Salamo 85 - Iaai Bible 1901 (New Caledonia)

Hobi kâu at vhik khumöng. Salamo anyin laku Kora.

¹ IEHOVA lö, u je hia but betenge ka em hnyei: U je hia but ohmetuhmetu Jekob ûheny hnyi hna bâ.

² U je hia but thang degecâ hulo anyin lakem, U je hia but tube hia anyidra ta je monu. [Sela.

³ U je hia but hom degecâ hia ânyâm wathethot: U je hia but hwio ûnyi hnyi ânyâm hmönyin ae hlöng.

⁴ Khong at ame omeli ohmun lö, hwiʼ ohmun ju, Ke oumo ânyâm hmönyin kohmun,

⁵ Hawa, u me he bala ka hmönyâm kohmun? U me he ka obeûâ ânyâm hmönyin ka ta je dö hia?

⁶ Hawa, u me ca he hmetu bi ka omeli ohmun: Me me he bi lakem ka senyin gam?

⁷ Iehova lö, omanenâ thö kohmun ânyâm ibetengiö, Me ham kohmun ânyâm ûhomeli.

⁸ Oge me he ka long hna ha hnen Khong ae Iehova: Anyin a e ame he ka ha ûsoköu ka lakeiny me anyin wakap: Ke so adre me ca he hmetu bi ka hwakecidra ae monu.

⁹ E hnathu o hakekeny ka tavat adre me outen e anyin ûhomeli; Me me he hmanenang ka labā ita hnyei.

¹⁰ A ûkhanö thö ibetengiö me hnathu; A ûcimhnyimak dö wisa me ûsoköu.

¹¹ Ame kû thö hnathu ûnyi hnyi hmeledrany; Ke haba wisa ame selat jem ethö hnyi drany.

¹² Eke, Iehova ame he ka ham ûnyi ae so; Kʼ ame he ita hnyei ka widrany.

¹³ Ame he hwakecin ae wisa ka he hnyi hnyimakan; Me ame he ka ânyâ deny li hnyeûcan me me gethen he ka he hnyin.