Roma 2 - Iaai Bible 1901 (New Caledonia)

¹ ANYIN a wale, at ame ûnykûm lö, e ba hnân thu gam: anyin a haba hnâm hna ûnykûme ke at, me u me ka hamâm bi ohnaûhangöi u; anyin a u me ka ânyâ ta je ûnyi e.

² Ke e khanʼ öta a haba Khong ame bi hwaban hoton hnathu kodra adre me ânyâ ta je ûnyi helâe.

³ Ke tha lö, at ame ûnykûme tavat, a gʼ adre me ânyâ ta je ûnyi helâe, ke u me ka ânyâ minya bi, hawa, u je ûnykûme he ka ohaûâ hna bi hwaban ge Khong?

⁴ Hawa u je hociâ omjeû wale hwakecin ae so, me hokhnyok, me lingvec, ke u me ca wâhmakhmetoâ a gʼ ame lili u ka hnyi ietra, hnen hwakecin ae so anyin Khong?

⁵ ke can hnyekom ae nâk ke ca ietra, me u me ûkhöûnâ tang hmonyin hnân hobi köu bi hnyi bonginy hmonyin, ke hobi kâu ûen adre me omanenâ hwaban ae wisa ge Khong;

⁶ wale at ame he ka ve ham ka tavat helâ me hnödra hna ânyâ:

⁷ wale, möt ame ca ba balua ka tavat adre me tethmâ hnyi huliwa ae so, me elâm hmanenang me hna ogânâ, me hna ca bobot bi:

⁸ ke hmonyin me wathethot ka tavat adre me hûkötö, me tavat adre me ca long bi hnathu, ke adre me long hoton hwakecin ae ca wisa,

⁹ kʼ ame he ka hlöuhlöu me vec ae gan hmâ hnyekon tavat hia adre me ânyâ hwakecin ae kong, a bân at Juda, me at Heleni minya ju:

¹⁰ ke hmanenang, me hna ogânâ, me hnahic kodra hia adre me mâdrâ so, a bân ka at Juda, me ka at Heleni minya ju:

¹¹ anyin a Khong ame ca bi haten tavat.

¹² Anyin a baba tavat adre me ânyâ monu ke ba hnanyibu, me adre me he ka mok ke ba hnanyibu: ke haba tavat adre me ânyâ monu ke hu hnanyibu, me adre me he ka hnei ödra helâ me hnanyibu;

¹³ anyin ae ca wisa hnyi hnyimakan Khong tavat adre me long hnanyibu ge hnyiköny, ke adre me he ka haiwisa tavat adre me long hoton hnanyibu:

¹⁴ anyin a e ka ka ânyâ baûâ bi hnen Aten ta je hnyei ta je ûnyi ae ûcû me hnanyibu, ke ba hnanyibu gadra, awe, haba tavat eling, wale ae ba hnanyibu gadra, me ödra bi hnân ke hnanyibu hobi kodra bi;

¹⁵ anyin adre me omanenâ ta je huliwainy hnanyibu adre set hnyi je hnyekudra, kʼ ame tha ohnathoâ hnen sah oûnykûmidra, ke haba je ûnykû-menödra adre me ve haikongoâ ame ne ve haisoi ödra bi;

¹⁶ hnyi bong ame he Khong ka hnö ta je ûnyi ae iyong anyin tavat, ga Iesu Keriso, hoton anyik ûthumetu ae so.

¹⁷ Ke a ne iâm bi ien at Juda, ke u me gejon hnanyibu, me hobeluâ Khong,

¹⁸ me wâ wia weny, me wâ soâ ta je ûnyi ae ti so, kʼ adre nö u ûnyi hnyi hnanyibu,

¹⁹ ke u me ûnykûme a u at ae ûcû he ka su je wadröu, me omelami ödra adre me laba hnyi dok ae lit,

²⁰ me at ame nâ at ae monu, me at ûne ka ta je mendreng, at ae hu tulutiny metâ me hnathu hnyi hnanyibu;

²¹ u at ame nâ ke at, hawa u je ca nö u bi? u at ame khetâ, ka habe, ca he ke at ka venöu, hawa, u me venöu bi?

²² u at ame ha, ka habe, ca bi ûnyi monu, hawa, u me bi ûnyi monu bi? u at ame hûkötiâ je hnatheat, hawa, u me venöu omjehen ta je uma kap?

²³ u at ame hobeluâ hnanyibu; hawa, u me oûnyibâûâ Khong hnyi hnâm hna hanyâûâ hnanyibu?

²⁴ Anyin adre me haikongoâ ien Khong hnen Aten ke je hnyei can bi öbun, helâ me hna sihnalimen.

²⁵ Anyin ae hu troban hna peritom, u je ne long hoton hnanyibu: ke so bi u je ne hanyâûâ hnanyibu, awe, ca peritom hmetu but ânyâm peritom.

²⁶ Anyin a wale, a ne vheno wisainy hnanyibu tavat adre ca peritomonâ bi, hawa, adre me ca he ka hâiâ tavat adre ca peritomonâ bi, ka habe, ta je peritom?

²⁷ Ke haba tavat adre ca peritomonâ bi, ke ka e bi, ke ame long hoton hnanyibu, hawa, adre me ca he ka haikongu u, at ae hu tusi me hna peritom, kʼ u at hanyâûâ bi hnanyibu?

²⁸ Anyin a ca at Juda bi, ame ne helâe thibi hnyi hoton; ke ca peritotom minya bi ae manen hnyi unyin:

²⁹ ke e at Juda bi a helâe eû hnyin; ke haba peritom, e bi hnyi hnyok, me hanu, ke ca e bi hnyi tusi; wale ame ca ogânâ bi hnen at, ke so bi hnen Khong.