Roma 9 - Iaai Bible 1901 (New Caledonia)

¹ INYA oge me ha hnathu ûnyi hnyi Keriso, oge me ca thoi bi, ame ohnathu nya hnen anyik ûnykûm sah ûnyi hnyi Hanu Kap,

² ka habe, iny vec gan hmâ, ke hlöuhlöu bala bi hnyekuk.

³ Anyin a helâke oge me wek la, a gʼ adre me he ka ovesei nya me Keriso can je liamekeiny mönya, wale je lahanök hoton unyin:

⁴ ödra at Isaraela; wale adre me wia me me lakon, me e hu gadra hmanenang, me ta je ûhihinyköu, me hna ham hnanyibu, me hmi, me je hna ha bânâ;

⁵ ödra je mâtrâniny ta je lakamöta, helâe minya Keriso hoton unyin, e nua hon ta je ûnyi hia thitliö, Khong adre haisoâ nyiele balua. Amen.

⁶ Ke ca helâke ame ûnyi baû hofuc hwan Khong. Anyin a ca tavat Isaraela hia bi ödra hnyi Isaraela:

⁷ ke ca je lakon hia anyin a je mâtrâni Aberahama ödra: ke so bi, Adre me he kaba je mâtrânâm ûnyi ga Isaaka.

⁸ Walang bongon, a haba je lakon unyin, me ca je lakon Khong bi ödra; ke haba je lakon hna ha bânâ, me, adre me ha wale je mâtrân.

⁹ Anyin a walang hofuc adre ha bânâ, ka habe, Hnyi ûen ang bi, oge me he ka o, ke ame he ka hu da nöku Sara.

¹⁰ Ke ca wale thibe e; a erkin dut Rebeka hnen ke at, wale Isaaka a kamöta—

¹¹ ke tiga ca hnokoâ bi, ke ba minya so me hulo ödru me ânyâ, haba me me tethmâ ju hna uny kûme hnen Khong hoton hnen hna ûca, ca ûnyi ge huliwa, ke ûnyi bi gan at ame hawâ,

¹² me adre me ha ka momo, ka habe, Ame he atö ka bi athnyabainy wakeiat

¹³ Helâ me hna sihnalimen, ka habe, Oge me betenge ga Jekob, kʼ iny hukötiö Esau.

¹⁴ Anyin a wale, ieû ate me he ka ha? Hawa e hu unyin Khong hwakecin ae ca wisa bi? Ohe.

¹⁵ Anyin a e ame ha kö Mose, ka habe, Oge me he ka betenge ge hnok hna wek he ka betenge gan, ke oge me he ka vec betenge ge at oge me wek he ka vec betenge gan.

¹⁶ Waleling me me ca ûnyi gan bi at ame weny, ke ca ûnyi minya ge at ame wadring, ke ûnyi bi ge Khong, at ae betenge.

¹⁷ Anyin a haingen hna sihnalimen kö Farao, ka habe, Can thibi eling oge me otilö u, me inye he ka omanenâ manik man ûnyi gam, me me lung iök bi hnyi hmeledrany hia.

¹⁸ Awe, e ame betenge ge at e ame! betenge gan, ke e ame onâkâ at e ame beonâkâ kâu.

¹⁹ Ke u me he la ka ha könya, ka habe, Ieû gan a e ame û? Ke ie at ame hagutâ weny bi?

²⁰ Ohe, at lö, u ia u me ivinö me Khong? Hawa, ame he ûnyi adre op ka ha ka at ame op e, ka habe, Ieû gam u ine up nya helâng.

²¹ Hawa ge at ame op kaia kânâ, e ame ca musi ka kânâ, he ka op utkaia ae so, ame ne utkaia ae kong bi?

²² A ne beomanenâ tang hmonyin Khong, me olungâ maniny man, me ame hokhnyokâ beû hmâ ta je utkaiainy hmonyin waleji adre penapena hobi kâu hnaûhango:

²³ me me he ka omanenâ ûnyi hnathuiny anyin hmanenang ka ta je utkainy ibetengiö, waleji e ame penapena hnân hobi kâu hmanenang,

²⁴ wale öta, hnyat e ame hawʼ öta minya, a ca hake at Juda thibi, ke Aten minya bi ta je hnyei?

²⁵ Helâ me hnen hna ha hnyi Hosea, ka habe, Oge me he ka hawʼ ödra, me lakeik, waleji a ca lakeik; Ke oûnykûmik, waleji a ca oûnykûmik bi.

²⁶ Ke haba hnyi dok adre me ha kodra, ka habe, Ca latök bi öbun, Me adre me he ka hai ödra eling, ka habe, Je lakon Khong ae möt balua.

²⁷ Ke haba Isaia ame hâiâ at Isaraela, ka habe, A ne helâ me önyin köiö ûseiny at Isaraela, me adre me he ka omelö kolon:

²⁸ anyin a Than ame he ka ânyâ hnen hna ha eang hmeledrany kʼ ame he ka oumo me okhulitâ e.

²⁹ Helâ me hna ha ehac ga Isaia, ka habe, A ne ca hna but ke kolon gata hnen Than tuhan sabaoth, Me ate me ne he ka helâ me Sodoma, me wiʼ öta e me ûcû me Gomora.

³⁰ Anyin a wale, ieû ate me he ka ha? A gʼ ame hu hwakecin ae wisa ge Aten ta je hnyei, waleji adre me ca hnu hoton hwakecin ae wisa, wale a hwakecin ae wisa hoton labageju:

³¹ ke haba at Isaraela adre me hnu hoton hnanyibuiny hwakecin ae wisa, ke adre me ca o bi ka hnyi hnanyibu eling:

³² Anyin a ieû? Anyin adre me ca elâm e hnyi labageju, ke helâke me hnen huliwa. Adre me thö hnyi veto hnân othöâ;

³³ helâ me hna sihnalimen, ka habe, Wâ bi, inya oge me ip hnyi Ziona veto hnân othöâ me kic hnân öüo: Ke ame ca he bi ka hmehma at ame labageju kâu.