Salamo 88 - Iaai Bible 1901 (New Caledonia)

Khumöng wale Salamo anyin je laku Kora; hobi kâu at vhik khumöng: adre hai hnyi Mahalatha Leanotha. Salamo hnân ûnö anyi Hemana at Ezera.

¹ IEHOVA lö, Khongon melik, Oge hia but hongot köu hnyi lany me lit:

² E so e ölö thö hijik hic hnyi hnyimâkâm; Ta ju hnyikönyâm ka hok hwatenge:

³ Anyin ae unöngötö hanuk ge je vec: Ke ame hakekeny anyik möt erkemok ai.

⁴ Adre me tha öû nya me tavat adre me utut ka hnyi thop; Iny ûcû me at ae ba at hnân hadruâ e:

⁵ Wale at adre hna baûâ unyin je komok, Helâ me tavat adre hia but hlingâ adre me mokut hnyin erkemok, Waleji u me ca ûnykûme hmetu bi; Kʼ adre subâ degecâ bi ûnyi hnyi hnyamâm.

⁶ U je hia but ip nya hnyi thop ae dit hmönyin, Hnyi je dok ae menkholom, hnyi je dok ae dit.

⁷ E hmak hmönyin huk ânyâm hmönyin, Ke u je hia but oveci nya ge ânyâm ta je waköiö hia thithö. [Sela.

⁸ U je hia but öûsâkâûöâ je liamewainy mönya; Ke u je hia but okûâ kodra he ka ikiki nya: Adre hia but theling nya, ke ca khanö; nya hmetu he ka dit ut.

⁹ A jok ut li emakök can vec: Iehova lö, oge hia but hawo u hnyi je bong, Oge hia but inâ li hnyamok köu.

¹⁰ Hawa, u me he ka omanenâ ta je ûnyi hnân lâiâ ka tavat a mokcu? Hawa, ame he ta je komok ka tot me oganö u? [Sela.

¹¹ Hawa, adre me he ka ha ânyâm ibetengiö eû hnyi erkemok? Me ânyâm hnathu hnyi Hnaûhango?

¹² Hawa, adre me he ka wâ ânyâm ta je ûnyi hnân lâiâ hnyi menekolom? Me ânyâm wisa hnyi hnyei adre me hnying hnyin?

¹³ Iehova lö, oge hia but tenge köu, Ke ame he ka ölö ka hnyi hnyimâkâm hnyi je hnyomakatu hijic hic.

¹⁴ Iehova lö, ieû gam u me degec hanuk? Ieû gam u me ikhâlâ hnyimâkâm gak?

¹⁵ Iny vec ut me mok hwân kʼ iny tiga wanakat: Kʼ ame gâuk hnyi ûen oge vheno ânyâm ta je ûnyi hnân outen.

¹⁶ A hia but hûlûlûö nya hnen ânyâm wathethot ae gan hmâ; Ame subâ degeci nya ge je ûnyi hnân ootâ ûnyi gam.

¹⁷ Adre me igigili nya hnyi je bong helâ me köiö; Adre me tha ûtitilen könya.

¹⁸ U je hia but öûsâkâûöâ at ame betenge gak me hanok, Ke u je ip hnyi menekholom liamewaeny mönya.