Rutha 4 - Iaai Bible 1901 (New Caledonia)

¹ KE haba Boaza ame he ka hnyi homagöule me laba ju eling: ke wâ bi, ame he at a hanen anyidrin lap, wale at a ha ga Boaza; me e ame ha kâu, ka habe, E, ketha lö! aiö u, laba ju eang. Me a ame saû thö me laba ju.

² Me e ame hom je hnyat a ten ûnyi hnyi wahingatiny taun, me ha, ka habe, Laba ju eang, me ödrin e laba.

³ Me e ame ha ka at a ti hanen anyidrin lap, ka habe, Haba Naomi wale momo a o hmetu ûheny hnyi hnyei Moaba, ame ûco utkânâ wale iny liamekeiny mötin jia Elimelek:

⁴ ke oge me ûnykûme he ka omanenâ kâu, me ha, ka habe, Hamâm he ka ûco e hnyi hnyimakan je hnyat ödrin e laba eang, me hnyi hnyimakan wahingatiny labanök. Ke u me ne he ka ûco, awe, ûco thö: ke u je ne ca he ka ûco, me ha thö kônya, me me khanö nya thö: anyin ae ba hmetu ke at ame he ka ûco, ke u thibi; ke inya thibi ûtangköu mou. Me haingen, Oge me he ka ûco.

⁵ Haba Boaza ame ha ka habe, Hnyi bong u me he ka ûco hnyin ûnyi ga Naomi u me he ka ûco minya ûnyi ga Rutha at Moaba, âiân at a mokcu, he ka oâ ien at a mok hon iny bi.

⁶ Ke haingen at a ti hanen lap, ka habe, E ca khanö nya he ka ûco hobi kônya bi, wâ e nye kong ut ik: u me he ka ûco hûdrök, anyin ae ca khanö nya he ka ûco e.

⁷ Ke walang bongon hnyi Isaraela ehac ge bi hwaban me ûcû, me me ohmâ ta je ûnyi hia thithö; a gʼ ame he at ka uny jut tangen hnyeûcan me ham ka at ame laba hakeken kâu: ke wale hnân ohnatho hnyi Isaraela.

⁸ Anyin a wale haingen at a ti hanen anyidrin lap kö Boaza, ka habe, Ûco thö hobi köu bi. Me e ame uny jut tangen hnyeûcan.

⁹ Ke Boaza ame ha ka je hingat me tavat hia thithö, ka habe, Öbun e ohnathoâ hnyi bong ang a oge ûco ta je ûnyi hia anyi Elimelek, me ta je ûnyi hia anyi Kiliona me Malona ûnyi ga Naomi.

¹⁰ Ke khaca oge ûcû Rutha at Moaba äiö Malona, me öiök, me inya oâ ien at a mok hon iny, me me ca hia ien at a mokcu unyin je liamekeiny më, me ûnyi hnyi homagouleny anyin taun: öbun e tavat ohnatho hnyi bong ang.

¹¹ Me ame ha tavat hia thithö hnyi homagöule me je hingat, ka habe, Ohmun tavat ohnatho. Hamö Iehova he ka wia momo ame he ka o ka hnyi umâm uma me me helâ me Rakela me Lea, li at ödre otilâ lap anyi Isaraela: ke e so u me tren ûnyi ae ûcû hnyi Eferatha, me lung hnyi Beth-eleema:

¹² ke e so ânyâm lap he ka helâ me lap anyi Farez, wale a hnokoâ Tamara ga Juda, ûnyi ge mâtrân ame he Iehova ka ham köu ûnyi ge momo ang.

¹³ Me Boaza ame hum Rutha, ke âiân dö e, me e ame didro kâu, ke e ame erkin dut, ge musi anyi Iehova, me e ame hnokoâ da.

¹⁴ Ke haba omomo ödrin e ha kö Naomi, ka habe, Ole kö Iehova, wale at ame ca hnö u he ka ba at ae hakekeny köu hnyi ânyâm lap hnyi bong ang, ke so e me lung bi ien hnyi Isaraela.

¹⁵ Ke e ame he ka otubweli u, me hat u hnyi somaca a u, anyin ame hnokoâ nokon ge ûngom at ame betenge gam, ke beönua anyin ibetengiö köu hon lakom je baga a seven.

¹⁶ Me Naomi ame hom wanakat, me kât e ka hnyi ûlainy; ke e ame hat e.

¹⁷ Ke haba omomo ödrin e hwenyi ien, ke haingödrin, A hia but hnokoâ da öbi Naomi; ke ödrin e hwenyi ien me Obed: haba e kamö Jese, kamö Davita.

¹⁸ Ke walang je dö anyi Farez: haba Farez ame hnöku Hezerona;

¹⁹ ke Hezerona ame hnöku Bâm, ke Bâm ame hnöku Aminadaba;

²⁰ ke Aminadaba ame knöku Nasona, ke Nasona ame hnöku Salemona;

²¹ ke Salemona ame hnöku Boaza, ke Boaza ame hnöku Obed;

²² ke Obed ame hnöku Jese, ke Jese ame hnöku Davita.