Zakaria 11 - Iaai Bible 1901 (New Caledonia)

¹ LEBANONA lö, khong ut je homagouleny me me he meic ka thong degecâ ânyâm je arasi.

² Kop lö, kuku tenge thö, anyin a ta but arasi, kʼame kong ut je ûö ae hmanenang: je iwajoiny Basana lö, kuku tenge thö, anyin ae hnyikânâ but uhnyot ae hwege.

³ Wale ûkuku tengeiny tavat tuö mamoe! anyin ae kong ut anyidra hmanenang: ûkukuiny je nak liona! anyin ae kong ut hmanenanginy Joridano.

⁴ Walang hna ha hnö Iehova Khonguk, ka habe, Han ju hnahat mamoe hnân hlingâ;

⁵ haba tavat a haledra adre me hlingʼ ödra, kʼ adre ca ûnykûme a ka ödra kong can e; ke haba tavat adre me ûcû ödra, me adre me ha, ka habe, Ole kö Iehova anyin a iny tren dut omjeû: ke ame ca betenge gadrin je latuhödrin.

⁶ Anyin oge me ca he hmetu ka betenge ge tavat adre me labâ hnyei, haingö Iehova: ke wâ bi oge me he ka ve hna tavat ka hnyi hnyamen je lahanödra, ke ka hnyi hnyamen tuhan: me adre me he ka kot hnyei, ke oge me ca he ka omeli ödra ûnyi hnyi je hnyamödrin.

⁷ Waleling me oge me han hnahat mamoe hnân hlingâ, a ta je mamoe ae ti kong hnyi hnahat. Ke oge me hom li uci; haba khaca oge me hwenyi ien, me Hmanenang, ke oge me hwenyi ien khaca, me Je wen; ke oge me han hnahat mamoe.

⁸ Ke oge me subâ degecâ hnyat tuö mamoe a kun hnyi tehi a khaca; ke vec hnyekuk gadrin, kʼ ame hûkötiö nya ge ta je hnyekudrin.

⁹ Me haingök, ka habe, Oge me ca he bi nya ka ha ö ʼbun: haba at ame he bi ka mok, me ame ka e bi ka mok; ke haba at adre me he ka subâ degecâ, me adre me ka he bi ka subâ degecâ; ke haba kolon, me so ame he ka ve an vidrin hnen keihen.

¹⁰ Ke oge me hom anyik uci wale Hmanenang, me thu e, mʼ oge me he ka ohmetro ûhihinyköu, waleji oge me ânyâ me ta je hnyei hia.

¹¹ Ke ame hmetru thö hnyi bong eling: ke e khana but hnahat mamoe ae vec ut, tavat adre me tevehlöng könya a wale hofuc ho Iehova.

¹² Me haingök kodra, ka habe, A ne so köbun hö jem hwabök; ke a ne ba, hna ju. Me adre me tuluto hwabök a thote je sileva.

¹³ Ke Iehova ame ha könya, ka habe, Khûâ thö e ka at ame up kaia, wale hwaban adre me ha me hwabök. Me oge me hom je sileva a thote, me khûâ hnyi uma umo Iehova ka at ame up kaia.

¹⁴ Ke haba ke uci, me oge me thu e, wale Je wen, mʼ oge me he ka ohmetro hwakecin liamekeiny, a Juda me Isaraela.

¹⁵ Ke Iehova ame ha könya, ka habe, Hom dö hmetu je omjehen at ae monu a at tuö mamoe.

¹⁶ Anyin a wâ bi, oge me he ka oâ at ame tuö mamoe hnyi hnyei, at ame ca he ka senʼ ödra wale adre subâ degecâ, ke e ame ca he ka elâm je mamoe adre ve se but, me ometo je aat; ke e ame ca he ka han je mamoe ae hwege, ke e ame he ka an viny ae pipikhenya, me kia amemâ je boûjimödrin.

¹⁷ Ekölö ge at ame ca ti tuö mamoe, at ame hna degecâ hnahat mamoe! ame he hele vat ka ta hon benyin, ke emakan a metân: ame be ka meleca benyin, ke ti lit emakan a metân.