Salamo 108 - Iaai Bible 1901 (New Caledonia)

Salamo anyi Davita, a Khumöng.

¹ KHONG lö, e mou but hnyekuk; Oge me he ka khumöng, eke, oge me he ka khumöng ogânâ me hmanenangik.

² Nabela me kitara lö, hmak dö! Oge me he bi nya ka hmak hnyi haolany.

³ Iehova lö, oge me he ka ole köu hnyi wanben ta je hnyei: Ke oge me he ka khumöng oganö u hnyi wanben tavat.

⁴ Anyin ae gan hmâ ânyâm ibetengiö hon drany, Ke haba ânyâm hnathu ke ne o but ka hnyi je ûlâ.

⁵ Khong lö, e so adre me ogöranyi u hon ta je drany: Me ânyâm hmanenang hon hmeledrany hia.

⁶ O u omelo ju ge hnyamâm a metâm me ling öhmun ju, Me me möt tavat a laoûnykûmâm.

⁷ A hia but Khong ha hnyi hwakecin ae kap; oge me he ka ohobeluâ: Oge me he ka khenâ Sekema, me tuluto hnyigöulen bucen Sukotha.

⁸ Anyik bi Gileada; ke anyik minya Manase; Ke haba Eferaima wale hwegien bok: Ke Juda at ame ham hnok hnanyibu.

⁹ Moab anyik utkaia hnân soû; Oge me he ka khûâ hnyi Edoma taben hnyeûcak: Oge me he ka hongot goranyai hon Filisiti.

¹⁰ Hawa, ie at ame he ka hum nya ka hnyi taun adre up haginy? Ie at a hia but su nya Edoma ai?

¹¹ Khong lö, hawa, u je ca hna degeci öhmun? Ke u je ca tha he möhmun, Khong, me anyihmun je utbavat.

¹² Hadruʼ öhmun dö ûnyi ge iwahnaihmiony: Anyin ae ûnyi baû bi ûhadruo anyin at. Ûnyi ge Khong ate me he ka hwege: Anyin a e bi at ame he ka uto ta je iwahnaihmiony möta.