Salamo 73 - Iaai Bible 1901 (New Caledonia)

TUSI III.

Salamo anyi Asafa.

¹ E HNATHU e so hwakecin Khong kö Isaraela, A tavat ae kalaöt hnyekudra.

² Ke haba inya, me oge me thöthö, A ne haûhaû but li cak.

³ Anyin oge me ciâ ge tavat bi gan, Hnyi ûen oge me wâ hnahic anyin tavat ae kong.

⁴ Anyin ae ba vec hnyi anyidra mok: Ke hwenying ut hwegiödra.

⁵ Adre me ca hnyi vec helâ me ke je hnyat, Kʼ adre me ca okongu ödra helâ me keihen.

⁶ Anyin a wale adre ovhekinyi ödra ge bi gan; Adre me khavâ ûkhaûen a ûokonguny.

⁷ A didrut li emaködra hnen pipikhenya: A bahihingölö je ûnykûmânen ta je hnyekudra.

⁸ Adre me ûhiö, me ha ûkonguny hnyi anyidra hulo: Adre me ha biganâ.

⁹ Adre me fuc goranyai ka hnyi drany, Kʼ ame ngenu eang hmeledran je bohmö-dra.

¹⁰ Anyin a wale, ame hmetuhmetu jem lakeiny: Adre me ijem je köiö hnyin utkaia ae unöngöt.

¹¹ Haingödra, ka habe, Ame he Khong ka kâmâu ka khana? Ke hawa, e hu wâhmakhmetoâ unyi Beönua?

¹² Wâ bi, wale bi eling tavat ae kong; Adre me laba khötkic bala bi, me se hia tot je omjehedra.

¹³ E hnathu, e ûnyi baû hnok hna okhalaötâ hnyekuk, Me hinyem hnyi hwakecin ae ba hnyikongon;

¹⁴ Anyin adre me oveci nya hnyi je bong, Me osoi nya hnyi je hnyomakatu hia.

¹⁵ Oge ne hia but ba, ka habe, Oge me he ka ha helâe; Wâ bi, inya at ame omonoâ ta je lakom.

¹⁶ Oge ne ûnykûme deny me inye he ka khana e, Ûnyi e ae vec könya;

¹⁷ Ke ne o but oge me o ka hnyi uma umen Khong, Me ûnykûme thö obiny kodra.

¹⁸ E hnathu u je ip ödra hnyi je dok ae haûhaû: U je hagutʼ ödra hnyikânâi ka hnyi hnaûhango.

¹⁹ Eke, ame ie logot ka ohiʼ ödra! Adre me aû but hnen je ûnyi hnân ootâ.

²⁰ Helâ me man bwi e ka hmak dö at, Helâe, Than lö, u ka hmak dö, u me be ka ikiki ge hmenudra.

²¹ Anyin ame hiny dut hnyekuk, Kʼ adre me dâ li jebalainuk:

²² Iny monu ke ca khanö nya; Iny helâ me meno hnyi hnyimâkâm.

²³ Ke so bi inya bala bi unyâm: U je kât hnyamok a metök.

²⁴ U me he ka su nya ge hnâm hna ûhnenamö, Ke hwaban dö e u me he ka hum nya ka hnyi hmanenang.

²⁵ Anyin a ca hobi könya hnyi drany ethö? Ke ba wek ge at eang hmelen ke hake u ke.

²⁶ E sënyin dut unyik me hnyekuk: Khong thibi kicin hnyekuk me jekhöûk nyiele balua.

²⁷ Anyin a wâ bi, ame he ka hia but tavat adre me ûsâkâûö möu; U je hia but ohiʼ ödra hia adre me bi ûnyi monu digic u,

²⁸ Ke haba inya, e so könya he ka hakekeny ka Khong: Oge me hia but wia Than Iehova me me hnok hna lubaduöng, Mʼ oge me he ka omanenâ ânyâm ta je huliwa hia thithö.