Salamo 5 - Iaai Bible 1901 (New Caledonia)

Hobi kâu at vhik khumöng; ge Nehilot. Salamo anyi Davita.

¹ JEHOVA lö, long ju ka ta je ifucik, Ûnykûme ju mekhunen hnyekuk.

² Tuhok me Khonguk lö, tevehlöng ju ka hok hwatenge: Anyin a oge me hic köu.

³ Iehova lö, hnyi hnyomakatu u ma he ka long hok; Hnyi hnyomakatu oge me he ka ha gaga hijik hic köu me hmâkâ.

⁴ Anyin a u ca Khong at ame senyin ka hwakecin ae kong: Ke ame ca he hulo ka laba unyâm.

⁵ Ame ca he ka tot hnyi Hnyimâkâm tavat bi gan: U me ikiki gadra hia adre me ânyâ hwakecin ae kong.

⁶ U ma he ka ohiʼ ödra adre me ha je thoi: Ke Iehova ame ikikiâ at ame hingâlâ dra me iyawâ.

⁷ Ke haba inya, oge me he ka didro ka hnyin umâm uma hnyi ânyâm je ibetengiö ae se hia: Ke oge me he ka khudrung ka hnyi umâm uma ae kap me ot köu.

⁸ Iehova lö, lili nya ju ge hwakecâm ae wisa, can je iwahnaihmiony mönya; Owisa thö dem gethen hnyi hnyimakök.

⁹ Anyin ae ba ke hnathu hnyi je hnyimödra; E kong hmonyin hnyekudra: Haba je jeköwidra, me helâ me erkemok ae memang; Ke adre me ûtakû ge bohmödra.

¹⁰ Khong lö, haikongu ödra but; E so adre me ta ûnyi ge anyidra bi je ûhnenamö: Obʼ ödra but can adre osehia hanyâûâ Anyin adre me ûkhin fuc möu.

¹¹ Ke so ame he ka senyin tavat hia adre me labageju köu, E so adre me he bala ka hongot senyin, anyin a u thibi at ame sing ödra: E so ame he ka senyin köu minya tavat adre me hnyokâ iâm.

¹² Anyin a u me he ka ohnahicâ at ae wisa; Iehova lö, u me he ka söng igigilöâ ge ibetengiö helâ me bec.