Zakaria 8 - Iaai Bible 1901 (New Caledonia)

¹ KE ame o könya hofuc ho Iehova, ame ha, ka habe,

² Walang hna ha hnö Iehova tuhan sabaoth, ka habe, Oge me ciâ Ziona, ke gan hmâ hna ciâ, ke oge me ciâ e hnyi hmonyin ae gan.

³ Walang hna ha hnö Iehova, ka habe, Oge me laba hmetu hnyi Ziona, ke oge me he ka laba hnyi wanben Jerusalema: ke adre me he ka hwenyi ien Jerusalema, me Taun ae hnathu; kʼ adre me he ka hwenyi ien bucen anyi Iehova tuhan sabaoth, ka habe, Bucen ae kap.

⁴ Walang hna ha hnö Iehova tuhan sabaoth, ka habe; Ame he bi wahingat me wasomaca ka laba hnyi ta je getheniny Jerusalema, kʼ adre me he ka ve he me uci, hoton ûhingatidra bi.

⁵ Ke ame he ka unöngöt je getheniny taun ge wainda me waindusem hnyat adre me walak eû hnyi ta je gethen.

⁶ Walang hna ha hnö Iehova tuhan sabaoth, ka habe, Ame ne hnân lâiâ ka je kolon tavat ang hnyi je bong eling, hawa e ca ûcû könya he ka hnyi lâiâ? haingö Iehova tuhan sabaoth.

⁷ Walang hna ha hnö Iehova tuhan sabaoth, ka habe, Wâ bi, oge me he ka omelö lakeik ûnyi hnyi hnyei e deiö, ke hnyei e jio:

⁸ ke oge me he ka hum ödra, mʼ adre me he ka laba hnyi wanben Jerusalema; ke adre me he ka lakeik, ke oge me he ka Khongudrin hnyi hnathu me hwakecin ae wisa.

⁹ Walang hna ha hnö Iehova tuhan sabaoth, ka habe, Ohwegiâ thö je hnyamöbun, tavat öbun e long hnyi bong ang hofuc ang a deny je perofeta a ödra hnyi bong adre bi taben hnyin uma umo Iehova tuhan sabaoth, wale uma kap, mʼadre me he ka op e.

¹⁰ Anyin ae tiga ca o je bong eling, adre me ca bi hwaban ka tavat, me hobi kâu je meno; ke ba hnahic ka at ame didrut me didro can iwahnaihmiony: anyin oge me ve kunâ tavat hia he ka ûiwahnai-hmiönyköu.

¹¹ Ke walang ang, oge me ca he ka helâ hnyi je bong a bân ka je kolon tavat ang, haingö Iehova tuhan sabaoth.

¹² Anyin ame he ka hu hatonginy ûsoköu; ame he vine ka wa, ke kânâ ame he ka oâ jeûiny, ke ame he drany ka ham dân hau; ke oge me he ka kunâ je kolon tavat ang ka hu ta je ûnyi hia eling.

¹³ Adre ohnaûhangʼ öbun lap anyi Juda, me lap anyi Isaraela unyin je hnyei, helâe oge me he ka omeli öbun, ke öbun e he ka hnahic: ca ot bi, owhigiâ thö je hnyamöbun.

¹⁴ Anyin a walang hna ha hnö Iehova tuhan sabaoth, ka habe, Oge ûnykûme he ka ânyâ ûnyi ae kong köbun, waleji ge hnen lakamöbun hna ohmönyini nya, haingö Iehova tuhan sabaoth, ke oge me ca ietra;

¹⁵ helâe oge me ûnykûme hmetu hnyi bong ang he ka ânyâ so ka Jerusalema, me ka lap anyi Juda: ca ot bi.

¹⁶ Walang ûnyi öbun e he ka ânyâ. Ûhaköuâ thö hnathu; owisa hnatho thö me hnahic hnyi je homa-göulebun:

¹⁷ ke ca he ke at unyibun he ka ûnykûme ûnyi ae kong hnyi je hnyekubun ka ke at; ke ca hnyok bi hna khemanyin thoi: anyin a hûkötiânök ta je ûnyi hia e, haingö Iehova.

¹⁸ Ke ame o but könya hofuc ho Iehova tuhan sabaoth, ka habe,

¹⁹ Walang hna ha hnö Iehova tuhan sabaoth, ka habe. Haba hna ânyâ ca han hnyi tehi a vakiny, me hna ânyâ ca han hnyi tehi a thabûnginy, me hna ânyâ ca han hnyi tehi a seveniny, me hna ânyâ ca han hnyi tehi a teniny, me ame he ka hnân senyin me hobâ ka lap anyi Juda, me bijeû ae so.

²⁰ Walang hna ha hnö Iehova tuhan sabaoth, ka habe, Ame he hmetu ka o tavat, ke aten ta je taun ae se hia:

²¹ kʼ ame he aten ke taun ka he ka aten ke taun bi me ha, ka habe, E so ate me he mweimwei me sumâtâ ibetengiö ga Iehova, me elöm Iehova tuhan sabaoth: ke oge me he ka hnyi he.

²² Eke, ame he ka o but tavat ae se hia ke ta je hnyei ae hwege he ka elöm Iehova tuhan sabaoth hnyi Jerusalema, me sumâtâ ibetengiö ga Iehova.

²³ Walang hna ha hnö Iehova tuhan sabaoth, ka habe, Hnyi je bong eling, me ame he hnyat a ten ka kât obiny ûkhaû anyin at Juda, walödrin hnyi ta je hwen hnyei hia, me ha, ka habe, Ohmun e he ka tha he möbun, anyin ae khanʼ ohmun dut a e unyibun Khong.