Rutha 1 - Iaai Bible 1901 (New Caledonia)

¹ HNYI ûen musi anyin hnyat owisa, ame o but hmiâ hnyi hnyei. Ke ame he ke at Bethe-leema-juda he ka laba kanyua hnyi hnyei Moaba, e, me âiân, me lakon li baga.

² Ke Elimelek ien at, ke Naomi ien âiân, ke Malona, me Kiliona ien li lakon, je hnyat Eferatha ûheny Bethe-leema-juda. Ke ödrin e o but hnyi hnyei Moaba, me laba eling.

³ Ke ame mokcu Elimelek öiö Naomi, ke e biju me li lakon.

⁴ Ke ödru me ve hok öiödru anyin je momo Moaba; Orepa ien ke at, ke Rutha ien ke at: ke ödrin e laba eling helâ me ten je huna.

⁵ Ke ame tha mokcu Matana, me Ki liona; ke ödrin e mok degecâ monu hnen âiân me lakon li baga.

⁶ Me e ame todrö me laûngon, me hmetu ûheny hnyi hnyei Moaba: anyin a long ut hnyi hnyei Moaba a Iehova ame senâ lakeiny me me ha ödrin.

⁷ Ke e ame he ûheny hnyi dok e ame laba hnyin, ke tha he me laûngon; ke ödrin e vheno gethen he ka hmetu ka hnyi hnyei Juda.

⁸ Haba Naomi ame ha ka laûngon, ka habe, E, ve hmetu ju öbu ka hnyi li uma umen lahinyöbu: ke so ame he Iehova ka betenge gabu, helâ me hnöbu hna ânyâ ka li komok, mönya minya.

⁹ E so ame he Iehova he ka omenʼ öbu hnyi hnyaban laöiöbu. Me e ame ûcimhnyimak mödru, me tenge gan hmâ.

¹⁰ Ke ödru me thu bi kâu, ka habe, ohmu me he ka tha he mou ka je lahanâm.

¹¹ Haba Naomi ame ha, ka habe, Hmetu ju öbu laûnguk: öbu me he ka tha he mönya geû? hawa, e hu je lakuk hmetu bi baga eû hnyi hnyekuk me me li öiöbu?

¹² Hmetu ju öbu laûnguk, ke he thö; anyin oge somaca but, ke ame ca he hmetu ka hu öiök. Oge ne ha, ka habe, E hu hnageju gak, oge ne he ka hu öiök eâu hnyinghet, me hnokoâ je baga:

¹³ hawa öbu me he ka laba ke ne o but ödrin e gan dut? hawa, öbu me he ka bec me ca hu âiân? Ohe laûnguk: anyin ae gan hmâ anyik vec gabu, anyin a Iehova ame ip hnyamen huk.

¹⁴ Me ödrin e ûtengiö, me tenge hmetu: ke haba Orepa ame ûcimhnyimak me ûngon; ke Rutha ame kece hmâ bi kâu.

¹⁵ Me haingen momo, ka habe, Wâ bi, a hmetu but liamekeiny möu ka ta je lahanen, me khongon: bethe hmetu minya ju hoton liamekeiny möu.

¹⁶ Me Rutha ame ha, ka habe, Ca ûjongi nya bi he ka hna degeci u, me hmetu gam; anyin a haba dok u ma he ka hnyin me oge me he bi nya ka he kâu: ke haba dok u ma he ka labâ, me oge me he bi nya ka labâ: me haba lahanâm ame he ka lahanök bi, me Khongom ama Khonguk bi:

¹⁷ haba dok u me he ka mokcu hnyin me oge me he bi nya ka mokcu eling, mʼ adre me he ka konim nya hnyin: e so ame he Iehova ka ânyâ helâe kônya me bi hanen bi, ame ne he ke ûnyi ka ovesei otu, he so bi mok thibi.

¹⁸ Ke a wâ hnen momo a ga hwege hnyekon kâu he ka tha he më, me e ame ca ha hmetu bi hofuc kâu.

¹⁹ Ke ödru me tha he ke ne o but hnyi Bethe-leema. Ke ödru me o hnyi Bethe-leema, me ame bwebwet hia taun gadru, ke adre me ha, ka habe, Ame ne Naomi la eang?

²⁰ Ke haingen ködrin, ka habe, Ca ha iök bi, me, Naomi, ke ha iök bi, me, Mara: anyin a haba hwakecin Aekhanahia me gan hmâ hiny kônya.

²¹ Oge me he thö kʼ iny unöngötö, ke Iehova ame ohmetu nya ke ba ta ûnyi gak: ieû gabun öbun e ha iök me Naomi, anyin a Iehova ame owisa kongo kônya, ke haba Aekhanahia ame oveci nya?

²² Me ame tha hmetu Naomi me Rutha a ûngon, wale at Moaba, at a hmetu ûheny hnyi hnyei iny at Moaba: ke ödru me o but hnyi Bethe-leema hnyi ûen adre hwân he ka meno bali.