Tito 3 - Iaai Bible 1901 (New Caledonia)

¹ OÛNYKÛMI ödra a gʼ adre me he ka löng hoton ta je than, me tavat musi, me he ka ûling, me laba penapena ka hnyi ta je huliwa hia ae so,

² me ca he ka haikongoâ bi ke at, ke ca iwatretra bi, ke so bi he ka ilimuk, me omanenâ hia hwakecin ae menyik ka tavat hia.

³ Anyin a öta ta je monu ehac, me tavat ca ûling, me tavat adre iyawâ, me bi athnyabainy ta je weny ae kong, me ta je ûnyi hnân osenyinâ unyin a ve bongon bi, ate me laba hnyi hnyok ae kong me ihunyinköu, tavat hnân ikikiâ, me tavat adre me ûikikiköu.

⁴ Ke ame manen dut hwakecin ae betenge anyin Khong At ame omeli öta, me anyin ibetengiö ka tavat,

⁵ e ame omeli öta ca ûnyi hnyi ta je huliwa hnyi hwakecin ae wisa ate me ka ânyâ, ke ûnyi bi hnyi anyin ibetengiö baû, ûnyi ge hna hneû wale he ka hnokoâ hmetu me hna ohâtâ ge Hanu Kap,

⁶ waleji e ame hingâlâ gânâ köta ga Iesu Keriso At a omeli öta;

⁷ me me hwajekhöûta hoton gejon ka hnyi möt ame ca ba balua, anyin adre me haiwisʼ öta ûnyi ge anyin ibetengiö baû.

⁸ E hnathu hofuc e, ke e bewek u me he ka ha hwegiâ bala hofuc e, mʼ adre me hwege thö he ka ânyâ ta je huliwa ae so hnen tavat adre me labageju ka Khong. Wale ta je ûnyi ae so me hu troban ka tavat:

⁹ ke ûsâkâûö u but me ta je ivinö ae monu, me hna aû ta je dö, me iwatretra, me ivinö ge hnanyibu; anyin ae ba troban, me ûnyi baû bi e.

¹⁰ Obâ but at ame imouköu, hwaban hna okaca me olo nâ e;

¹¹ anyin ae khanö u a ga saû but at helâe, me ânyâ hulo, ke e ame ka hangâ e bi.

¹² Iny ka he ka kunö Aretama köu, ame ne Tukiko, hwege thö he ka ie o könya hnyi Nikopoli: anyin ae mou but hnyi hnyekuk a oge me he ka laba e hnyi huna ae megic.

¹³ E so u me he ka hadruâ he anyi Zena at ame ûnö hnanyibu, me Apolo, me me ca he ka hia gadru ke ûnyi.

¹⁴ E so e he minya tavat unyita he ka nâ ka ânyâ ta je huliwa ae so, me me hu ta je ûnyi ae ûnyi hnathu, wâ adre nye ca wa but.

¹⁵ Adre me italofa möu ödra hia a tha ödra mönya. Anyik talofa kodra adre me betenge gahmun hnyi labageju. E so e unyibun hia thithö ibetengiö baû.