1 Korinito 15 - Kuruei Voa Nawawrea 1920

¹ Ovaki airavaki e, kurua Iva voa nai kurunaina nai omoro kurunaiane euna, noro pirimaroakoane euna ane, kurua Iva voa upa mere noro oimakina ane;

² I kurua Iva voa noro inakavakeina ane, noro lai?-?kora‐nakiane kurua voa nai omoro kurunainave, nomo pirimaroakoa ane eria liape liane.

³ Uku pinai voa uriria nai miaka nai ipanakinave, iaa revareva anu voa eire, ene namea eiai Keriso imunave;

⁴ U i’iakei’inave, iaa revareva anu voa orau, lare rere kaiane enu lare ai imua mere U moawku la’anave:

⁵ I Kepa pinai, neko mere ai i aivara 12 ane, U inamu‐oiakei’inave:

⁶ Neko mere ai, pani monou i aroa a’a 500 U inamu‐oiakei’inave; kurua kaupu a’a aila eai rokoamakina, omo a’a varomo imuakeina.

⁷ Neko mere ai i Iakobo U inamu‐oiakei’inave; maura pani ai i Iva a’a uriria U inamu‐oiakei’inave.

⁸ A oro uriria anu ika a’a, ika kinia a’a orau, nai awku inamu‐oinave.

⁹ Iva a’a kaupu unu a’a nai Iva a’a mau’u keina, nai ima peo Iva a’a oroiakeiai, uku Eloi inu ekalesia a’a nai mani‐ekanave.

¹⁰ I Eloi inu la’aruku nai orau noro ipa‐ilauna: Una la’aruku ikuakei’inave kape evere’eape; oro uriria iaki liape orau nai iaki liane euna: a uku nai peo, a uku Eloi inu la’aruku nai kiripai iaki limakina.

¹¹ Oaio, nai naea, oro naea, iaki ovara liane euna, kurua Iva voa enei omoro kuruna, kurua Iva voa noro pirimaroakoanave ane.

¹² Keriso imua mere la’ane euna omoro kuruakeia’ane, uku oiana nomo a’a varomo kuruna imua mere la’ava eria keina?

¹³ Imua mere la’ava eria keia’ane, Keriso imua mere la’avape:

¹⁴ Keriso imua mere la’avape liane, ene omoro voa kape keina, nomo pirimaroakoa ane kape keina.

¹⁵ Lia, Eloi onai‐awkiai enei ipakiakeina, uku enei ioneliane euna Eloi Keriso imua mere la‐okanave: imua a’a imua mere la’avape liane Eloi Keriso imua mere la?-?okavape.

¹⁶ Imua a’a imua mere la’avape liane, Keriso awku la’avape.

¹⁷ Keriso la’avape liane, nomo pirimaroakoa kape keina, noro namea rokoamakina.

¹⁸ Oro awku imua anu awaw Keriso laru ai awaw?-?keia’ane euna oro periaeia keia’‐ane euna.

¹⁹ Ei rokoa pani e Keriso laru ai enei araea’araea miane, a’a uriria awkono avao ai enei kukupuna a’a miki keina.

²⁰ A imua mere Keriso la’ane euna kapoi, awaw?-?imua a’a mere la’avai U pinai a’a kei’inave.

²¹ Uku i a’a imua anenave, i a’a awku imua mere la’ava anena.

²² Uku orau Adamu laru ai a’a uriria imuna, orau awku Keriso laru ai a’a uriria rokoa‐eiakeiakana.

²³ A’a kavakava una kaupu kiripai: Keriso pinai; neko mere ai oro awku oro Keriso onu a’a keiakana Una anea pani ai.

²⁴ Maura pani ai, ika pani aneliviai anelia, kurua pani ai Amua anu iva U Eloi Mai awkuane, ei pani va’au unu amua iva uriria U enakava’?-?ane.

²⁵ Uku U amua‐awkavai limakina anea’anea Una mani uriria U awkoni‐ekava’ane.

²⁶ Ika mani oavakeiakana, u Imua oroiakeina.

²⁷ Uku awku uriria U awkoni‐ekava’ane euna. U erau voa kuruane, Awku uriria awkoni‐ekavakeina, kurua voa ipawkiakana U ane U awku uriria awkoni‐ekava’ane euna U awkoni?-?awkavakeiape.

²⁸ Awku uriria kamaia?-?ekavakeia’ane U eiai, Mere awku kamaia‐awkavakeia?-?kana Eloi eiai, U ane U pani va’au iki kamaia‐eane euna U eiai, uku Eloi awku uriria amua‐ekava’ane‐iai.

²⁹ Kurua voa miki peane, oro oiama‐limau oro bapatiso‐ekavakei’inave imua a’a eiai? Imua a’a imua mere la’avape liane uku oiana oro bapatiso‐ekavakei’inave omo imua a’a eiai?

³⁰ Uku oiana enei Iva a’a e’ei ai pokoi‐liviai?

³¹ Ovaki airavaki e, orau nai kopaili’ina noro eiai Keriso Iesu ene Amua laru ai, nai iki e’ena lare kavakava nai imuna.

³² Oiama‐pai’ika’i a’a orau lekuleku animala kiripai nai apakina’ane Epeso ai? Imua a’a imua mere la’avape liane, pei, ere ane, enei na’?-?anameki, uku namai enei imunavailia.

³³ Noro ewaea pa nakavai: avai monou a’a anu namea a’a anu opara ima oa’ana.

³⁴ Ei ailo opara mere lala’ane; opara anana rokone, namea pa liai; uku nomo a’a varomo oro Eloi a‐ipali’inakea; uku makiri‐nakavai nai erau voa kuruna.

³⁵ A nomo a’a varomo erau voa kuruakana, Imua a’a imua mere eka’ama‐la?-?eka’i? Oi kape ana oro anena?

³⁶ Avuavu vaki e, kurua uru ni voena rokoa miape u pinai imuape liane:

³⁷ Uru ni voena u kurua veve peo neko mere uru mere la’avakana, u uru e, kawni inu uru naea, pei e enu uru naea:

³⁸ A Eloi, orau U evere’eane euna, kurua uru U kape awkuna, uru monou‐monou una kape monou U awkuna.

³⁹ Oia uriria ipi’ipiapea: a’a anu oia, a’uri inu oia, nava anu oia, naku unu oia, oro monou‐monou oia e e keina.

⁴⁰ Kape varomo oro kaia kape, kape mo oro pani va’au kape; kaia kape enu evao’evao monou, pani va’au kape enu evao’evao e.

⁴¹ Lare una evao’evao mi’ina, ia awku una evao’evao e mi’ina, rawpu monou‐monou awku una evao’evao mi’ina, uku rawpu e e enu evao’evao keava‐keava keina.

⁴² Orau awku uku imua a’a anu la’ava imua mere. Kape pomoa voeakeina; imua mere pomoa eria u la‐okavakeina:

⁴³ U rurupu voeakeina; u avioia la‐okavakeina: u eapa voeakeina; u venea la‐okavakeina:

⁴⁴ A’a anu kape voeakeina; avaea kape la‐okavakeina. A’a kape uakeina, avaea kape awku uakeina.

⁴⁵ Ei uku eiai ei voa kikiriakeina, Pinai a’a Adamu rokoa imunu evere’eakei’inave; ika Adamu rokoa?-?awkua avaea evere’eakei’inave.

⁴⁶ A’a anu kape, avaea peo, pinai anenave; neko mere ai avaea anenave.

⁴⁷ A pinai a’a u ka’e mere, u ka’e vaki: a Amua U rere a’a keina U pani muku mere.

⁴⁸ Orau ka’e a’a kei’inave orau oro awku oro ka’e a’a keina oro, u ane, ipi’ipiakeina: pani muku a’a orau oro pani muku a’a keina oro, u ane, mikirina.

⁴⁹ Orau enei ka’e a’a anu aipo mi’ina, orau awku pani muku a’a anu aipo enei miakana.

⁵⁰ Ovaki airavaki e, nai erau voa kurunaina, Oia, aro ane, Eloi inu eiei omoro roikiai liapea; pomoa awku opai omoro roikiai liapea.

⁵¹ Akoi’i, uku eni vaua?-?vaua voa nai ipanakina; enei uriria imuapea, a enei uriria ae’aiakeiakana,

⁵² Emoki, inamu unu apuri-apuri orau, ika awvi inu laea pani ai: uku awvi laealiakana, imua a’a imua mere opai la‐ekavakeiakana, enei uriria ae’aiakeiakana ane.

⁵³ Uku ei pomoa kape opai luki‐awmiai limakina, ei imua kape opai luki‐awmiai limakina ane.

⁵⁴ Ei pomoa kape opai luki‐awmiane, ei imua kape ane opai luki‐awmiane, kurua pani ai ei kikiria voa evere’eakeiakana, I awkoni‐awkava opara Imua enakavakeina.

⁵⁵ Imua e, ni nepawki ekeiana? Lauoi e, ni awkoni‐awkava ekeiana?

⁵⁶ Namea imua anu nepawki ua‐rokona; namea anu iva Vupu mere anena.

⁵⁷ Eloi kopai‐awkane, i ene Amua Iesu Keriso mere awkoni‐awkava U akuna.

⁵⁸ Ou uku eiai na naumuki aroa a’a e, noro ivirili’ine, pa laikiai, Amua anu iaki panipani ai lioko lioko, uku noro ipalimakina nomo iaki Amua laru ai kono keiapea.