1 Ioane 3 - Kuruei Voa Nawawrea 1920

¹ Akoi’i, umu re Mai akuane euna, Eloi inu mere enei aroiakeina: Ei uku eiai pani va’au a‐ipa’alaunakea, uku oro ipa‐ulauape.

² Naumuki e, eai enei Eloi inu mere keina, a ene avai eiei iru pani ai ipawkiakeiape. Keriso moawku ereane enei ipali’inake enei mikiriakana, uku orau U rokona enei inamu‐oiakana.

³ A’a kavakava ane ei araea’araea u mi’ina U ai, u urupu‐ena u urupu keia’ane‐iai orau U urupu keina.

⁴ A’a kavakava ane u nameali’ina Vupu awku u nameali’ina; uku Vupu inakaliai, namealiai ane, orere ipi’ipiakeina.

⁵ Noro ipali’ina U erenave uku namea iou‐emiai; U laru ai namea eria keina.

⁶ A’a kavakava ane U laru ai u rokona u namea‐a‐li’inakea: a’a ane u nameali’ina u inamu‐oiape, ipa‐ulauape ane.

⁷ Mere e, a’a kapeo evere’enamoki ewaea‐nakavai. A’a ane u opara anana li’ina u opara anana a’a keina, orau U awku opara anana keina.

⁸ U ane u panipani ai namea anu mua mi’ina u Diabolo onu mere keina, uku pinai pani mere Diabolo namealia vaki keia’ane euna. Uku diabolo onu iaki oavai Eloi inu Mere anenave.

⁹ A’a ane u Eloi inu mere keina namea anu mua u panipani ai miape. Rokoa anu uru u laru ai rokona, uru anei Eloi awkuakeina, namealiai u liapea panipani ai, uku u Eloi inu mere keina.

¹⁰ Orau Eloi inu mere, diabolo onu mere ane, enei ipa’elauai li’ina: a’a ane u opara anana liape liane u Eloi inu mere peo, orau awku uku vaki ane una aroa a’a u umu‐a‐awkanakea.

¹¹ Uku Iva voa ane pinai pani mere noro viriane euna voa eire, Enei umu‐akavai limakina.

¹² Enei Kaino pa mikiriai, u ane u diabolo onu mere kei’inave, una ovaki u a’anave ane. Uku oiana u avaka? Uku una opara namea kei’inave, una ovaki inu opara anana kei’inave.

¹³ Pa varuavai, aroa a’a e, pani va’au vai’i‐nakava’ane.

¹⁴ Enei ipali’ina imua mere enei elemaneane euna, rokoa ikiriane euna ane, uku ene aroa a’a enei umu‐ekana. A’a kavakava ane u umu eria mi’ina una aroa a’a eiai u imuakeina.

¹⁵ A’a kavakava ane una aroa a’a u vai’i‐awkana u avé a’a keina; noro ipali’ina avé a’a kapeo opai rokoa mi’ina u laru ai.

¹⁶ Uku Keriso Una rokoa au‐awkava’ane euna enei eiai, umu unu miki enei ipali’ina; orau ene aroa a’a eiai ene rokoa enei au‐awkavai limakina.

¹⁷ A’a ane ei pani va’au unu peipei u miane, una aroa a’a oea‐rokona u inamu‐oina ane, umu eria mi’ina una aroa a’a eiai, u Eloi umu‐awkavai eka’amaliai li’i?

¹⁸ Mere e, umu unu voa e, ane‐epo onu voa ane, enei pa kuruai, umu unu eve?-?pawki, umu miki, enei ipeki?-?namaki.

¹⁹ Orau enei ipaliakana enei iviri‐rokona voa miki eiai, enei iviri‐akavakana ane Una paku ai,

²⁰ Awku eiai ene nane mua‐akana, uku ene nane mau’u keina, a Eloi ovara keina, awku uriria ane U ipali’ina.

²¹ Naumuki a’a e, ene umu mua‐akavape liane, pirimaroakoa miki enei mi’ina Eloi i;

²² Awku ane eiai enei nawki‐awkana U mere enei mi’ina, uku Una voa enei kamaiali’ina, opara ima ane Una paku ai enei li’ina.

²³ Una voa eire, Una Mere Iesu Keriso enei pirimaroakoai limakina, umu‐akavai limakina ane, orau U akiane euna.

²⁴ A’a ane Una voa u kamaiali’ina Eloi kiripai u rokona, Eloi ane u kiripai rokona; i Una Avaea U akuane euna enei ipaliai li’ina U enei kiripai rokona.