1 Ioane 2 - Kuruei Voa Nawawrea 1920

¹ Naumuki mere e, ei voa nai kikirinaimakina uku noro namea li’inavaia. A’a namea liane, Mai kiripai enei Paioka mi’ina, Iesu Keriso, U ane U opara anana rokona;

² U kekepea epie‐pei rokona ene namea eiai, uku ene namea e eiai peo, a pani va’au iki inu namea eiai awku.

³ Una Vupu enei kamaia‐ekava’ane orau enei ipali’ina enei ipa‐ulauna.

⁴ Ipa‐ulauai a’a iki e’eane, a Una Vupu u kamaia‐a‐ekanakea, u arauau vaki rokona, una umu laru ai voa miki mako eria mi’ina.

⁵ A a’a kavakava ane Una Iva voa u kamaiali’ina, u laru ai umu Eloi eiai anana evere’eakeia’ane euna kapoi: orau enei ipaliai li’ina enei Eloi ai rokona.

⁶ A’a ane u kuruna U ai u rokona, u rokoai limakina orau U rokoanave.

⁷ Aroa a’a e, vupu nawawrea peo nai eai nakumakina, eni vupu eire, vupu ane pinai pani mere noro miaka. Na voa anu miki eire, eni vupu, Iva voa ane, noro nai mere miane euna.

⁸ A vupu nawawrea nai nakumakina, uku orau ei voa keina U eiai, noro awku eiai: uku muru enamakina, pamea ane, pamea miki, akuruliai pinailimakina.

⁹ A’a ane u kuruna u pamea ai pokoina, una aroa a’a u vai’i‐awkana ane, u eai muru ai pokoina.

¹⁰ A’a ane una aroa a’a u umu‐awkana u pamea ai pokoina, una opara auawia eria aina a’a e enu kapea ai.

¹¹ A u ane una aroa a’a u vai’i‐awkana, muru ai u are‐rokona, una kapea u a‐ipali’inakea, uku muru una inamu apua‐eiane euna.

¹² Naumuki mere e, nai kikirinaimakina, uku nomo namea paue’emiakeina uku U eiai.

¹³ Mai‐oro e, nai kikirinaimakina uku noro ipa‐ulauna, U ane pinai pani mere U rokoane euna. Roropaea e, nai kikirinaimakina uku Namea Vaki noro awkoni‐awkava’ane euna.

¹⁴ Nai kikirinaiane euna, mere e, uku Mai noro ipa‐ulauna. Nai kikirinaiane euna, mai‐oro e, uku noro ipa‐ulauna U ane pinai pani mere U rokoane euna. Nai kikirinaiane euna, roropaea e, uku noro iviri‐rokona, Eloi inu Iva voa ane mako mi’ina nomo umu laru ai, Namea Vaki noro awkoni‐awkava’ane euna ane.

¹⁵ Pani va’au umu pa liai, awku ane pani va’au ai. A’a pani va’au umuliane, umu eria uakeina una umu laru ai uku Mai eiai.

¹⁶ Uku pani va’au unu awku, oia anu i’ima, inamu unu i’ima ane, kauakaua anu opara ane, oro Mai mere peo, a pani va’au mere oro anena.

¹⁷ Pani va’au, pani va’au unu i’ima ane, perimakina, a u ane u Eloi inu lai kamaiali’ina u rokona opai keiakana.

¹⁸ Naumuki mere e, ika pani anea’ane euna; orau noro viriane euna arauau‐keriso aneakana, orau arauau‐keriso aila ereane euna. Orau enei ipali’ina ika pani anea’ane euna.

¹⁹ Enei mere oro eleane euna, oro ane ene avai a’a miki oro akei’inavea; oro ene avai a’a keiaka livilia, enei kiripai oro pokoiaka. Oro ave’ainave uku ipawkiai iki e’ea pirimaroakoa a’a uriria oro ene avai a’a peo.

²⁰ I Avaea Iaa noro iaa?-?nakavakeia’ane euna, awku uriria noro ipali’ina ane.

²¹ Nai kikirinaiape uku voa miki noro ipapea, noro ipali’ina ane arauau awku eria voa miki mere anena.

²² Koama‐mikiri’i a’a ane u kuruna Iesu, U Keriso peo? U ane Mai, Mere ane, u inaka‐ekana u arauau‐keriso rokona.

²³ U ane u Mere inaka‐awkana, u Mai miape. A u ane Mere u iki e’ena, Mai awku u mi’ina.

²⁴ Ipawkia voa noro viriane euna pinai pani mere, kurua voa nomo umu laru ai la’avai noro evere’enamoki. Kurua ipawkia voa nomo umu laru ai la’ava’ane, Mere kiripai, Mai ane kiripai, noro paikiakeiakana.

²⁵ Maura‐voa eire U verukua akuane euna, rokoa opai keiakana.

²⁶ Nai orau kikirinaiane euna uku oro eiai, oro ane oro ewaea‐nakana.

²⁷ A uku noro iaa la’aruku ane noro miane euna U mere noro laru ai uakeina, uku eria uakeina a’a ipanakiai. A uku Una erekava ipanakina uku awku uriria eiai, voa miki keina ane, arauau peo, U kiripai noro paikiakeina, orau liai noro ipanakiakeia’ane euna.

²⁸ Eai namuki mere e, U kiripai rokoaka‐pokoine; U moawku ereane enei pirimaroakoa miki miane‐iai, enei makiri mi’inavaia Una paku ai Una anea pani ai.

²⁹ Uku noro ipali’ina U opara anana rokona, ipali’ine ane a’a ane u panipani ai opara anana li’ina Una mere u rokona.