Salamo 7 - Iaai Bible 1901 (New Caledonia)

Salamo anyi Davita e ame khumöngö kö Iehova ûnyi ge ta je hofuc ho Kusa at Beniamina.

¹ IEHOVA Khonguk lö, oge me labageju köu: Omeli nya ju gadra hia thithö adre me hnu nya, ke hûgûnö nya but:

² Wâ e nye he ka kia hanuk helâ me man liona, Me kia omomono e, ke ba at he ka omeli nya.

³ Iehova Khonguk lö, oge ne hia but ânyâ ûnyi ang; Ke ame ne e bi hulo hnyi li hnyamok;

⁴ Ke oge ne hia but bi hwaban kong ka at ae ûsoköu mönya; (Eke, oge hia but hna but at ae iwahnaihmiony mönya ke ba can:)

⁵ E so e he iwahnaihmiony ka hnu hanuk, me kât e; Eke, e so e ame he ka uto ju anyik möt ka hnyi kânâ, Me ip hmanenangik eû hnyi sesâ. [Sela.

⁶ Iehova lö, todrö hnyi ânyâm hmonyin, Höhöi thö ge hmonyin anyin je iwahnaihmiöny mönya: Ke hmâkâ thö hobi könya: u je hia but otilâ hna owisa.

⁷ Ke so ame igigili u ûkhacaköuiny ta je hnyei Ke hmetu ju hudrin ka hnyi dok ae gorany.

⁸ Iehova ame owisa ka ta je hnyei: Iehova lö, owiso nya ju helâ me hwakecik ae wisa, me hwakecik ae ba hnyikongon,

⁹ E na hu obiny ju monu anyin tavat ae kong, ke otethmâ ju at ae wisa: Anyin a Khong at ae wisa ame elâm ta je hnyok me ta je ûnykûme.

¹⁰ E unyin Khong singik, At ame omelo tavat ae wisa hnyekudra.

¹¹ Haba Khong at owisa ae wisa, Eke, e Khong at ae hmak ge monu hnyi je bong hia.

¹² Ke ne a ne ca hwio hmetu at, me ame he ka khet anyin hele vat; E ame hia but oto anyin cafana me penapena e.

¹³ Ke ame hia but penapena hobi kâu minya ta je ûnyi hnân hlingâ; E ame he ka vâc anyin je fana.

¹⁴ Wâ bi, ame vec hnyekon ge hulo; Eke, e ame erkinâ but ûokonguny, me hnokoâ thoi.

¹⁵ E ame hia but hiny thop, kʼ ame hiny dilâ, Me ame ka kolu but ka hnyi thop waleji e ame ânyâ,

¹⁶ Ame he anyin monu ka hmetuhmetu ka hnyi hon ban, Kʼ ame he hnen hna sihnân ka ta hmetu ka hnyi wanben ban.

¹⁷ Oge me he ka ole kö Iehova hoton hwakecin ae wisa: Kʼ oge me he ka khumöng olungâ iö Iehova ae Beönua.