Salamo 51 - Iaai Bible 1901 (New Caledonia)

Hobi kâu ai vhik khumöng. Salamo anyi Davita: hnyi ûen ame o kâu Nathana perofeta, hwaban dö hnen hna he kö Batheseba.

¹ KHONG lö, betenge ju gak hoton ânyâm ibetengiö: Kot degecâ but hnok ta je hna hanyâûâ hoton ûganiny ânyâm tang betenge.

² Ti ösûö nya but ûnyi hnyi anyik monu, Me ânyâwiö nya thö ûnyi hnyi anyik hulo.

³ Anyin a oge me ogâ hnok je hna hanyâûâ: Ke e bala bi hnyi hnyimakök anyik hulo.

⁴ Oge hia but monu köu, köu thibi, Me ânyâ ûnyi ae kong hnyi hnyimâkâm, Mʼu me he ka wisa u ka ha, Ke so hnyi hnâm hna owisa.

⁵ Wâ bi, adre me hnöku nya hnyi monu; Ke a erkin mönya bai hnyi hulo.

⁶ Wâ bi, e bewem hnathu eû hnyi hnyok. Ke u me he ka okhanö nya ge metâ hnyi dok ae iyong.

⁷ U me he ka ânyâwiö nya ge hisop, me inye he ka kalaöt ut: Ösûö nya ju, me inye he ka hau but hon kiona.

⁸ Olöngi nya ju ge senyin me hobâ; Me me senyin dö je jeien waleji u je thuthu.

⁹ Ikhâlâ ju hnyimâkâm ge anyik ta je hulo, Ke kot degecâ but anyik ta je monu hia thithö.

¹⁰ Khong lö, op dö hobi könya hnyok ae kalaöt; Ke mâdrâ hmeto thö hanu ae wisa eû hnyi hnyik.

¹¹ Ca digic nya bi hnyi hnyimâkâm; Ke ca hom bi gak hanom ae kap.

¹² Ohmeto ju könya senyininy ânyâm ûhomeli: Ke ci nya thö ge hanu ame ie ûling.

¹³ Me inye he ka nâ dem je gethen ka tavat adre me hanyâûâ; Ke ame he ka hmetuhmetu köu tavat ae kong.

¹⁴ Khong lö, Khongon melik, hnö nya but ûnyi hnyi dra a jönik; Me ame he bohmök ka khumöng ogânâ hwakecâm ae wisa.

¹⁵ Than lö, u me he ka khong li esongodik; Kʼ ame he hnyimök ka omanenâ hnân oganö u.

¹⁶ Anyin ae ca wem hut; me inye he ka ham e: E ca senem köu je hudiny leû.

¹⁷ Haba ta je hut ka Khong me wale thibi hanu ae mita: Khong lö, u me ca he ka oûnyibaûâ hnyok adre omomono ae bewisa.

¹⁸ Ânyâ thö so ko Ziona hoton hnyekom ae betenge: Otilâ thö hak veto Jerusalema.

¹⁹ Me u me he ka senyinâ ta je hut ae wisa, wale hut adre me le, me hudiny leu ae bekhot: Mʼ adre me he ka hudo je bolok hon ânyâm taben hut.