Zefania 2 - Iaai Bible 1901 (New Caledonia)

¹ HNYEI ame ca hmehma lö, ûkhacaköu thʼ öbun, eke, ûkhacaköu thö;

² e ka tiga ca oâ hna otilâ, e ka tiga ca he but bong helâ me thatûnyin hwit, e ka tiga ca o bi köbun hmonyin ae gan anyi Iehova, e ka tiga ca o bi köbun bong bonginy hmonyin anyi Iehova.

³ Elöm Iehova thʼ öbun hia tavat ae ilemuk hnyi hnyei, tavat adre ânyâ hnen hna owisa; elâm dö hwakecin ae wisa, elâm dö menyik: adre me ne he ka ikhölʼ öbun hnyi bonginy hmonyin anyi Iehova.

⁴ Anyin adre me he be ka hota degecâ Gaza, ke ame he ka ba wan Asekelona: adre me he ka obâ Asedoda hnyi jebigo, kʼ adre me he ka oc Ekerona me iwân.

⁵ Ekölö ge tavat adre me labâ hobat köiö, wale hneyi iny at Kerethi! e ve e möbun hofuc ho Iehova, Kanana, hnyei iny at Filisiti; oge me he ka ohiö u me me ba at ame he ka labâ.

⁶ Ke haba hobat köiö, me ame he ka hu je uma umen tavat tuö mamoe hnyin, ke ta je hnyeuleny je hnahat mamoe.

⁷ Ke haba hobat köiö, me ame he ka hnân hobi kâu je kolon lap anyi Juda; kʼ adre me he ka han haledrin ta je hnahat mamoe eling: kʼ adre me he lû mokulec je uma umo Asekelona hnyi sahac; anyin ame he Iehova Khongudrin ka senʼ ödrin, me ohmetu ödrin ûhedrin hnyi hna bâ.

⁸ Oge hia but long hna haikongoâ hnö Moaba, ke hna û hnen lakon Amona, waleji tavat adre me haikongoâ lakeik, kʼ adre me bi gan hnyi je hnyigöulödra.

⁹ Anyin a wale, haingö Iehova tuhan sabaoth, Khongu Isaraela, ka habe, Kia inya inya a gʼ ame he Moaba ka ûcû me Sodoma, kʼ ame he lakon Amona ka ûcû me Gomora, a iny jut vhat, ke thopiny sâlt, ke ba wan nyiele balua: kʼ ame he je kolon lakeik ka sei ödra, ke ame he je kolon hnyi ik hnyei ka hwöhwabödra.

¹⁰ Adre me he ka hu e can anyidra bi gan, anyin adre hia but haikongoâ me bi gan ka lakei Iehova tuhan sabaoth.

¹¹ Ke ame he Iehova ka ooti ödra: anyin a e ame he ka ohia tilâ je khong khongon hmeledrany hia; me ame he tavat ka khudrung kâu, ke at me ke at hnyi je ve hnödra, wale ta je bomeneiny ta ogo hnyei hia.

¹² Ke haba öbun, at Aithiop lö, me adre me he ka hlingʼ öbun ge anyik hele vat.

¹³ Ke e ame he ka hai hnyamen ka hnyi ke keihen ka hnyi hwadro, me ohia Asuria; ke e ame he ka öba wan Nineve, me me hwahwacit helâ me hnyebuba.

¹⁴ Ke ame he je hnahat meno ka mokut hnyi wanben e, a omenoiny ta je hnyei hia: ame he kati me kifoda ka mokut hnyi ban je hmolominy: kʼ adre me he ka cûk hnyi je mamalama; ke ba at hnyi je hwanuma: anyin a e ame he ka hom singiny ûnyi hnyi hon hna huliwan arasi.

¹⁵ Walang taun waleji ame senyin me laba wia, at ame ha eû hnyi hnyekon ka habe, Inya thibi, ke ba hmetu ke at: Ekölö, e ba but wan e, hnân mokut hnen je meno ae hiny! ame he tavat adre me he unyin ka jû, me nyinyikâ ban.