Roma 12 - Iaai Bible 1901 (New Caledonia)

¹ ANYIN a wale, hnyat me lakeiny lö, inya oge me ûjongi öbun ûnyi hnyi ibetengiö anyin Khong, möbun e he ka ham je unyibun me hnân hut ae möt, me kap, me so ka Khong, wale hanymöbun ae ûcû.

² Ke ca he ka tha hwakecibun me hmeledrany: ke so he ka wiʼ öbun hnen ohâtâ je hnyekubun, me me khanʼ öbun weny Khong ae so, me hnân osenyinâ, me wisa.

³ Anyin a inya oge me ha köbun hia thithö, hnen betenge baû adre ham könya, ka habe, ca he ke at ka ûnykûme ogânâ e bi hon ûnyi ae ûcû he ka ûnykûme, ke ûnykûme ûhnyûkongoâ thibi, hoton hna khenâ ka ke at me ke at tulutiny labageju hnen Khong.

⁴ Anyin ae hu gata je outhunyin ae se hia hnyi unyin a khaca, ke ca tha hanymen hia bi je ong outhunyin:

⁵ helâe minya öta, at se hia, khaca thibi unyin unyi Keriso, ke je ong outhunyin öta ke at ka ke at.

⁶ E hu but gata je hna ham bâûâ ae ve bongon bi hoton ibetengiö baû adre ham köta, a ne hnân operofeta, e so e ânyâ hoton kahmen labageju:

⁷ ame ne dikona, ânyâ thö hanymen dikona; ame ne at ûne, ûne thö;

⁸ ame ne at khet, khetâ thö: ke a ne at ame ham, ham hnathoâ thö; at ame musi, musi wia ju, at ame betenge, betenge thö me senyin.

⁹ E so betenge ke ba thoi hnyin. Ikikiâ thö ûnyi ae kong; kece ju ka ûnyi ae so.

¹⁰ Ibetengiököu ju öbun ge ibetengiö anyin liamekeiny; bebân he ka ogânâ ke at me ke at;

¹¹ hnyi huliwa wia ke ca sënyin bi; hwege ju hnyi oûnykûmibun; athnyabainy dö Than:

¹² senyin hnyi gejon; hokhnyokâ ju vec; labö hic bala;

¹³ haomjehen ju tavat ae kap hnyi hnödra hna theduoc; khenen ju he ka imetenyimwi me ta je atkanyua.

¹⁴ Hahnahici ödra ju waleji adre me oveci öbun; hahnahicâ, ke ca hangâ bi.

¹⁵ Tha senyin dö me tavat adre me senyin; tha tenge me tavat adre me tenge.

¹⁶ Tha hnyokköuâ juöbun. Ca ûnykûme bi ta je ûnyi ae görany, ke ca höcö he ka vheno ta je ûnyi ae hnyikânâ. Ca bemetâ bi öbun hnyi je ûnykûmenöbun.

¹⁷ Ca bi hwaban bi monu anyin ke at ge monu. Penapena thö ta je ûnyi ae ûcû hnyi hnyimakan tavat hia.

¹⁸ Laba ûsoköu me tavat hia a ne khanʼ öbun.

¹⁹ Je oûnykûmik lö, ca he öbun ka bi hwaban monu, ke nom ju ka at ae tren hmonyin: anyin adre hia but sihnalimen, ka habe, Haingen Than ame ha, Hamök he ka bi hwaban monu, oge me he bi nya ka bi hwaban.

²⁰ Ke a ne mekihnânem iwahnaihmiony möu, hân ju; ame ne beic, habelen: anyin a u je ne ânyâ e, me u me ûkhöûnâ je walep ae möt hon ban bi.

²¹ Ca he ka ngʼ öbun ge monu, ke ngâ but monu ge so.