Tito 2 - Iaai Bible 1901 (New Caledonia)

¹ KE hamâm he ka ha ta je ûnyi ae ûcû me hna ûne hnân melen:

² ka habe, hamen wahingat he ka hmâkâ, me hnyokâ wisa, me wâ wia, me hwege hnyi labageju, me ibetengiö, me hokhnyok.

³ Ke helâe minya wasohmeca, he ka hwakecin ae ûcû me Khong, ca tavat ûhaiö, ca tavat adre hom hwenbâ ge waina ae gan, ke so bi tavat ûnö ta je ûnyi ae so;

⁴ mʼ adre me he ka nâ wia omomo hmai he ka ve hnyokâ laöiödra, me hnyokâ lakudra,

⁵ me hnyokâ wisa, me kalaöt hnyekudra, me tavat huliwa hnyi hnyaba, me hwakecin ae betenge, me löng hoton laöiödra, e me ca he ke at ka haikongo bi hofuc hwan Khong:

⁶ helâe minya ge wahidröu sihwegi ödra he ka ûnykûme wia:

⁷ oma-menö u thö hnân tulutiny ta je huliwa ae so, hnyi ta je ûnyi hia; e so e manen bi hwakecin ae fâfâ hnyi hnâm hna ûne, me ûnykûme wia,

⁸ me hofuc ae metâ, ke ca khanʼ ödra he ka haikongu ödra; me me hmehma but at ame ûö bi ûnyi, anyin ae ba ke ûnyi ae monu hnân he ka hai öta.

⁹ Sihwegiâ thö ta je athnyaba he ka löng hoton latuhödra, me he ka osenyini ödra hnyi ta je ûnyi hia thithö; me ca thu hwan bi;

¹⁰ ke ca hwenenöu bi, ke so adre me omanenâ but hwakecin ae hnathu me so; mʼ adre me he ka ohmanenangâ hnyi ta je ûnyi hia thithö hna ûne anyin Khong At omeli öta.

¹¹ Anyin a manen dut ibetengiö baû anyin Khong, wale ame hom möt ka tavat hia thithö,

¹² ame nʼ öta, mʼ ate me he ha hociâ hwakecin ae ca ûcû me Khong, me ta je weny hmeledrany ae monu, ke ate me he bi ka labö ûnykûme wia, me ânyâ hwakecin ae wisa, me hwakecin ae ûcû me Khong hnyi möt ang;

¹³ me halubahingen geju ae hnahic, me he ka manen dut hmanenanginy Khonguta ae beönua me At omeli öta Iesu Keriso;

¹⁴ waleji at a hamen ham e hnân hobi köta, me me he ka ûcû öta ûnyi hnyi ta je hulo hia thithö, me ânyâwia hnân hobi kâu tavat hnân athnyabainy bi, hnyat ae hwege ka hnyi ta je huliwa ae so.

¹⁵ Ha thö ta je ûnyi eang me sihwege me nâ hnyi musi hia thithö. E so ame ca he ke at ka hûköti u.