve a’a peo, inunu avioia a’a peo, eve’eve a’a peo, kape namea‐lia a’a peo,

¹⁰ Avapu a’a peo, iawmia a’a peo, ere iara ailo a’a peo, anara voa a’a peo, voviri ewaea a’a peo, Eloi inu eiei omoro roikiakana.

¹¹ Orau nomo a’a varomo rokoakei’inave: a nomo upu kavakava namokiakeia’ane euna, noro iaa‐nakavakeina ane, i Amua Iesu unu nawi, i ene Eloi inu Avaea ane, noro mua mere anana‐naiakeina.

¹² Awku kavakava evere’eakeina nai eiai, a awku kavakava peo paioka mi’ina. A awku kavakava evere’eakeina nai eiai, a awku unu kamaia a’a nai evere’eapea.

¹³ Peipei uriria evere’eiakeina nemo eiai, nemo awku evere’eakeina pei eiai; a pei, nemo ane, Eloi pomoa?-?eiakana. Kape eiri eve’eve opara eiai peo. Kape Amua eiai rokona, Amua awku kape eiai rokona.

¹⁴ Orau Eloi i Una iva Amua imua mere la‐okanave, orau U la’akavakana.

¹⁵ Noro ipapeana nomo kape Keriso onu kape‐aru keina? Keriso onu kape?-?aru nai ama‐mimau kana a’e awkuai? Ai!

¹⁶ Noro ipapeana kurua vaki u kana a’e mi’ina, u, kana a’e ane, kape monou keina? Uku Eloi erau voa kuruna, Orere monou evere’eakana.

¹⁷ A u ane u Amua paikiakeina Amua kiripai u avaea monou keina.

¹⁸ Eve’eve opara larili’ine. Namea e a’a li’ina una kape iki ai keina; a kurua a’a u eve’eve li’ina una kape u namea‐awkana.

¹⁹ Noro ipapeana nomo kape Avaea Iaa anu iaa marea keina, U ane U noro laru ai rokona, kurua Avaea Eloi mere noro mi’ina?

²⁰ Nomo kape enu amua noro peo: i kavani noro inaea‐nakavakeia’ane euna; ou uku eiai nomo kape laru ai, avaea laru ai ane, noro Eloi avioine, uku orere Eloi inu keina.