Zakaria 3 - Iaai Bible 1901 (New Caledonia)

¹ KE e ame omanenö Josua könya wale at bihut ae beönua, ame tot hnyi hnyimakan angela anyi Iehova, ke haba Satana ame tot hnyi ke keihen a metân he ka iwahnaihmiony më.

² Haba Iehova ame ha kö Satana, ka habe, Satana lö, e so e û u Iehova; eke, e so ame he Iehova at ame senyin ka Jerusalema ka û u: hawa, ca uthmeic bi ang adre oc ûnyi hnyin meic!

³ Ke haba Josua ame khavâ je ûkhaû ae kânâ, me tot hnyi hnyimakan angela.

⁴ Me e ame thu me ha ka tavat adre me tot hnyi hnyimakan, ka habe, Uny jut je ûkhaû ae kânâ gan. Ke haingen kâu ka habe, Wâ bi oge hia but ohia hwakecâm ae kong gam, ke oge me he bi ka okhaûo u ge je ûkhaû ae hmanenang.

⁵ Ke oge me ha, ka habe, E so adre me obicâ e ge hnabinybak ae so. Me adre me obicâ e ge hnabinybak ae so, me okhaûâ e ge je ûkhaû; ke haba angela anyi Iehova ame tot.

⁶ Haba angela anyi Iehova ame ha hwegiâ kö Josua, ka habe,

⁷ Walang hna ha hnö Iehova tuhan saboath, ka habe, U je ne he ka vheno dek je gethen, me tuö hnok je hna otilâ, me u me he ka owisa umök uma, me tuö je hnyeulek, ke oge me he ka ham köu dok he ka vheno unyin tavat adre me tot eû.

⁸ Josua at bihut ae nua lö, long ju walang ang, u me lahanâm tavat adre me tot hnyi hnyimâkâm; anyin a ödra tavat me hnân haten: anyin a wâ bi, oge me he ka oâ athnyabaik wale Khûen.

⁹ Anyin a wâ bi veto oge hia but ip hnyi hnyimakö Josua; seven je ecmak hnyi veto a khaca: wâ bi oge me he ka kave hna kave e, haingö Iehova tuhan sabaoth, ke oge me he ka ohia hulöiny hnyei eling hnyi bong a khaca.

¹⁰ Hnyi bong eling haingö Iehova tuhan sabaoth, öbun e he ka ve hawâ je lahanöbun ka hnyi hmelen je ivine, me hmelen je imeta.