Salamo 10 - Iaai Bible 1901 (New Caledonia)

¹ IEHOVA lö, ieû gam a u me tot sâkâû? Me lubaduöng hnyi je ûen ae vec?

² Adre me hwege hnu tavat ae theduoc hnen tavat ae kong ke bi gan; E so adre me nuc ödra hnen je bihihwakecin adre me ûnykûme.

³ Haba at ae kong ame ohobeluâ weny hnyekon, Kʼ ame hota degecâ hnen at ae behnyekon, me hmiö Iehova.

⁴ Haba at ae kong, ûnyi hnyi bi ganiny hnyimakan, ame ha, ka habe, E ame ca he ka elâm e. Ke haba hnen je hna ûnykûme hia, ka habe, E ba bi Khong.

⁵ E hmâ balua deny je gethen; E sâkâû balua gan ânyâm je hna owisa: Ke haba je iwahnaihmiony hia mē, e ame tûʼ ödra.

⁶ Haingen eû hnyi hnyekon, ka habe, Oge me ca he ka bwebwet: Hnyi je dö hia oge me ca he balua ka vec.

⁷ A unöngötö hnyimen ge ûhangö, me iyawö, me seda: Eû hnyi hmelen bohmen ûokonguny me hulo.

⁸ E ame laba tue hnyi je dok ae iyong hnyi je taun: E ame hlingâ tavat ae ba hnyikongon hnyi ta je dok ae nuong: Haba li emakan ame ecmâkâ tavat adre me okongoâ.

⁹ E ame laba hnyi dok ae nuong helâ me liona hnyi umen op: E ame mokut duöng he ka kât at adre ovecâ: E ame kât at adre ovecâ, me lelö e hnyi ûten ert.

¹⁰ E ame iyâû, me nom, Me ame ta but tavat adre ovecâ hnen anyin tavat ae hwege.

¹¹ Haingen eû hnyi hnyekon, ka habe, A hnying ut Khong: E ame ikhâlâ hnyimakan; e ame ca he balua ka wâ.

¹² Iehova lö, todrö; Khong lö hai thö hnyamâm: Ca he ka hnying tavat adre ovecâ.

¹³ Geû ame hmiân Khong hnen at ae kong, Me ha eû hnyi hnyekon, ka habe, U me ca he ka hnei can?

¹⁴ U je hia but wâ e; anyin a u me wâ ûöveci me vec, he ka hom e hnyi hnyamâm: Ke haba at ae theduoc ame hna but e bi köu; U thibi at ame hadruâ nakahme.

¹⁵ Ohmetro but benyin at ae monu; Ke haba at ae kong, e so u ma elâm hwakecin ae kong me me ba hmetu hnâm hna wâ.

¹⁶ Iehova thibi Than nyiele nyiele balua: A hia but je hnyei ûnyi hnyi iny hnyei.

¹⁷ Iehova lö, u je hia but löng weny tavat ae hnyikânâ: U me he ka otilâ hmâ je hnyekudra, u me he ka tevehlöng:

¹⁸ He ka owisa Ka nakahme me tavat adre ovecâ, Me me ca he hmetu bi at a aten hmeledrany ka hwege hnyimakan.