Roma 6 - Iaai Bible 1901 (New Caledonia)

¹ ANYIN a wale ieû ate me he ka ha? Hawa, ate me he bala ka laba hnyi hulo, me me gan hmâ but ibetengiö baû?

² Ohe. Öta tavat a mok ka hnyi hulo, kʼ ate me he ka kâmâu he ka möt bala hnyin?

³ Hawa, e ca khanʼ öbun a haba öta hia tavat adre me bapataisoâ kö Iesu Keriso, me adre me bapataiso ka hnyi anyin mok?

⁴ Anyin a wale adre me tha konim öta më hnen hna bapataiso ka hnyi mok: mʼ ate me he ka vheno möt ae teb ûnyi, helâ me adre me otilâ Keriso ûnyi hnyi hna mok hnen hmanenanginy Kamen.

⁵ Anyin a ne tha öta me hnyi ûhoûcû me anyin mok, ate me he bi ka helâe minya hnyi möt hmetu;

⁶ ke khanʼ öta a gʼ adre me tha osatauroâ më bonguta ehac, me me hia but unyin ae hulo, mʼ ate me ca he ka bâ ge hulo;

⁷ anyin adre me ca hâiâ at a mokcu a e at hulo.

⁸ Ke öta ka tha mok me Keriso, me ate me labageju a gʼ ate me he ka tha möt minya më;

⁹ e khanʼ öta a ga möt hmetu thö Keriso ûnyi hnyi hna mok, kʼ ame ca he hmetu ka mok; kʼ ame ca he hmetu mok ka ton.

¹⁰ Anyin a haba mekiny, me ame okhaca mok ka hnyi hulo: ke haba anyin möt, me ame möt bi ka Khong.

¹¹ Helâe minya, ûnykûme ju öbun a öbun e mok ka hnyi hulo, kʼ öbun e möt bi ka Khong ga Iesu Keriso.

¹² Anyin a wale e so e ca he ka dokhu hulo hnyi je unyibun ame he ka mok, wale he ka long hoton je weny e:

¹³ ke haba khaca, ca he ka hna je ong outhunyibun ka hnyi hulo hnân omjehen hwakecin ae ca wisa bi; ke ka hnʼ öbun dut ka Khong, helâ me tavat adre me möt hmetu thö ûhedra hnyi hna mok, me je outhunyibun hnân omjehen hwakecin ae wisa ka Khong.

¹⁴ Ke ame ca he hulo ka musi öbun bi; anyin a ca öbun bi hmelen hnanyibu ke hmelen bi ibetengiö baû.

¹⁵ Ama hawa? ate me he ka ânyâ hulo anyin a ca öta bi hnyi hmelen hnanyibu, ke hmelen bi ibetengiö baû? Ohe.

¹⁶ E ca khanʼ öbun, a haba at öbun e ka hnʼ öbun kâu he ka bi athnyabainy me long hoton me je lathnyabainy jut öbun ka at öbun e long kâu; ame ne hulo, ka hnyi mok, kʼ ame ne ûling, ka hnyi hwakecin ae wisa?

¹⁷ Ke oleâ ju ka Khong, anyin a öbun e bi athnyabainy hulo ehac, ke walang ang öbun e long ge hnyekubun hoton tulutiny hofuc adre me hnʼ öbun ka hnyin;

¹⁸ ke adre me hna baûʼ öbun bi ûnyi hnyi hulo, mʼ öbun e bi athnyabainy hwakecin ae wisa.

¹⁹ Inya oge me ha helâ me bongon at, anyin ae sënyin je unyibun: anyin a öbun e hna je outhunyibun he ka bi athnyabainy hwakecin ae ikiki ehac me hulo, he ka ânyâ hulo; ke walang ang e so öbun e hna but helâe je outhunyibun he ka bi athnyabainy hwakecin ae wisa me hwakecin ae kap.

²⁰ Anyin a öbun e tiga lathnyabainy hulo ehac, me adre me hna baûʼ öbun hnyi hwakecin ae wisa.

²¹ Ke ieû wan ae bu köbun ehac hnyi ta je ûnyi öbun e hmehman walang ang? anyin a haba obiny ta je ûnyi eling, me mok.

²² Ke walang ang adre me hna baûʼ öbun ûnyi hnyi hulö, kʼ öbun e bi athnyabainy Khong, me hu but gabun wan ka hnyi hwakecin ae kap, ke haba obiny me möt ame ca ba balua.

²³ Anyin a haba hwaban hulö, me mok; ke haba bwihlany a ham bâûâ hnen Khong, me möt ame ca ba balua, ûnyi ga Iesu Keriso a Tuhöta.