Rutha 3 - Iaai Bible 1901 (New Caledonia)

¹ KE ame ha kâu Naomi a ûngon, ka habe, Ûnguk, hawa, oge me ca he ka heleû hna menâ hobi köu mʼ u me so?

² Hawa, ca hanötin Boaza wale u me tha he me anyin je hlu? Wâ bi, e ame he ka huje bali eâu hnyinghet hnyi hna huje hwit.

³ He thö ka soû, me suö wakaco, me khavâ ânyâm je ûkhaû, ke he thö ka hnyi hna huje hwit: ke u me ca he ka omanenö u bi ka at, ke ne o but e ame um dö han me ic.

⁴ Ke e ka he bi ka mokut, me hamâm he ka wâhmakhmetoâ dok e ame he ka mokut hnyin, ke u me he ka he me hai kubö hnyi li can, me mokut ju; ke e ame he ka ha köu hanymâm he ka ânyâ.

⁵ Haingen kâu, ka habe, Oge me he ka ânyâ hia hnâm hna ha kônya.

⁶ Me e ame be ka hnyi hna huje hwit, me ânyâ hia hna hûna kâu ge ûngon.

⁷ Ke a hia but Boaza han me ic, ke ame senyin hnyekon, me e ame he ka mokut hnyi baten hna khon bali: me momo ame he hmecik, me hai kubö huyi li can, me mokut ju.

⁸ Ke hnyi wanbenset ame ot at me hwio; ke wâ bi wale momo ame mokut hnyi li can.

⁹ Ke haingen, ka habe, ü ia? Haingen, Inya Rutha athnyabaem, u me he ka khavö nya a athnyabaem ge baten ânyâm imano, anyin a u at a ti hanen anyitin lap.

¹⁰ Me e ame ha, ka habe, E so u hnahic nokuk ga Iehova: e beönua ânyâm betenge walang ang hnyi obiny, hon ehac hnyi hwân, anyin a u je ca hnu hoton je hidröu, ame me ca tren omjeû, kʼ ame ne tren ta ûnyi.

¹¹ Ke walang nokuk i u ma ca ot; oge me he ka ânyâ hobi köu helâ me hna ha gam, anyin a wâ but taun hia anyin lahanök a u momo ae so hwakecin.

¹² Ke e hnathu oge me ti hanen köu, ke so bi e hu ke at ae hakekeny hmonyin köu hnyi lap.

¹³ Me mokut ju i hnyi lit ang, ke hnyi hnyomakatu, ame ne he ka ânyâ köu hanymen at ame bi hanen lap, me e so; e hamen he ka ânyâ: ke ame ne hôcö he ka ânyâ köu hanymen at ame bi hanen anyitin lap, awe, hamök bi he ka ânyâ köu hanymen at ame hakekeny köu, kia inya Iehova: mokut ju, ke ne o but ame lany dö.

¹⁴ Ke e ame mokut hnyi li can ke ne o but hnyi haolany, kʼ ame köûö hnyi okubelit. Anyin a haingen at, ka habe, Ca he ka ha a ga mwi ang momo hnyi hna huje hwit.

¹⁵ Ke ame ha bi at, ka habe, Hö jem ânyâm ûkot, me kât; ke e ame kât, me at ame tuluto je tap bali a siks me ip hon ûkot; ke e ame he ka hnyi taun.

¹⁶ Ke e ame o but unyin ûngon, ke haingen, ka habe, U ia nokuk? Me e ame thumeto hia ge hna ânyâ kâu hnen at.

¹⁷ Haingen, ka habe, E ame ham kônya tap bali eang a siks je tulut; anyin a haingen, U ma ca he ka ûngom ke ba ûnyi.

¹⁸ Ke haingen momo, ka habe, Me laba ju ûnguk, me wâ ûnyi ame he ka o: anyin ame ca he at ka menâ, kʼ ame he hnyi bong ang ka umo ûnyi ang.