Roma 3 - Iaai Bible 1901 (New Caledonia)

¹ KE ieû ke ûnyi ae nua ge at Juda? ke ieû troban peritom?

² E gan hmâ hnyi ta je hwakecin hia: walang a bân, a gʼ adre hna kodra ta je hofuc hwan Khong.

³ Eja ke ne adre ne ca labageju keihen, me ieû thö? e khana anyidra ca labageju he ka oûnyibâûâ hwakecin ae hnathu anyin Khong?

⁴ Ohe; eja ke ne a ne thoi tavat hia, me so e me hnathu bala bi Khong; helâ me hna sihnalimen, ka habe, Mʼ u me he ka wisa hnyi hwâm ta je hofuc Me tom, at ka he ka hnei u.

⁵ Ke a ne hnân omanenâ hwakecin Khong ae wisa hnen hwakecita ae ca wisa bi, ieû ate me he ka ha? Hawa, e ca wisa hwakecin Khong, at ame bi hwaban ge hmonyin? (Inya oge me fuc helâ me at.)

⁶ Ohe; a ne helâe ame he Khong ka kâmâu ka hnö hmeledrany?

⁷ Ke ame ne he anyik thoi ka olungâ hnathuiny Khong me ogânâ e, hnân eû he ka hnei nya hmetu helâ me at ae kong?

⁸ ke geû, adre me ca he ka ha, ka habe, (helâ me hnödra hna haikongu ohmun, ke helâ me hna bi fuc ohmun ge keihen, ka habe, haingöhmun), Otin e he ka ânyâ monu me me o but so? e wisa hnaûhango a ödra.

⁹ Ke hawa, e kong hnöhmun ke so bi hnödra? Ohe, e ba; anyin ate hia but owisa a tha at Juda me at Heleni hia hmelen hulo;

¹⁰ helâ me hna sihnalimen, ka habe, E ba at ae wisa, e ba hmonyin me khaca;

¹¹ E ba at ame wâ ûnykûme, E ba at ame elâm Khong;

¹² Adre me saû hia but, adre me tha monu but; E ba at ame mâdrâ so, e ba hmonyin me khaca:

¹³ Helâ me erkemok ae memang je jeköwidra; Kʼ adre me iyawo ge je bohmödra: Eû hnyi hnyin je esongodidra öginyin asip;

¹⁴ E unöngötö je hnyimödra ge ûhangö me hofuc ae hiny:

¹⁵ E logot li cadra he ka hingâlâ dra;

¹⁶ Eû hnyi dedra je gethen ûohia, me hnyok ae vec;

¹⁷ E ca khanʼ ödra gethen deny hnahic:

¹⁸ E ba ot ka Khong hnyi hnyimakodra.

¹⁹ Ke e khanʼ öta a haba ta je ûnyi adre ha hnyi hnanyibu, me adre me ha ka tavat adre me laba hmelen hnanyibu; me me he ka ohnyibö ta je hnyem hia, mʼ adre me he ka ohnaûhangoâ hmeledrany hia thi-thö ûnyi ge Khong:

²⁰ anyin ae ca khana bi ke at he ka wisa hnyi hnyimakan ge ta je huliwainy hnanyibu: anyin ae manen dut hulo ge hnanyibu.

²¹ Ke manen dut walang ang hwakecin ae wisa, ke ca ûnyi ge hnanyibu bi, kʼ ame ohnathoâ hnen hnanyibu me ta je perofeta;

²² wale hwakecin ae wisa anyin Khong hnen labageju kö Iesu Keriso hobi kodra hia tavat adre me labageju; anyin ae ve bongon bi;

²³ anyin ae kong tavat hia, kʼ adre me ca o ka hnyi hmanenanginy Khong,

²⁴ ke adre me haisoâ bâûâ bi öta hnen anyin ibetengiö ûnyi ge ûhomeli wale unyin Keriso Iesu:

²⁵ a hut ame oâ hnen Khong, deny labageju ka hnyi dren, mʼ adre me he ka omanenâ hwakecin ae wisa ûnyi hnyi hnen hna thang ut ta je hulo adre ânyâ ehac, ûnyi hnyi hokhnyok beû hmâ anyin Khong;

²⁶ mʼ adre me omanenâ hnyi ûen ang hwakecin ae wisa: me me ka wisa bi, kʼ ame he minya ka haiwisa at ame labageju kö Iesu.

²⁷ Anyin a wale, ewa hna ohobeluâ? E ba hnen bi e. Hnen ie hnanyibu? hawa, ge huliwa? Ohe; ke so bi ûnyi ge hnanyibuiny labageju.

²⁸ Anyin a wale, ate me ûnykûme, ka habe, adre me haiwisa at ge labageju, ke ca ha bi huliwainy hnanyibu.

²⁹ Hawa, e Khongon at Juda thibi? ke ca Khongon Aten minya bi ta je hnyei? Eke, me Aten ta je hnyei minya:

³⁰ awe, ame ne khaca thibi Khong, kʼ ame he ka haiwisa hna peritom ûnyi hnyi labageju, ke tavat adre ca peritom bi hnen labageju.

³¹ Hawa, ate me he ka oûnyibâûâ hnanyibu hnen labageju! Ohe; ke so bi ate me otilâ hmâ hnanyibu.