Salamo 41 - Iaai Bible 1901 (New Caledonia)

Hobi kâu at vhik khumöng. Salamo anyi Davita.

¹ HNAHIC hnen at ame ûnykûme ka at ae sënyin: Ame he Iehova ka omelo e hnyi bong ae kong.

² Ame he Iehova ka tuö e, me obeûâ anyin möt, ke adre me he ka ohnahicâ e hnyi hnyei; Ke u me ca he bi ka hna e ka hnyi weny je iwahnaihmiöny mē.

³ Iehova ame he ka kap e hnyi hna ûâ: U je ânyâwia hia hnen hna mokut hnyi anyin mok.

⁴ Haingök dö, Iehova lö, betenge ju gak: Ometo thö hanuk; anyin oge hia but monu köu.

⁵ Haba je iwahnaihmiöny mönya me adre me haikongu nya, ka habe, Ie ûen e ame he ka mokcu hnyin, me hia bi ien?

⁶ Kʼ ame ne o ka ō nya, me e ame ha thoi: Haba hnyekon ame ûkhöûnâ hulo eû hnyin: Me e ame didrut me ha e.

⁷ Haba tavat hia adre me hûkötiö nya, me adre me ulidri nya: Adre me vak he ka okongu nya.

⁸ Haingödra, E kece but kâu mok ae kong: E ame mokut walang ang, kʼ ame ca he hmetu ka tot.

⁹ Eke, haba ihumik, waleji at oge me geju kâu, at ame an ök jeû Ame hia but hûki nya ge ohmâiny can.

¹⁰ Ke haba u, Iehova lö, u ma betenge gak, me otilö nya thö, Me inye he ka bi hwaban kodra.

¹¹ Walang haten könya a u me senyin könya, Anyin a ame ca ohobeluâ huk hnen! iwahnaihmiony mönya.

¹² Ke haba inya, me u je ci nya hnyi hwakecik ae hnathu, Me otilö nya hnyi hnyimâkâm nyiele balua.

¹³ E so he ka haisoi Iehova, Khongu Isaraela, Hwân ehac balua ke ne o but nyiele balua. Amen, me Amen.