Roma 5 - Iaai Bible 1901 (New Caledonia)

¹ ANYIN a wale, adre me haiwisʼ öta hnen labageju, ke so ate me ûsoköu me Khong a deny Tuhöta Iesu Keriso;

² a deny e adre hia but hnʼ öta ûnyi ge labageju ka hnyi ibetengiö baû eang ate me tot hnyin; ke so ate me senyin me gejon hmanenanginy Khong.

³ Ke ca walang thibi, ke so ate me senyin minya hnyi anyita je vec: anyin ae khanʼ öta a gʼ ame okûâ hokhnyok ûnyi ge vec;

⁴ ke haba hokhnyok ame okûâ wâhmakhmetoâ; ke haba wâhmakhmeto ame okûâ gejon:

⁵ ke haba gejon ame ca ohmehma bi; anyin adre hia but hingâlâ ka hnyi je hnyekuta ibetengiö anyin Khong ûnyi ge Hanu Kap waleji adre ham köta.

⁶ Ke hnyi ûen a öta tiga sënyin, me ame mokcu Keriso, hnyi ûen ae ûcû, hobi kâu tavat ae kong.

⁷ Anyin a helâke e pason ka ke at he ka mok me hwaban at ae wisa hwakecin: ke so bi ame ne hu la ke at ae hwege he ka mok hnân hwaban at ae so.

⁸ Ke Khong ame omanenâ kötâ anyin ibetengiö, anyin ame mok Keriso me hnân hwabʼ öta ke öta tiga monu.

⁹ Ke walang ang adre me haiwisʼ öta ûnyi ge dreny, awe, adre me he ka ti omeli öta minya ûnyi gan hnyi hmonyin.

¹⁰ Anyin a ne ûsoköu öta me Khong ûnyi ge mok anyin Nokon, waleji kʼ öta tiga iwahnaihmiony, me e gan hmâ hna he ka omeli öta hnen anyin möt, kʼ ate me ûsoköu më.

¹¹ Ke ca hake wale thibi ang, ke ate me senyin ka Khong ûnyi ge Tuhöta Iesu Keriso, wale ate me kap ûsoköu ûnyi gan.

¹² Anyin a wale, ame o but hulo ka hnyi hmeledrany ûnyi ge at a khaca, kʼ ame o mok can hulo; ke ame o but mok ka tavat hia, anyin ae monu hia:—

¹³ anyin e hu hulo hnyi hmeledrany ke ne o but ame o hnanyibu: ke adre me ca he ka ha hulo, e ka ba hnanyibu.

¹⁴ Ke so bi, ame dokhu mok hwân ga Adamu ke ne o but kö Mose, hon tavat ae ca monu helâ me hna hanyâûâ ga Adamu, waleji ame ûöhûco at ame he ka o.

¹⁵ Ke ca tha ûcû bi hna hanyâûâ me hna ham bâûâ. Anyin ame ne mok ut tavat ae se hia ûnyi ge monu anyin at a khaca, awe, ame he ka ti si ibetengiö baû anyin Khong, me hna ham hnen ibetengiö baû anyin at a khaca, Iesu Keriso, ka tavat ae se hia.

¹⁶ Ke ca tha ûcû bi hna ham bâûâ me at a khaca ame ânyâ hulo: anyin ame o but hna bi hwaban ûnyi ge monu a khaca ka hnyi hnaûhango, ânyin ame o but hna ham bâûâ ûnyi ge je monu ae se hia ka hnyi hna haiwisa.

¹⁷ Anyin a ne ûnyi ge monu anyin at a khaca, ame dokhu mok ûnyi ge at a khaca; awe, e nua bi hnödra hna he ka dokhu hnyi möt ûnyi ge at a khaca, a Iesu Keriso, wale tavat ae hu gan hmâ kodra ibetengiö baû, me bwihlanyiny hwakecin ae wisa.

¹⁸ Anyin adre me ohnaûhangoâ tavat ae se hia ûnyi ge monu a khaca; helâe minya ame o bwihlany ka tavat hia ame haiwisʼ ödra mʼ adre me möt ûnyi ge hwakecin ae wisa a khaca.

¹⁹ Anyin ae kong ut tavat ae se hia ûnyi ge ca ûling anyin at a khaca, helâe minya adre me he ka haiwisa tavat ae se hia hnen ûling anyin at a khaca.

²⁰ Ke ame o but minya hnanyibu, me ame se hia but monu; ke haba dok ame gan monu hnyin, me wale gan hmâ but ibetengiö baû:

²¹ ke haba hulo ame musi ka hnyi mok, me helâe ame he ibetengiö baû ka musi hnen hwakecin ae wisa ka hnyi möt ame ca ba balua, a deny Iesu Keriso a Tuhöta.