Salamo 118 - Iaai Bible 1901 (New Caledonia)

¹ OLEÂ ju kö Iehova; anyin a e at ae so: Anyin a nyiele balua anyin ibetengiö. E na he ju Isaraela ka ha, ka habe,

² Nyiele balua anyin ibetengiö.

³ E na he ju lap anyi Arona ka ha, ka habe, Nyiele balua anyin ibetengiö.

⁴ E na he ju tavat adre me outö Iehova ka ha, ka habe, Nyiele balua anyin ibetengiö.

⁵ Hnyi anyik vec oge me hongot kö Ja: Me ame long könya hnö Ja, me e ame ip nya hnyi dok ae gan.

⁶ Hiök Iehova: oge me ca he bi nya ka ot: Ieû ke ûnyi ame he at ka ânyâ könya?

⁷ Hiök Iehova e unyin tavat adre me hadruo nya: Anyin a wale oge me he ka wâ wek ge tavat adre hûkötiö nya.

⁸ E ûnyi hnathu he ka labageju kö Iehova Hon he ka labageju ka at.

⁹ E ûnyi hnathu he ka labageju kö Iehova Hon he ka labageju ka ta je than.

¹⁰ Adre me igigili nya ta je hnyei hia thithö: Hnyi iö Iehova oge me he ka subâ degeci ödra.

¹¹ Adre me igigili nya, eke, adre me igigili nya: Hnyi iö Iehova oge me he ka subâ degeci ödra.

¹² Adre me igigili nya helâ me ta je bi; adre me aû but helâ me ta je angö hnyi meic; Hnyi iö Iehova oge me he ka subâ degeci ödra.

¹³ U je hagutö nya hwegiö nya, me inye he ka ta: Ke haba Iehova ame hadruo nya.

¹⁴ Tang hwegiök Ja, me anyik khumöng; Ke e thibi at ame omeli nya.

¹⁵ E bi hnyi je uma mano umen tavat ae wisa hwan senyin, me ûhomeli: Ame ânyâ hwegiâ hnen hnyam a metö Iehova.

¹⁶ Ame gorany dut hnyam a metö Iehova: Ame ânyâ hwegiâ hnen hnyam a metö Iehova.

¹⁷ Oge me ca he ka mok, ke oge me he ka möt, Me omanenâ ta je huliwa anyi Ja.

¹⁸ Haba Ja ame hia but osoi nya hwegiö nya: Kʼame ca hia but hnö nya bi he ka mok.

¹⁹ Khong ut könya ta je homagouleny hwakecin ae wisa: Oge me he ka didro hnyin, oge me he ka ole kö Ja.

²⁰ Walang thibi homagöule Iehova; Ame he tavat ae wisa ka dit hnyin.

²¹ Oge me he ka ole köu, anyin a u je hia but thu könya, Ke u thibi at ame omeli nya.

²² Haba veto waleji a degec hnen tavat up uma, Wale thibi e hnân ban bahebet.

²³ Haba ûnyi eling ûnyi ga Iehova; Ke hnân lâiâ köta.

²⁴ Walang thibi bong ame ânyâ Iehova; Ate me he ka senyin me hobâ hnyin.

²⁵ Iehova lö, ö u omelo ju: Than lö, öhmun e khöû köu, ohnahici öhmun.

²⁶ Hnahic hnen at ame o hnyi iö Iehova: Öhmun e hia but ha hnahici öbun ûnyi hnyi uma umo Iehova.

²⁷ Iehova Khong, ke e ame hia but omelami ota: Ca ju je hut ge je tö, wale ka hnyi je baitoiny taben hut.

²⁸ U thibi Khonguk, ke oge me he ka ole köu: U thibi Khonguk, oge me he ka ogöranyi u.

²⁹ Oleâ ju kö Iehova; anyin a e at ae so: Anyin a nyiele balua anyin ibetengiö.