Roma 8 - Iaai Bible 1901 (New Caledonia)

¹ ANYIN a wale, e ba hmetu hnaûhango kodra unyin Keriso Iesu.

² Anyin a haba hnanyibuiny Hanu me möt unyin Keriso Iesu, me ame hnö nya ûnyi hnyi hnanyibuiny hulo me mok.

³ Anyin a haba ûnyi ae pason ka hnanyibu, can ae sënyin ûnyi ge unyin, me haba Khong ame kunâ hing Nokon, helâ unyin ae kong, ke hnân hudiny hulo, me me ohnaûhangoâ hulo ûnyi hnyi unyin:

⁴ me me hwâdâ but ûnyi gata hna hûna hnyi hnanyibu, öta tavat ate me ca hnu hoton unyin ke so bi hanu.

⁵ Anyin a haba tavat adre me hnu hoton unyin adre me hnyokâ ta je ûnyi hnyi unyin; ke haba tavat adre me hnu hoton hanu adre me hnyok ka ta je ûnyi anyin hanu.

⁶ Anyin a haba behnyok ka unyin, me, wale mok; ke haba behnyok ka hanu, me, wale möt, me hnahic:

⁷ anyin a iwahnaihmiony me Khong he ka hnyok ka unyin; anyin ame ca long bi hoton hnanyibu anyin Khong, anyin ae ca khana bi:

⁸ ke haba tavat hnyi unyin, me ca khanʼ ödra bi he ka osenyinâ Khong.

⁹ Ke öbun ca aten bi unyin, ke ta je aten bi hanu, a ne eû hnyi hnyibun Hanon Khong. Ke a ne ca hu bi ge ke at Hanon Keriso, ca aten bi at eling.

¹⁰ Ke a ne eû hnyi hnyibun Keriso, a mokut unyin bi can hulo; ke möt bi hanu can hwakecin ae wisa.

¹¹ Ke a ne laba eû hnyi hnyibun Hanon at ame omeli Iesu hmetu ûnyi hnyi hna mok, ame he minya at ame omeli Keriso Iesu ûnyi hnyi hna mok, ka omelö ta je unyibun ae bobot ûnyi ge Hanon, at ame laba eû hnyi hnyibun.

¹² Hnyat me lakeiny lö, anyin a wale hanymöta he ka bi hwaban, ca ka hnyi unyin bi, mate me he ka möt hoton unyin:

¹³ anyin a öbun e ne möt hoton unyin, hamöbun he ka mok; ke öbun e ne hlingâ ta je huliwa hnyi unyin ge hanu, öbun e he ka möt.

¹⁴ Anyin a haba tavat ame su ödra Hanon Khong, me ödra thibi e je lakon Khong.

¹⁵ Anyin a öbun e ca kap hanon hwenbâ mʼ öbun e he ka ot; ke so bi öbun e kap hanon hna wia me me lakon, wale mʼ ate me ha, ka habe, Aba, Cica.

¹⁶ Haba Hanu ame ka tha ohnathoâ me je hanuta, a öta je lakon Khong:

¹⁷ ke a ne lakon, me ame he ka je mâtrân bi; wale je mâtrâniny Khong, ke tha je mâtrân me Keriso: ate ne tha vec më, mate me be ka tha hmanenang mē.

¹⁸ Anyin a inya oge me wâ, ae ca ûcû ta je vec hnyi ûen ang, he ka oûcoâ hnahic adre me he ka omanenâ köta.

¹⁹ Anyin a haba hmeledrany ame halubahingen me ti weny gan hmâ hna omanenâ lakon Khong.

²⁰ Anyin adre hwenbâ hmeledrany ka hnyi ûnyi ae ca ûnyi hnathu, ca ûnyi ge weny, ke hnen bi e at ame hom hwenbâ,

²¹ me gejon a gʼ adre me he ka hna hmeledrany ûnyi hnyi hwenbâ ae bobot, ka hnyi hna hna bâûâ anyin lakon Khong.

²² Anyin ae khanʼ öta a gʼ ame mâng me vec hmeledrany hia ke ne o but hnyi bong ang.

²³ Ke ca hake e, ke öta minya hnyat ae hu gata wan a bân anyin Hanu, haba öta ate me mâng minya eû hnyi je hnyekuta, me halubahingen he ka wia me me lakon, wale hna omelö ta je unyita.

²⁴ Anyin adre me omeli öta ûnyi ge geju: ke haba geju ae manen me ca geju bi eling: anyin a ie at ame gejon ûnyi e ame wâ?

²⁵ Ke ate ne gejon hnöta hna ca wâ, ate me halubahingen e me hokhnyok.

²⁶ Helâe minya ame hadruâ anyita sënyin hnen Hanu: anyin ae ca khanʼ öta wia bongon he ka hic; ke hnen Hanu hna sumat hobi köta hnyi mâng ae ca hnân ha bi;

²⁷ ke haba at ame elâm ta je hnyok, me e ame wâ ûnykûmanen Hanu, anyin a e ame sumat hobi kâu tavat ae kap hoton weny Khong.

²⁸ Ke e khanʼ öta a gʼ ame tha huliwa ta je ûnyi hia me me so ka tavat adre me hnyok ka Khong wale tavat ame hawʼ ödra helâ me hnen hna ûnykûme.

²⁹ Anyin a haba tavat waleji e ame wâhmakhmetu ödra, me e ame ip ödra minya he ka tha bongudra me tulutiny Nokon, me me atö bi e unyin je liamekeiny ae se hia:

³⁰ ke haba hnyat e ame okabâ adrem, me e ame hawʼ ödra bi: ke haba tavat e ame hawʼ ödra, me e ame haiwisʼ ödra bi; ke haba tavat e ame haiwisʼ ödra, me e ame ohmanenangi ödra bi.

³¹ Ieû ate me he ka ha hnyi ta je ûnyi e? A ne tha hien mʼ öta Khong, ia ûcûta?

³² Hawa, ame ca he ka ham bâûâ köta ta je unyi hia, hnen at ame ca behânâ Nokon, kʼ ame hna but e hobi köta hia?

³³ Ie at ame he ka bi fuco hna ûca hnen Khong? Haba Khong thibi at ame haiwisa;

³⁴ ke ie at ame he ka ohnaûhangoâ? Hamen Keriso, at ame mok me möt hmetu ûheny hnyi hna mok, e but hnyi ke keihen metân Khong, kʼ ame khöû hobi köta.

³⁵ Ie at ame he ka öûsâkâû öta me ibetengiö anyin Keriso? hawa, vec, hlöuhlöu, hna sela, hmiâ, he thu, outen mok, hele vat?

³⁶ Helâ me hna sihnalimen, ka habe, Adre me hlingʼ ohmun hnyi ta je bong can u; Adre me oûcû ohmun me ta je mamoe hnân hlingâ.

³⁷ Ohe, e tuta balua hon ta je ûnyi hia eling ûnyi ge at ame betenge gata.

³⁸ Anyin ae mou thö eû hnyi hnyekuk, ae ca khana bi mok, me möt, me ta je angela, me tavat musi, me ta je ûnyi walang, me ta je ûnyi ame he ka o, me ta je man,

³⁹ me dok ae görany, me dok ae dit, me ke ûnyi adre hia but op, e ca khana ta je ûnyi e he ka oûsâkâû öta me ibetengiö anyin Khong unyi Keriso Iesu a Tuhöta.