Salamo 57 - Iaai Bible 1901 (New Caledonia)

Hobi kâu at vhik khumöng adre hai hnyi Al-tasheth. Salamo anyi Davita; hnyi ûen e ame kec ga Saulo, ka hnyi op.

¹ KHONG lö, betenge ju gak, betenge ju gak; Anyin ame kic gam hanuk: Eke, oge me he ka ikhölö hnyi hmenon li labenyâm,

² Oge me he ka hongot ka Khong ae Beönua; A Khong, at ame ânyâ ta je ûnyi hia hobi könya.

³ E ame he ka ûkhûnöng ûnyi hnyi drany me omeli nya, Eka haikongu nya hnen at ame memang könya. [Sela. Ame he Khong ka kunâ anyin betenge me hnathu.

⁴ E ʼû hanuk hnyi wanben ta je liona; Oge me mokut unyin tavat adre me hiâ, Wale lakon tavat a je ö me fana ta je nyudra. Ke haba bohmödra me hele vat ae so hwan.

⁵ Khong lö, e so u he ka gorany hon ta je drany; Me ânyâm hmanenang hon hmeledrany hia thithö.

⁶ Adre hia but penapena hnewe hobi kâu li cak; Ame hlec hnyikânâi hanuk: Adre hia but hiny thop hnyi hnyimakök; Adre me ka ta hmetu but eû hnyi hnyin e. [Sela.

⁷ Khong lö, e hmâ but hnyekuk, e hmâ bala but hnyekuk: Oge me he ka khumöng, eke, oge me he ka khumöng olungö.

⁸ Hmanenangik lö, hmak dö; nabela me kitara lö, hmak dö: Ke oge me he bi nya ka hmâkâ hnyi haolany.

⁹ Than lö, oge me he ka ole köu hnyi wanben ta je hnyei: Oge me he ka khumöng olungi u hnyi wanben tavat.

¹⁰ Anyin ae gan hmâ ânyâm ibetengiö ke ne o but ka hnyi ta je drany; Ke ânyâm hnathu ke ne o but hnyi ta je ûlâ.

¹¹ Khong lö, e so adre me ogöranyi u hon ta je drany; Ke ânyâm hmanenang hon hmeledrany hia thithö.