Zefania 3 - Iaai Bible 1901 (New Caledonia)

¹ EKÖLÖ ge at ame ûkhin fuc me at ae ikiki, taun ame ovecâ!

² E ame ca long hofuc; e ame ca kap hna ûnö; e ame ca labageju bi kö Iehova; e ame ca hakekeny bi ka Khong.

³ Haba anyin je taben unyin, me helâ me je liona ame kuku; anyin bi tavat owisa, me helâ me je luko adre o hnyi sahac; adre me ca hna kolon bi hobi kâu nyi.

⁴ Tavat hop me iyawö anyin je perofeta: a hia but anyin tavat bihut okongoâ dok ae kap, adre hia but hanyâûâ hnanyibu.

⁵ At ae wisa Iehova hnyi wanben e; e ame ca he ka ânyâ hulö; e ame oâ hna owisa ka hnyi melam hnyi je hnyomakatu, e ame ca haû bi; ke haba at ae ca wisa bi, me ca khana bi hmehma.

⁶ Oge hia but subâ degecâ je hnyei, e ba but aten anyidra je tap tue; oge hia but ohnyeutâ dedra je gethen, me ba at ame vheno: adre kot anyidra je taun, e ba but at, ke ba but at ame labâ.

⁷ Haingök, ka habe, U ma he ka ot gak, me kap ju hna ûne; mʼ adre me ca he ka subâ degecâ hnyaban, hoton hnok hna otilâ hia gan: ke so bi adre me vesâ hnyi hnyomakatu kong me okongoâ anyidra ta je huliwa hia.

⁸ Anyin a wale halubahing nya ju, haingö Iehova, ke ne o but bong oge me he ka höhöi ka hnyi hna söh: anyin a mou but hnyekuk he ka ûkhacaköuâ je hnyei, mʼ oge me he ka ûkhacaköuâ je dökhu, he ka hingâlâ hudrin anyik hmonyin, wale anyik wathethot ame ubâhlâ; anyin adre me he ka thong degecâ hnyei hia ge meicin anyik ciâ.

⁹ Me oge me he bi ka wia ka hnyi hnyei hwen ae wisa, mʼ adre me he hia ka hawâ iö Iehova, me bi athnyabainy ge hnyok a khaca.

¹⁰ Ame he tavat adre me khöû könya, a hlu tavat adre oveseâ, ka hom ta je bwihlany könya, ûnyi hnyi hoton je wageweiny Aithiop.

¹¹ Hnyi bong eling u me ca he ka hmehman ta je hwakecâm hia waleji u je hanyâûâ gak: anyin a wale oge me he bi nya ka hom but gam hnyi bong eling tavat hop ke bi gan unyâm, ke u me ca he hmetu ka begö-rany hnyi anyik bucen ae kap.

¹² Ke oge me he ka ip hnyi wanbâm ta je hna ovecâ me theduoc, ke adre me he ka labageju ka iö Iehova.

¹³ Ke ame ca he je kolon! hnyi Isaraela ka ânyâ hulö me ha thoi; kʼ adre me ca he ka wâ hnyi je hnyimödra bohmen ae iyawö; anyin adre me he ka han me mokut, ke ba at ame he ka ooti ödra.

¹⁴ Hluiny Ziona lö, khumöng dö; Isaraela lö, kuku thö; hluiny Jerusalema lö, senyin dö ke hobâ ge hnyekom ae bekhöt.

¹⁵ A hia but Iehova hom hna owisa gam, e ame hia but ohia iwahnaihmiony möu: e bi hnyi wanbâm Iehova Tuhan Isaraela: u me ca he hmetu ka outen ûnyi ae kong.

¹⁶ Hnyi bong eling adre me he ka ha ka Jerusalema, ka habe, Ca ot bi: Ziona lö, e so ame ca he ka him bi li hnyamâm.

¹⁷ E bi hnyi wanbâm Iehova Khongom, at ae hwege, kʼ ame he bi ka omelö: e ame he ka senyin köu ke hobâ, e ame he ka laba wia hnyi anyin betenge, e ame he ka senyin gam ge khumöng.

¹⁸ Oge me he ka ûkhacaköuâ tavat adre me hlöuhlöu ge wedra ka hnyi ûkhacaköu ae ûnyi hnathu, tavat hanen em hnyei: wale ae hmak kâu hna haikongoâ.

¹⁹ Wâ bi, hnyi ûen eling oge me he ka mâdrʼ ödra hia tavat adre me oveci u: ke oge me he ka omelö at ame he ci, ke hlo at adre me obâ; ke oge me he ka wiʼ ödra hnân ogânâ me lung bi, wale adre me hmehma gadra hnyi hmeledrany hia.

²⁰ Ke hnyi ûen eling oge me he ka hum öbun, ke hnyi ûen eling oge me he ka ûkhacaköu öbun: ke oge me he ka wiʼ öbun mʼ adre me lung me ogânâ unyin ta je hnyei hia eang hmeledrany, iny ka he ka ohmetu öbun ûhebun hnyi hna bâ wale hnyi hnyimaköbun, haingö Iehova.