Zakaria 13 - Iaai Bible 1901 (New Caledonia)

¹ HNYI bong eling adre me he ka oâ pupua ka lap anyi Davita me aten Jerusalema hobi kâu hulö me hwakecin ae ikiki.

² Ke hnyi bong eling haingö Iehova tuhan sabaoth, me oge me he ka ohia ta je ien je idola hnyi hnyei, mʼ adre me ca he hmetu ka ûnykûme ködrin: ke haba khaca oge me he ka obâ ta je perofeta me ta je hanu ae ikiki hnyi hnyei.

³ Ke ame ne perofeta hmetu ke at, ke ame ne ba kâu hnen kamen me hinyen, a li at ödre hnokoâ, ka habe, U me ca he ka möt; anyin a u me ha thoi hnyi iö Iehova: ke e ka perofeta, me ame he kamen me hinyen a li at ödre hnokoâ ka dâoâ e.

⁴ Ke hnyi ûen eling ame he ta je perofeta ka ve hmehma ge hnödra hna wâ, ödra ka perofeta; ke adre me ca he ka khavâ ûkhaû ae hu dinen he ka iyawö:

⁵ ke adre me he ka ve ha, ka habe, Iny ca perofeta bi nya, ke iny at belök bi; anyin adre me thalûö nya kʼ iny tiga wanakat.

⁶ Ke adre me he ka ha kâu, ka habe, Aat wanben li benyâm ahö? Me e ame he ka ha, ka habe, Wale hna kuc nya hnyi hnyaban je lahanök.

⁷ Hele vat lö, hmak dö ka at ame tuö mamoe könya, me ûcon at ae ûcû mönya, haingö Iehova tuhan sabaoth: kot dö at ame tuö mamoe, me ame he ka ve se but ta je mamoe; ke oge me he ka wia hnyamök ka tavat ae ûhnyûkong.

⁸ Ke haingö Iehova, ka habe, Haba hnyi hnyei hia, me adre me he ka subâ degecâ li ke keihen hnyin e mʼ adre me mokcu; ke ame he ka hnen biju hnyin e ke keihen a kuniny.

⁹ Ke oge me he ka hom ke keihen a kuniny ka he hnyi wanben meic, me ânyâwiʼ ödra helâ me hna ânyâwia sileva, me cubic ödra helâ me hna cubec gol: ke adre me he ka hawâ iök, me oge me he bi nya ka ling ödra: ke oge me he ka ha, ka habe, Lakeik ödra; me adre me he ka ha, ka habe, Iehova Khonguhmun.