Salamo 96 - Iaai Bible 1901 (New Caledonia)

¹ KHUMÖNGÖ thö kö Iehova khumöng a teb ûnyi: Hmeledrany hia thithö lö; khumöng dö kö Iehova.

² Khumöng dö kö Iehova, ogânâ thö ien; Omanenâ thö anyin ûhomeli hnyi ke bong me ke bong.

³ Aû gaga thö anyin hmanenang hnyi wanben aten ke je hnyei, Me anyin ta je huliwa hnân lâiâ hnyi wanben tavat hia.

⁴ Anyin ae gan hmâ Iehova, me hnân olungâ göranyai; E bi hnân outen hon ta je khong hia thithö.

⁵ Anyin a haba je khongon ta je hnyei hia thithö wale, a je hnatheat; Ke haba Iehova ame op ta je drany.

⁶ E bi hnyi hnyimakan hna ogânâ me hmanenanginy than: Eio hnyi umen uma ae kap tang hwege me hmanenang.

⁷ Öbun je döiny ta je hnyei lö, ham but kö Iehova, Ham but kö Iehova hmanenang me hwege.

⁸ Ham dö kö Iehova hmanenang ae ûcû ka hnyi ien: Hom dö hut, me hom dö ka hnyi je hnyeuleny.

⁹ Öbun na he ju ka khudrung kö Iehova hnyi hmanenang ae kap: Hmeledrany hia thithö lö, öbubuny ju hnyi hnyimakan.

¹⁰ Ha thʼ öbun hnyi wanben ta je hnyei, ka habe, Ame musi Iehova: Ke tethmâ minya hmeledrany, kʼ ame ca he bi ka bwebwet: E ame he ka owisa ta je hnyei hnyi wisa.

¹¹ E so ame he je drany he ka senyin, mo hmeledrany he ka hobâ; E so he ka û köiö me unöngötiny;

¹² E so e hobâ ta hnyei, me ta je ûnyi hia hnyin; Me ame he ka khumöng senyin dö ta je ûöiny hnyot hia thithö;

¹³ Hnyi hnyimakö Iehova, anyin a e ame he jem; Anyin a e ame he jem he ka owisa hmeledrany: E ame he ka owisa hmeledrany hnyi wisa; Me ta je hnyei hia hnyi anyin hnathu.