Salamo 9 - Iaai Bible 1901 (New Caledonia)

Hobi kâu at vhik khumöng; adre hai hnyi Muth-laben. Salamo anyi Davita.

¹ OGE me he ka oleâ kö Iehova ge hnyekuk ae bekhot; Oge me he ka haimemenâ ânyâm ta je huliwa hnân lâiâ.

² Oge me he ka senyin me hobâ köu: Ataebeönua lö, oge me be ka khumöng olungâ iâm.

³ E ka hmetu je iwahnaihmiony mönya. Adre me haû me hiʼ ödra hnyi hnyimâkâm.

⁴ Anyin a u je hia but ciʼ nya hnyi anyik wisa me hnok hna ivino; U je laba hon theron me owisa hnyi wisa.

⁵ U je hia but hijingâ je hnyei, u je ohia tavat ae kong, U je kot degecâ je iödra ke ne o but nyiele balua.

⁶ Haba iwahnaihmiony adre me oumʼ ödra bi, e ba wan gadra balua; Me je taun u je hia but oc degecâ, A aû but minya hna ûnykûme kodra.

⁷ Ke ame laba Iehova a than nyiele balua: E ame hia but penapena anyin theron hnân ûhnei.

⁸ Ke e ame he ka owisa hmeledrany hnyi wisa, E ame he ka owisa soâ tavat.

⁹ Ame he Iehova ka bi hnabâ hobi kâu tavat adre me sedʼ ödra, Hnabâ hnyi je bonginy vec;

¹⁰ Ke haba tavat ae khanʼ ödra iâm, me adre me he ka labageju köu; Anyin a haba u, Iehova, u je ca hna degecâ tavat waleji adre me elöm u.

¹¹ Khumöng olungi Iehova, at ame labâ Ziona: Omanenâ thö hnyi wanben ta je hnyei hnen je hna ânyâ.

¹² Anyin a haba at ame hnei can dra ame ûnykûmi ödra: Kʼ ame ca hnying hwatenge hwan tavat ae theduoc.

¹³ Iehova lö, betenge ju gak; Wâ ju anyik vec ûnyi ge tavat adre me hûkötiö nya, U at ame kop nya goranyai ûnyi hnyi homagouleny mok;

¹⁴ Me inye he ka haimemenâ je hofuc hia hnân oganö u: Ke oge me he ka senyinâ ûhomeli gam, Hnyi je homagouleny hlu nöku Ziona.

¹⁵ Haba ta je hnyei adre me û but hnyi thop adre hia but ânyâ: Kʼ ame hnok dö je cadra hnyi ert adre me ikhâlâ.

¹⁶ Ke haba Iehova ame omanenâ e bi, kʼ ame owisa: Kʼ ame hnok dö at ae kong ge huliwa anyin li hnyamen. [Higaiona. Sela.

¹⁷ Ame be tavat ae kong ka hmetu ka hnyi hedis, Wale ta je hnyei hia adre me hnying Khong.

¹⁸ Anyin adre me ca be balua ka hnying tavat ae theduoc, Kʼ ame ca he balua ka hia labageju anyin tavat ae ba ta ûnyi.

¹⁹ Iehova lö, todrö; e so ame ca he at ka ton: E so adre me owisa ta je hnyei hnyi hnyimâkâm.

²⁰ Iehova lö, ooti ödra ju; Omanenâ thö ka aten ta je hnyei a ödra tavat bi. [Sela.